Матфей 24 - Јаҥы Кереес

Христостыҥ экинчи келери

¹ Иисус байзыҥнаҥ чыгала, барарга јадарда, Ол байзыҥныҥ тураларын кӧрзин деп, ӱренчиктери базып келдилер.

² – Мыныҥ ончозын кӧрӱп туругар ба? – деп, Иисус олордоҥ сурады. – Чынын айдадым слерге: мында таш ӱстине таш артпас. Ончозы јемирилип-сайалар!

³ Ол Елеон кырда отурарда, Ого јаҥыс ӱренчиктери базып келеле, сурадылар: – Биске айт, бу качан болор, келериҥниҥ, чак тӱгенердиҥ темдеги кандый болор?

⁴ Иисус айтты: – Калак, слерди кижи астырбазын.

⁵ Кӧп улус Мениҥ адымды аданып келер, «Мен Христос» деер, кӧп улусты астыктырар.

⁶ Анайда ок јуу-согуш болуп јатканын ла јуу-чак керегинде табыш угарыгар. Калак, чочыбагар, мыныҥ ончозы болор учурлу, је бу учы эмес.

⁷ Калык калыкка, каандык каандыкка удура туруп чыгар, ачана-торо болор, кезектей јер силкинер,

⁸ је бу ончозы ӱй кижиниҥ бала табарда оорузыныҥ јӱк башталганы.

⁹ Ол тушта слерди кыйынга берип, ӧлтӱрип турар, слерди Мениҥ адым учун ончо калыктар јаман кӧрӧр.

¹⁰ Ол тушта кӧп улус бӱтпей барып, јана тӱжер, бой-бойын садыжып, јаман кӧрӱжер.

¹¹ Кӧп тӧгӱн јарлыкчылар чыгар, кӧп улусты астыктырар.

¹² Јарамас кӧптӧп, оноҥ улам кӧп улустыҥ сӱӱжи соор.

¹³ Учына јетире чыдашканы дезе, аргадалар.

¹⁴ Ончо калыктарга кере болзын деп, Каандык керегинде Сӱӱнчилӱ Јар јер-ӱстине јарлалар. Ол тушта чак тӱгенер.

Калганчы ӧйлӧрдӧ

¹⁵ Анайдарда, Даниил јарлыкчыныҥ айтканыла, агару јерде јайрадыштыҥ быјарын кӧрзӧгӧр, – кычыраачы аайлазын –

¹⁶ ол тушта Иудейде јӱргендер кырларга качсын;

¹⁷ јабынчыда болгоны, айыл ичиндеги немезин алайын деп тӱшпезин;

¹⁸ кырада јӱргени, кийимин алайын деп бурулбазын.

¹⁹ Ол кӱндерде барлуларга, бала эмискендерге ачу-корон!

²⁰ Качатаныс кышкыда эмезе суббот кӱнде болбозын деп мӱргигер.

²¹ Јер бӱдердеҥ бери эмдиге јетире болбогон, соҥында да болбос андый улу ачу-корон келер.

²² Ол кӱндер кыскартылбаган болзо, тынар-тынду неме аргадалбас эди, је талдап алгандарга болуп ол кӱндер кыскартылар.

²³ Ол тушта кем кижи слерге: «Бат, Христос мында» эмезе «Анда» – дегежин, бӱтпегер.

²⁴ Тӧгӱн христостор, тӧгӱн јарлыкчылар табылар, улу билдилер ле кайкалдар кӧргӱзер. Мыныла олор, аргалу болзо, талдалгандарды да астыктырарга эдер.

²⁵ Бат, слерге озолондыра айттым.

²⁶ Анайдарда, слерге: «Ол ээн талада јӱрӱ» – дегежин, чыкпагар, «Ол ичиндеги кыпта отуры» – дегежин, бӱтпегер.

²⁷ Кӱн чыгыжынаҥ ала кӱн бадыжына јетире јарыдар јалкындый, – Кижи Уулыныҥ келери андый болор.

