Матфей 28 - Јаҥы Кереес

Иисус Христостыҥ тирилгени

¹ Суббот кӱн ӧткӧн кийнинде, неделениҥ баштапкы кӱниниҥ таҥ алдында Мария Магдалина ла база бир Мария сӧӧк салган јерди кӧрӧргӧ келдилер.

² Кенетийин сӱрекей тыҥ јер силкинип, теҥеридеҥ Кайраканныҥ ангели тӱжӱп келди. Ол сӧӧк салган јерге базып келеле, ташты аҥтарып, ого отурып алды.

³ Бӱдӱми јалкындый, кийими кардый ак болды.

⁴ Каруулчыктар оноҥ коркып, тыркыража бердилер, ӧлгӧндий болдылар.

⁵ Ангел дезе ӱй улуска айтты: – Коркыбагар, кере тартырган Иисусты бедиреп турганыгарды билерим.

⁶ Ол мында јок. Бойы айтканыла, тирилген. Јууктай базып, Кайракан јаткан јерди кӧригер.

⁷ Ылтам барыгар, Ол тирилип калган, Галилейге слердеҥ озо барып јат, Оны анда кӧрӧригер деп, ӱренчиктерине айдыгар. Бат, слерге айттым.

⁸ Олор сӧӧк салган јердеҥ меҥдей чыгып, ӱренчиктерине айдарга, коркып ла сӱрекей сӱӱнип, јӱгӱре бердилер.

⁹ Ӱренчиктерине айдарга баргылап јадарда, олорго Иисус Бойы туштап, – Эзендер! – деди. Олор базып келеле, Оныҥ будын кучактай алып, Ого бажырдылар.

¹⁰ – Коркыбагар! – деп, Иисус олорго айтты. – Барып, карындаштарыма айдыгар, Галилей дӧӧн барзын. Мени анда кӧргӱлеер.

¹¹ Ӱй улус барып јадарда, каруулчыктардыҥ кезиги калага келип, не болгонын ончозын улу абыстарга айдып бердилер.

¹² Улу абыстар дезе јаандарла кожо јуулыжып јӧптӧжӧлӧ, јуучылдарга арбынду акча берип,

¹³ айттылар: – Оныҥ ӱренчиктери тӱнде келип, уйуктап јадарыста, сӧӧгин уурдай бердилер – дегер.

¹⁴ Мыныҥ табыжы башчыга јеткежин, оны бӱдӱндирип койорыс, слерге јаман неме болбос.

¹⁵ Олор акчаны алала, ӱреткениле эттилер. Бу сӧс иудейлер ортодо элбеде таркап, бӱгӱнге јеткен.

Ӱренчиктерине јакарганы

¹⁶ Он бир ӱренчик дезе Галилей дӧӧн, Иисустыҥ олорго айткан кыры јаар баргандар.

¹⁷ Оны кӧрӧлӧ, Ого бажырдылар, кезиктери дезе эреҥистеле бердилер.

¹⁸ Иисус јууктап, олорго айтты: – Теҥери ле јерде ончо јаҥ Меге берилген.

¹⁹ Анайдарда, барыгар, ончо калыктарды ӱредигер. Олорды Аданыҥ, Уулыныҥ ла Агару Тынныҥ адыла крестеп,

²⁰ слерге јакарганымды ончозын бӱдӱрерге ӱредигер. Је бат, ончо кӱндердиҥ туркунына, чак тӱгенгенче Мен слерле кожо. Аминь.