Петрдыҥ 2-чи самаразы 1 - Јаҥы Кереес

¹ Иисус Христостыҥ кулы ла апостолы Симон-Петрдаҥ – Кудайыстыҥ, Аргадаачы Иисус Христостыҥ, чындыгына једип, бис чилеп акту јӱректеҥ бӱдӱп турган улуска.

² Кудайды ла Иисус Христос Кайраканысты билип турган тужыгарда слерге јакшылык ла амыр кожулзын.

Чындык билим

³ Оныҥ кудайлык кӱчи јӱрӱмге ле Кудайга беринерине керектӱ ончо немени биске тегин берип јат. Мыны ончозын бисти Бойыныҥ магыла, быйаныла кычырган Кудайды билип турганыс ажыра алып јадыбыс.

⁴ Анайып биске баалу-чуулу ла улудаҥ улу сӧс берилген. Ол сӧс бисти Кудайдыҥ бӱдӱмелин бойына алынзын, бу телекейдеги јайрадуга экелеечи кычадаҥ кыйышсын деп берилген.

⁵ Бого болуп ончо кӱчигерди салыгар; бӱдӱмјигерде бойыгардыйын кородып, кудайлык быйанга једигер. Кудайлык быйанга једип, Оныҥ табын билип алыгар.

⁶ Оныҥ табын билип, кӱӱнигердиҥ ээзи болыгар, кӱӱнигердиҥ ээзи болуп, турумкай болыгар, турумкай болуп, Кудайга беринген болыгар.

⁷ Кудайга беринген болуп, карындаштарды сӱӱгер, карындаштарды сӱӱп, ончо улуска карузыгар.

⁸ Бу ончозы слерде бар болуп, кожулып турза, Иисус Христос Кайраканысты билип аларында једими ле тузазы јок артпазыгар.

⁹ Кемде бу ончозы јок, ол сокор ло каралга, башкы кинчектерин арутайтанын ундып койгон.

¹⁰ Оныҥ учун, карындаштар, слерди Кудай кычырып ла талдап алганын јӱрӱмде кӧргӱзерге кичеенигер. Анайда эдип, качан да бӱдӱрилбезигер.

¹¹ Анайып, Кайраканыстыҥ – Аргадаачы Иисус Христостыҥ мӧҥкӱлик Каандыгына кирерге слерге јайым јол ачылар.

¹² Оныҥ учун мыны билип, бу чындыкта бек те турган болзогор, ол керегинде слерге јаантайын эске алындырар кӱӱним бар.

Христостыҥ магыныҥ керечилери

¹³ Бу байканда – бортык эт-канда јӱрген тужымда слерди эске алындырышла ойгозоры чын деп бодоп турум.

¹⁴ Меге Иисус Христос Кайраканыстыҥ ачканыла, удабастаҥ байканымды таштап баратанымды билерим.

¹⁵ Мен атана да берген соҥында слер мыны јаантайын эске алынып турзын деп, ончо кӱчимди салып кичеенерим.

¹⁶ Иисус Христос Кайраканыстыҥ кӱчин ле келгенин јарлап, слерге сананып тапкан чӱмдӱ куучындар айтпадыс ине, је бис Оныҥ улу учурын бойыстыҥ кӧзисле кӧрдис.

¹⁷ Ол Ада Кудайдаҥ кӱндӱ ле мак алып турарда, Ого теҥери магыныҥ бийигинеҥ мындый ӱн угулган: «Бу Мениҥ сӱӱген Уулым, Ондо Мениҥ јакшылыкту табым».

¹⁸ Теҥеридеҥ келген бу ӱнди Оныла кожо агару кырда болорыста укканыс.

¹⁹ База бисте јарлыктап айткан эҥ быжу сӧс бар. Ого баштанып, јакшы эдип јадыгар. Ол сӧс таҥ аткалакта, јӱректеригерде таҥ чолмон чыккалакта, караҥуй јерде јарыткыш чылап чалып јат.

²⁰ Элдеҥ озо билип јӱригер: Агару Бичикте јарлыктап айткан кандый да сӧсти кижи бойы јартап болбос,

²¹ нениҥ учун дезе јарлыкчылардыҥ сӧзи кижиниҥ табыла качан да айдылбаган, је Кудайдыҥ агару улузы Агару Тынга баштадып, сӧсти Кудайдаҥ айткандар.