Петрдыҥ 1-кы самаразы 2 - Јаҥы Кереес

Иисус – тирӱ таш

¹ Анайдарда, кандый ла ӧштӧштӧҥ, кандый ла куурмакташтаҥ, экијӱстеништеҥ, кӱйӱништеҥ, кандый ла јамандаштаҥ айрылып,

² јаҥы туулган балдар чылап ӧзӧргӧ лӧ аргадаларга, сӧстиҥ ару сӱдин тыҥ кӱӱнзегер.

³ Слер амзап кӧрӧлӧ, Кайракан быйанду деп, билип алганыгар.

⁴ Ого, улус јектеп койгон, је Кудай эрјине деп талдап алган тирӱ ташка, јууктап,

⁵ бойыгар да, тирӱ таштардаҥ чылап, бойыгардаҥ бойыгар тынныҥ туразын тудыгар. Анда Иисус Христос ажыра Кудайга јараар тыннаҥ тайылга эдерге, агару абыстар болыгар.

⁶ Агару Бичикте айдылган ине: «Бат, Мен талдап алган эрјине ташты, булуҥныҥ тӧзиндеги ташты, Сиондо салып јадым. Бу ташка бӱдӱп турганы, уйатка калбас».

⁷ Анайдарда, ол слерге, бӱдӱп тургандарга, эрјине таш, бӱтпей тургандарга ол – тура тудаачылар јектеп койгон таш. Је ол булуҥныҥ тӧзиндеги таш боло берген. Ол улус бӱдӱрилетен таш, олордыҥ јолында кайадый.

⁸ Улус сӧскӧ бакпай, бу ташка бӱдӱрилип јадылар. Олордыҥ салымы андый.

⁹ Слер дезе, Кудай талдап алган ук, Каанныҥ абыстары, агару улус, Кудайдыҥ калыгы. Ол слерди караҥуйдаҥ Бойыныҥ кайкамчылу јарыгына кычырган, Оныҥ улу быйанын јарлаарга талдап алган.

¹⁰ Слер башкыда Кудайдыҥ калыгы болбогоныгар, эмди Оныҥ калыгы болуп јадыгар; башкыда быйан албаганыгар, эмди алдыгар.

Кудайдыҥ кулдары чылап эдип јӱригер

¹¹ Кару улузым! Слерди, туш јердеҥ келген, бу телекейде кӧчкӱндер чилеп јӱрген улусты, кычырып турум: тынга удура јуулажып турган эт-канныҥ кычазынаҥ ырап,

¹² ӧскӧ калыктар ортодо јакшы јӱрӱм јӱригер. Олор слерди јаманды эдип туру деп бурулап болбозын, карын, слердиҥ јакшы керектеригерди кӧрӱп, Кудай олорго быйан берер кӱнде Оны мактазын.

¹³ Кижиниҥ кандый ла јаҥына Кайраканга болуп багыгар: ол эҥ бийик јаҥда отурган каан да болзын,

¹⁴ кааннаҥ ийилген башкараачылар да болзын. Олор каршучыларды кезедерге ле јакшыны эдеечилерди кайралдаарга ийилип јадылар,

¹⁵ нениҥ учун дезе Кудайдыҥ табы мындый: бис јакшыны эдип, неме билбес улустыҥ учуры јок эрмек-куучындарын токтодор учурлу.

¹⁶ Јайым улус чылап јӱригер, јайымыгарды јаманды эдерге тузаланбагар, карын, Кудайдыҥ кулдары чылап јӱригер.

¹⁷ Ончо улусты тооп јӱригер, карындаштарды сӱӱгер, Кудайдаҥ айагар, каанды тоогор.

¹⁸ Јалчылар, бийлердеҥ айап, олорго багыгар, јаҥыс та јакшы ла кижизек эмес, је кату бийлерге багыгар.

¹⁹ Кем Кудайды сананып, акту јерге шыралап, ачу-корон кӧрӱп турган болзо, бу јакшылык ине.

²⁰ Кинчектер учун соктырып турган болзогор, не учун мактайтан? Јакшыны эдип шыралап, је чыдажып турган болзогор, слерди Кудай јарадып јат.

²¹ Слер бого кычырылганыгар. Христос бисти Оныҥ изиле барзын деп, биске тем артырып, бис учун шыралаган.

²² Ол кинчек этпеген, Оныҥ сӧстӧринде тӧгӱн јок болгон.

²³ Оны јамандаарда, Ол удура јамандабаган; шыралап јӱрӱп, коркытпаган, је мыны эдерин Чындык Јаргычыга бӱдӱмјилеген.

²⁴ Ол кинчектеристи Бойыныҥ эдинде Бойы керӱ агашка кӧдӱрип, бис кинчектердеҥ айрылып, чындыкта јӱрзин деп, кадап койгон.

²⁵ Слер азып јӱрген койлордый болгоныгар. Эмди Кӱдӱчиге ле тыныгарды Чеберлеечиге бурылдыгар.