²⁸ Сӧӧк јаткан јерге мӱркӱттер јуулар.

Кижи Уулы келзе

²⁹ Ол ло тарый, ол кӱндердиҥ ачузы ӧткӧли, кӱн карачкыланар, ай јарыгын бербес, јылдыстар теҥеридеҥ тӧгӱлер, теҥериниҥ кӱчтери косколонор.

³⁰ Ол тушта теҥериде Кижи Уулыныҥ билдизи кӧрӱнер, јердеги ончо калыктар ыйлажып, улу кӱчтӱ ле мактулу Кижи Уулы теҥериниҥ булудыла келип јатканын кӧрӱп ийер.

³¹ Ол Бойыныҥ ангелдерин ӱнгӱр табышту амыргылу ийер, олор Оныҥ талдап алгандарын ак-јарыктыҥ тӧрт талазынаҥ, теҥериниҥ бир учынаҥ экинчи учына јетире јуур.

³² Слерди смоква агаш ӱреткей: оныҥ будагы јымжап, бӱрлене бергенде, јай јууктап келди деп, билип јадыгар.

³³ Анайып ок слер де: мыныҥ ончозын кӧрӧр болзогор, ӧй јууктап келди, эжик јанында туру деп билигер.

³⁴ Чынын айдадым слерге: мыныҥ ончозы бу ӱйе баргалакта болор.

³⁵ Теҥери ле јер јастыгар, је Мениҥ сӧстӧрим јастыкпас.

³⁶ Ол кӱнди, саатты кем де билбес, теҥеридеги ангелдер де билбес, јаҥыс Ада билер.

³⁷ Нойдыҥ кӱндеринде кандый болгон, Кижи Уулыныҥ келери андый ок болор.

³⁸ Чайык чыгар кӱндердиҥ алдында, Ной ковчегке кирердиҥ киргенче, улус ичип-јип јаткан, кижи алары алып, кижиге барары барып турган.

³⁹ Чайык чыгып, ончозын кырганча, олор нени де сананбай јӱргендер. Кижи Уулыныҥ келери андый ла болор.

⁴⁰ Ол тушта эки кижи јалаҥда јӱрер: бирӱзин алып баргылаар, бирӱзин дезе артырып койгылаар.

⁴¹ Эки ӱй кижи кол теермен тартар: бирӱзин алып баргылаар, бирӱзин дезе артырып койгылаар.

⁴² Анайдарда, ойгу болыгар, нениҥ учун дезе Кайраканыгар кандый кӱнде келерин билбезигер.

⁴³ Уурчы тӱнниҥ кажы кирезинде келерин айыл ээзи билген болзо, ойгу болуп, айлын тонотпос эди деп, билип јадыгар.

⁴⁴ Оныҥ учун слер де белен болыгар: Кижи Уулы слер сакыбаган ӧйдӧ келер.

Бӱдӱмјилӱ ле бӱдӱми јок кул

⁴⁵ Јалчыларды башкарып, олорго ӧйинде курсак берип турзын деп, бий кӧстӧгӧн бӱдӱмјилӱ ле керсӱ кул кем болотон?

⁴⁶ Бийи келип, кулы анайда эдип јӱргенин кӧрӧр болзо, байагы кул кежиктӱ.

⁴⁷ Чынын айдадым слерге: оны ончо јӧӧжӧзине баш эдер.

⁴⁸ Је ол кул јаман болуп, ичинде: «Бийим бачым келбес» дейле,

⁴⁹ кул нӧкӧрлӧрин согуп, аракызактарла кожо ичип-јип база бергежин,

⁵⁰ ол кулдыҥ бийи сакыбаган кӱнде, сананбаган ӧйдӧ келер.

⁵¹ Оны бойынаҥ кезе чабар, оныҥ салымы эки јӱстӱлердиҥ салымындый болор. Анда ый ла тиш кыјырты болор.