Римдегилерге 10 - Јаҥы Кереес

¹ Карындаштар! Израильдиҥ улузы аргадалзын деп, бастыра јӱрегимнеҥ кӱӱнзеп, олор учун Кудайга мӱргип турум.

² Олор Кудайга чындык болорго сӱрекей кӱӱнзейдилер деп, керелеп турум, је мыны Ого не јараарын билбей эдип јадылар.

³ Оныҥ учун Кудай улусты канайда актап турганын билбей, акту болорго бойлоры јединерге ченежип, Ол актазын деп, Ого бакпагандар.

⁴ Христос – ол Јасактыҥ бӱдӱп калганы. Ол бӱдӱп турган кажы ла кижини актайт.

⁵ Моисей Јасак ажыра акту болоры керегинде бичийт: «Јасактыҥ јакылталарын бӱдӱрген кижи јӱрӱм јӱрер».

⁶ Бӱткени ажыра акту болоры керегинде Агару Бичик мынайда айдат: «Христосты јерге экелерге, теҥериге кем чыгар деп, бойыҥды сураба».

⁷ Ол эмезе: «Христосты ӧлгӧн улус ортодоҥ ӧрӧ алып чыгарга, алыс јерге кем тӱжер?» – деп.

⁸ Агару Бичик не дийт? – «Кудайдыҥ сӧзи сеге јуук, ол тилиҥде ле кӧксиҥде». Улус бӱтсин деп, бис јарлыктап турган сӧс бу.

⁹ Иисус – ол Кайракан деп, тилиҥле јарлап, Оны Кудай тиргискен деп, јӱрегиҥле бӱдер болзоҥ, аргадаларыҥ.

¹⁰ Акталайын деп, јӱрегиле бӱдедилер, аргадалайын деп, тилиле јарлайдылар.

¹¹ Агару Бичик айдат ине: «Ого бӱдӱп турган кандый ла кижи уйатка тӱшпес».

¹² Иудей ле еллин ортодо башказы јок, нениҥ учун дезе ончозыныҥ Кайраканы јаҥыс, Ого баштанып турган кажы ла кижиге Ол Бойыныҥ байлыгынаҥ берип јат.

¹³ Кайраканга баштанган кандый ла кижи аргадалар.

Израильдиҥ ончо эмес улузы Сӱӱнчилӱ Јарды алынбаган

¹⁴ Је Кемге бӱтпей турган, Ого канайып баштанат? Кем керегинде укпаган, Ого канайып бӱдет? Јарлыктап турган кижи јокко канайып угат?

¹⁵ Ийилбезе, канайып јарлыктайт? Агару Бичик айдат: «Амырды, Сӱӱнчилӱ Јарды јарлап базып јӱрген улустыҥ буттары кандый кеен!»

¹⁶ Је Сӱӱнчилӱ Јарды ончо улус бойына алынбаган. Исаия айдат ине: «Кайракан! Бис айткан сӧстӧрди угала, кем бӱткен?»

¹⁷ Анайдарда, кижи Јарды угуп турганда, бӱдӱп баштайт, Христос јарлалып турганда, угат.

¹⁸ Је мен сурайдым: «Олор укпады эмеш пе?» Уккан эмей! Бичилгениле: «Олордыҥ ӱни јер-ӱстине јайылган, олордыҥ сӧстӧри орчылаҥныҥ кыйузына јеткен».

¹⁹ База сурайдым: «Израиль билбеди эмеш пе?» Моисей баштапкы болуп айткан: «Калык деп адалбас калык ажыра слерди кӱнӱркедерим. Санаа-укаазы јок калык ажыра слерди ачындырарым».

²⁰ Исаия да чике айдат: «Мени бедиребеген улус Мени таап алды, Мени сурулабаган улуска ачылдым».

²¹ Израиль керегинде айдат: «Бакпас, кедер калыкты кычырып, кере тӱжине колдорымды јайдым».