Матфей 25 - Јаҥы Кереес

Он кыс керегинде укаа сӧс

¹ – Ол тушта Теҥери Каандыгы он кыска тӱҥей болор. Олор јарыткыштарын алганча, колтуга уткый чыккандар.

² Бежӱзи керсӱ, бежӱзи сагыжы јетпес болгон.

³ Сагыжы јетпестери јарыткыштарын алала, май албаган.

⁴ Керсӱлери дезе јарыткыштарыла кожо майлу јыракыларын алганча келген.

⁵ Колту саадаганда, ончозы ӱргӱлеп, уйуктап калган.

⁶ Тӱн аразында кыйгы угулган: «Колту келедири, оны уткып чыгыгар!»

⁷ Айдарда, ончо кыстар туруп, јарыткыштарын јазап алгандар.

⁸ Сагыжы јетпестери керсӱлерине айткан: «Майыгардаҥ биске берижигер, јарыткыштарыс ӧчӱп барадыры».

⁹ Керсӱлери дезе айткандар: «Биске де, слерге де јетпей калбазын деп, бистеҥ алганча, садучыларга барып, бойыгарга садып алыгар».

¹⁰ Олор садып аларга барып јадарда, колту једип келген. Белен кыстар оныла кожо тойлоп барган, эжик дезе јабылып калган.

¹¹ Оныҥ кийнинде байагы кыстар келип, «Кайракан, кайракан, эжигиҥди ач!» – дешкендер.

¹² Је ол каруу јандырган: «Чынын айдадым слерге: слерди билбезим».

¹³ Анайдарда, ойгу болыгар, Кижи Уулы келериниҥ кӱнин де, саадын да билбезигер.

Талант акча керегинде укаа сӧс

¹⁴ Ол тушта мындый болор. Бир кижи ӧскӧ ороонго атанар алдында кулдарын кычырып алып, олорго јӧӧжӧзин артырып койгон.

¹⁵ Бирӱзине беш талант акча берген, бирӱзине эки, бирӱзине бир талант – кажызына ла кирезинче береле, атана берген.

¹⁶ Беш талант алганы барала, онызын керекке тудуп, ӱзеери беш талант иштеп алган.

¹⁷ Эки талант алганы анайып ок эки талант иштеп алган.

¹⁸ Бир талант алганы барып, јерди казып, бийиниҥ акчазын кӧмӱп койгон.

¹⁹ Узак ӧйдиҥ бажында ол кулдардыҥ бийи јанып келеле, олорды тооложорго алдырган.

²⁰ Беш талант алганы ӱзеери иштеп алган беш талантын экелип, айткан: «Бийим, меге беш талант берген эдиҥ. Бат, ӱзеери иштеп алган беш талантым бу».

²¹ Бийи ого айткан: «Јакшы, керсӱ ле бӱдӱмјилӱ кул! Аска бӱдӱмјилӱ болдыҥ, кӧптиҥ бажына сени тудуп јадым. Бийиҥле кожо сӱӱн».

²² Эки талант алганы келип, «Бийим, меге эки талант берген эдиҥ. Бат, ӱзеери иштеп алган эки талантым бу» – деген.

²³ Бийи ого айткан: «Јакшы, керсӱ ле бӱдӱмјилӱ кул! Аска бӱдӱмјилӱ болдыҥ, кӧптиҥ бажына сени тудуп јадым. Бийиҥле кожо сӱӱн».

²⁴ Бир талант алганы келип, айткан: «Бийим, сени кату кижи деп билгем: ӱрендебеген јериҥнеҥ кезетен эдиҥ, чачпаган јериҥнеҥ теретен эдиҥ.

²⁵ Сенеҥ коркып, барып талантыҥды јерге кӧмӱп койгом. Бат, бойыҥдыйын кайра ал».

²⁶ Бийи ого айткан: «Јаман, јалку кул! Ӱрендебеген јеримнеҥ кезеримди, чачпаган јеримнеҥ тереримди билгениҥде,

²⁷ акчамды эбиртер керек болгон. Мен келип, бойымдыйын кирелтелӱ алар эдим.

²⁸ Оныҥ талантын алыгар, он таланттуга беригер.

²⁹ Бардыҥ барына берилер, ӱзеери кожулар, јоктыҥ болгоны да айрылар.

³⁰ Эш-немеге јарабас кулды дезе тыш караҥуйга таштагар. Анда ый ла тиш кыјырты болор». Оноҥ ӱнденип айтты: «Кулакту кижи уксын!»

Калыктарды јаргылаары

³¹ Кижи Уулы ончо ангелдериле кожо мактулу келгежин, мактулу ширеезине отурар.

³² Ончо калыктар Оныҥ алдына јуулар. Ол, кӱдӱчи койлорды эчкилердеҥ бӧлӱгендий, олорды бойы бойынаҥ бӧлиир:

³³ койлорын Бойыныҥ оҥ јанына тургузар, эчкилерин – сол јанына.

³⁴ Ол тушта Каан Бойыныҥ оҥ јанында тургандарга айдар: «Келигер, Адамныҥ алкагандары, телекей јайалганынаҥ ала слерге белетелген Каандыкты энчиленигер.

³⁵ Нениҥ учун дезе аштап јӱреримде, Меге курсак бергенигер, суузаарымда, суум кандырганыгар, јорыктап јӱреримде, Мени айлыгарга кийдиргенигер;

³⁶ јылаҥаш болорымда, Меге кеп кийдиргенигер, оорып јадарымда, Меге јолыгып јӱргенигер, тӱрмеде отурган тужымда Меге келип барганыгар».

³⁷ Ол тушта Ого актулар айдар: «Кайракан, аштаганыҥды кӧрӱп, Сени азырадыс па? Эмезе суузаганыҥды кӧрӱп, суу сузуп бердис пе?

³⁸ Јорыктап јӱргениҥди кӧрӱп, айлыска кийдирдис пе? Эмезе јылаҥаш јӱргениҥди кӧрӱп, кеп кийдирдис пе?

³⁹ Оорып јатканыҥды, эмезе тӱрмеде отурганыҥды кӧрӱп, јолыктыс па?»

⁴⁰ Каан олорго каруу јандырар: «Чынын айдадым слерге: мыны бу эҥ кичӱ карындаштарымныҥ бирӱзине эдип, Меге эткенигер ол».

⁴¹ Оноҥ сол јанында тургандарга айдар: «Каргышка калгандар, кӧрмӧскӧ, оныҥ элчилерине белетелген ӧчпӧс отко Менеҥ кеде тайылыгар.

⁴² Аштаарымда, Меге курсак бербедигер, суузаарымда, суу сузуп бербедигер,

⁴³ јорыктап јӱреримде, Мени айлыгарга кийдирбедигер, јылаҥаш болорымда, Меге кеп кийдирбедигер, оорып јадарымда, тӱрмеде отурарымда, келип јолыкпадыгар».

⁴⁴ Ол тушта булар да Ого айдар: «Кайракан, Сениҥ аштаганыҥды, суузаганыҥды, јорыктап јӱргениҥди, јылаҥаш болгоныҥды, оорып јатканыҥды, тӱрмеде отурганыҥды кӧрӱп, Сеге болушпаган бедис?»

⁴⁵ Ол айдар: «Чынын айдадым слерге: мыны бу эҥ кичӱлердиҥ бирӱзине этпей, Меге этпегенигер ол».

⁴⁶ Айдарда, олор ӱргӱлји кыйынга барар, актулар дезе, ӱргӱлји јӱрӱмге.