Матфей 9 - Јаҥы Кереес

Курулып калган кижини јасканы

¹ Иисус кемеге отурып, кечеле, Бойыныҥ калазына једип келди.

² Ого курулып калган бир кижини тӧжӧккӧ салганча экелдилер. Иисус олордыҥ бӱдӱп турганын кӧрӧлӧ, курулып калганга айтты: – Јалтанба, балам, кинчектериҥ ташталган.

³ Је бат, бичикчилердиҥ кезиги ичинде айдынды: «Ол Кудайды јамандап јат».

⁴ Иисус дезе олордыҥ санаазын билип, айтты: – Јӱрегеерде не керек јаман сананып јадыгар?

⁵ Не деп айдарга јеҥил: «Кинчектериҥ ташталган» – деерге бе, эмезе: «Тур, базып јӱр» – деерге бе?

⁶ Јердеги кинчектерди таштайтан јаҥ Кижи Уулында барын билип јӱрӱгер деп турум. – Оноҥ курулып калганга баштанды: – Тур, тӧжӧгиҥди алып, айлыҥа јан.

⁷ Онызы туруп, јана берди.

⁸ Улус мыны кӧрӱп кайкады, кижиге мындый јаҥ берген Кудайды алкады.

Бойыла кожо Матфейди алганы

⁹ Иисус оноортынаҥ ӧдӱп барадып, Матфей деп бир кижи калан јуур јеринде отурганын кӧрӧлӧ, ого айтты: – Мениҥ кийнимнеҥ бас. Онызы ӧрӧ туруп, Иисустыҥ кийнинеҥ басты.

¹⁰ Иисус ӱйде кыйын отурарда, кӧп каланчылар ла кинчектӱлер келип, Оныла, ӱренчиктерле кожо кыйын отурып алдылар.

¹¹ Мыны кӧрӧлӧ, фарисейлер ӱренчиктерге айтты: – Ӱредӱчигер каланчыларла, кинчектӱлерле кожо не керек ичип-јийт болбогой?

¹² Иисус дезе, мыны угала, олорго айтты: – Эмчини кадык улус эмес, оору улус керексиир.

¹³ Буурзаш кӱӱнзеп јадым, тайылга кӱӱнзеп турган эмезим деп айткан сӧстиҥ учурын оҥдоорго, барып ӱренигер. Мен актуларды эмес, кинчектӱлерди кычырарга келген инем.

Орозо керегинде сурак

¹⁴ Ол тушта Иисуска Иоанныҥ ӱренчиктери келип, айттылар: – Нениҥ учун бистер ле фарисейлер улам сайын орозолоп јадыс, Сениҥ ӱренчиктериҥ дезе орозо тутпай јат?

¹⁵ Иисус олорго айтты: – Колту кожо јӱргенде, тойлогон улус кунугатан беди? Је колтуны олордоҥ айрып алар кӱндер келер, ол тушта олор орозо тудар.

¹⁶ Эски кийимге јаҥы бӧстиҥ ӧӧнин јамабайтан; јамачы эскизин јырта тартып, јыртыгы там јаанаар.

¹⁷ Јаҥы аракыны эски тажуурга урбайтан; анайткажын, тажуур јыртылып, аракызы да тӧгӱлер, тажууры да ӱрелер. Карын, јаҥы аракыны јаҥы тажуурга уратан. Ол тушта аракы да, тажуур да бӱдӱн болор.

Оору ӱй кижини јасканы ла кызычакты тиргискени

¹⁸ Иисус олорго мынайда айдып турганча, бир бий кижи базып келеле, Ого бажырып, айтты: – Кызычагым јаҥы ла јада калды. Барып, оныҥ ӱстине колыҥ салып, алка, ол тирилер.

¹⁹ Иисус туруп, оныҥ кийнинеҥ басты; ӱренчиктери кожо бардылар.

²⁰ Он эки јыл кан келип, јобоп јӱрген ӱй кижи болгон. Ол Иисуска кийнинеҥ базып келеле, Оныҥ кийиминиҥ эдегине тийип,

²¹ ичинде айдынган: «Оныҥ кийимине тийзем ле, јазыларым».

²² Иисус дезе кайра баштанып, ӱй кижини кӧрӧлӧ, айтты: – Јалтанба, кызым! Бӱдӱп турганыҥ сени аргадады. Ӱй кижи ол ло тарый јазыла берди.

²³ Иисус бийдиҥ айлына келеле, кунукчылду кӱӱ ойногон ло тӱймежип базып јӱрген улусты кӧрӱп,

²⁴ олорго айтты: – Тышкары чыгыгар! Кызычак ӧлбӧгӧн, уйуктап јат. Оны шоодо бердилер.

²⁵ Улусты тышкары чыгарган кийнинде Ол кирип, кызычакты колынаҥ тутты, онызы туруп келди.

²⁶ Бу табыш байагы јерге текши јайылды.

Эки сокорды јасканы

²⁷ Иисус оноортынаҥ барып јадарда, Оны эки сокор ээчип, кыйгырыжып турдылар: – Биске буурза, Давид Уулы!

²⁸ Иисус ӱйге кирерде, сокор улус Ого базып келдилер. Иисус олордоҥ сурады: – Мыны эдип болорыма бӱдӱп туругар ба? – Эйе, Кайракан! – дедилер.

²⁹ Айдарда, Иисус олордыҥ кӧзине тийип, – Бӱдӱмјигерле, слерге болгой – деерде,

³⁰ олордыҥ кӧзи јарый берди. – Мыны кижи билбезин – деп, Иисус олорго кату јакарды.

³¹ Је олор чыгала, Иисус керегинде јер сайын јарлады.

Тил јокты јасканы

³² Олор чыгып барадарда, Иисуска ӧзӧк-буурында шилемирлӱ тил јок кижини экелдилер.

³³ Шилемир чыгара сӱрдиртерде, тил јок кижи эрмектене берди. Улус кайкап, айдыжып турды: – Израильде мындый неме качан да болбогон!

³⁴ Фарисейлер дезе айдыжып турдылар: – Ол шилемирлерди шилемир бийиниҥ кӱчиле чыгара сӱрӱп турбай.

Кӱдӱчизи јок койлор

³⁵ Иисус ончо калаларды ла јурттарды эбирип, синагогаларда ӱредип јӱрди. Ол Каандык керегинде Сӱӱнчилӱ Јар јарлап, улустыҥ кандый ла оорузын, кандый ла јоболын јазып турды.

³⁶ Кӧп улусты кӧрӧлӧ, олорго ичи ачыды: олор кӱдӱчизи јок койлордый тӱймеп, тозуп калгандар.

³⁷ Айдарда, ӱренчиктерине айтты: – Кезер аш кӧп эди, ишчилер дезе ас.

³⁸ Анайдарда, кыраныҥ Бийин јайнагар, кыразына ишчилер ийзин.