Матфей 3 - Јаҥы Кереес

Куба чӧлдӧги ӱн

¹ Ол кӱндерде Крестеечи Иоанн келип, Иудейдиҥ куба чӧлинде јарлыктап,

² айдып јӱрген: – Кинчектеригерди алынып, Кудайга баштаныгар! Теҥери Каандыгы јууктап келди!

³ Исаия јарлыкчыныҥ мынайда айткан кижизи бу болгон: «Куба чӧлдӧ кыйгырганныҥ ӱни: Кайраканга јол белетегер, Оныҥ јолдорын тӱс эдигер!»

⁴ Иоанн бойы дезе тӧӧ тӱгинеҥ эткен кийимдӱ болгон, белин тере курла курчанган, јиген ажы аспан ла јер адаруныҥ балы.

⁵ Ол тушта Иерусалимниҥ улузы, Иудей ичинде, Иорданды јакалай јуртаган ончо улус ого келип,

⁶ кинчектерин ачып, Иордан-сууга кирип, Иоаннга креске тӱжӱп тургандар.

⁷ Креске тӱжерге ого кӧп фарисейлер ле саддукейлер келип јатканын кӧрӧлӧ, олорго айтты: – Јыланныҥ ач-ӱрени! Кудайдыҥ келер чугулынаҥ кыйыжарыгар деп, слерге кем айтты?

⁸ Чындаптаҥ кинчегерди алынып, Кудайга баштанганыгарды керекте кӧргӱзигер.

⁹ «Бистиҥ адабыс Авраам» – деп, ичигерде айдарга сананбагар. Айдып турум слерге: Кудай бу таштардаҥ Авраамга балдар јайап берер аргалу.

¹⁰ Малта да агаштардыҥ тазылында јадыры: јакшы јиилек бӱтпес агашты кезип, отко таштайтан.

¹¹ Кинчегеерди таштаганаардыҥ темдеги эдип, мен слерди суула крестеп јадым, је кийнимнеҥ келип јатканы менеҥ кӱчтӱ; мен Оныҥ ӧдӱгин де тудунып апарарга турбазым. Ол слерди Агару Тынла, отло крестеер.

¹² Оныҥ кӱреги колында: Ол идиргенин арутап, буудайын алмарына урар, саламын дезе, ӧчпӧс отко таштап, ӧртӧӧр.

Иисус Христостыҥ креске тӱшкени

¹³ Ол тушта Иоаннга креске тӱжерге Галилей јеринеҥ Иорданга Иисус келди.

¹⁴ Иоанн дезе Оны токтодып, айтты: – Сен мени креске тӱжӱрер учурлу, Сен дезе меге келдиҥ бе?

¹⁵ Је Иисус ого каруу јандырды: – Эмди токтотпо. Мынызыла кандый ла чынды бӱдӱрип койорыс. Айдарда, Иоанн јаратты.

¹⁶ Иисус креске тӱжеле, ол тарый суудаҥ чыгып келерде, Ого теҥери ачылды. Ол кӱӱле чилеп Ого тӱжӱп келеткен Кудайдыҥ Тынын кӧрӱп ийди.

¹⁷ Теҥеридеҥ ӱн чыкты: – Бу Мениҥ сӱӱген Уулым, Оныҥ Бойында Мениҥ јакшылыкту табым.