Матфей 22 - Јаҥы Кереес

Той керегинде укаа сӧс

¹ Иисус олорго база бир укаа сӧс айтты:

² – Теҥери Каандыгы – уулына той эткен каан кижиге тӱҥей.

³ Ол айттырылган улусты тойго келзин деп, кулдарын ийген, је олор келбеске сананган.

⁴ База ӧскӧ кулдарын ийип, олорго мынайда айдыгар деген: «Бат, јиир ажымды јазадым, букаларым ла семирткен малым сойылды, ончо неме белен. Тойго келигер».

⁵ Је олор айттыруны керекке албай, кемизи кыразына, кемизи дезе садыжып јӱре берген.

⁶ Ӧскӧлӧри дезе, кулдарын тудуп, базынып электейле, ӧлтӱрип койгондор.

⁷ Каан чугулданган. Черӱчилдерин ийип, ӧлтӱреечилерди кырдырган, калазын ӧртӧткӧн.

⁸ Оноҥ кулдарына айткан: «Той белен, айттырылган улус дезе айттыруга турбас болды.

⁹ Јолдордыҥ белтирлерине барыгар, туштаган улусты ончозын тойго айттырыгар».

¹⁰ Байагы кулдар јолдор сайын барып, туштаган ла кижини, јаманын да, јакшызын да јууп экелгендер. Той болгон јерге улус толо берген.

¹¹ Каан келген улусты кӧрӧйин деп кирзе, анда тойдыҥ кийимин кийбеген бир кижи отурган.

¹² Айдарда, ого айткан: «Најы, тойдыҥ кийимин кийбей, бого канайып кирдиҥ?» Ол унчукпаган.

¹³ Ол тушта каан јалчыларына айткан: «Колы-будын кӱлийле, тыш караҥуйга таштагар. Анда ый ла тиш кыјырты болор».

¹⁴ Айттырылганы кӧп, је талдалганы ас.

Каганга калан тӧлӧйтӧни керегинде

¹⁵ Фарисейлер барып, Иисустыҥ сӧзинеҥ јик табар деп јӧптӧштилер.

¹⁶ Ого бойлорыныҥ ӱренчиктерин Иродтыҥ улузыла кожо ийдилер. Олор келип, айттылар: – Ӱредӱчи, Сениҥ чындык болгоныҥды, Кудайдыҥ јолына чын ӱредип турганыҥды билерис. Кижиге јакшы адым чыксын дебейдиҥ, улусты ылгабайдыҥ.

¹⁷ Айдарда, айт, биске, Сен не деп сананып туруҥ: Рим каганына калан тӧлӧӧргӧ јараар ба, эмезе јок по?

¹⁸ Је Иисус олордыҥ јаман сагыжын билип, айтты: – Мени не ченеп туругар, эки јӱстӱлер?

¹⁹ Каланга салар акчаны Меге кӧргӱзигер. Олор Ого динарий экелдилер.

²⁰ – Бу кемниҥ сӱри ле ады? – деп, олордоҥ сурады.

²¹ Олор: – Кагандыйы – дедилер. Айдарда, олорго айтты: – Андый болзо, кагандыйын каганга беригер, Кудайдыйын дезе, Кудайга.

²² Олор мыны угала, кайкадылар, Оны артырып, јӱре бердилер.

Тирилиш керегинде

²³ Ол кӱн Иисуска ӧлгӧндӧр тирилбес дежетен саддукейлер келип, сурадылар:

²⁴ – Ӱредӱчи, Моисей айткан эди: «Бала јок кижи ӧлгӧжин, оныҥ ӱйин карындажы алып, карындажыныҥ угын улалтсын».

²⁵ Бисте јети карындаш кижи болгон. Бирӱзи кижи алала, јада калган. Анда бала јок болуп, оныҥ ӱйин карындажы алган.

²⁶ Оныҥ кийнинде экинчизиле, ӱчинчизиле, јетилезиле андый ок болгон.

²⁷ Ончозыныҥ кийнинде ӱй кижи де јада калган.

²⁸ Эмди, айдарда, тирилгежин, ол бу јетӱниҥ кажызыныҥ ӱйи болор? Оны ончозы алган ине.

²⁹ – Агару бичиктерди, Кудайдыҥ кӱчин де билбей јадып, азып јадыгар – деп, Иисус олорго каруу јандырды. –

³⁰ Тирилгенде, кижи де албас, кижиге де барбас, је теҥеридеги ангелдердий јӱрер.

³¹ Ӧлгӧндӧр тирилер деп, слерге Кудайдыҥ айтканын кычырбаган бедигер?

³² «Мен Авраамныҥ Кудайы, Исаактыҥ Кудайы ла Иаковтыҥ Кудайы» – дегенди? Кудай – Ол ӧлгӧндӧрдиҥ Кудайы эмес, тирӱлердиҥ Кудайы.

³³ Улус мыны угала, Оныҥ ӱредӱзин кайкап турдылар.

Эҥ учурлу јакылта

³⁴ Фарисейлер дезе, Иисустыҥ саддукейлерди туйуктандырганын угала, јуулыжып келдилер.

³⁵ Олордыҥ бирӱзи, Јасактыҥ ӱредӱчизи, Оны ченеп, сурады:

³⁶ – Ӱредӱчи, Јасактагы јакылталардыҥ эҥ јааны кажызы?

³⁷ Иисус ого айтты: – «Кайраканды, сениҥ Кудайыҥды, бастыра јӱрегиҥле, бастыра јулаҥла, бастыра санааҥла сӱӱп јӱр».

³⁸ Јакылталардыҥ бажы, эҥ јааны ол.

³⁹ Ого тӱҥей экинчи јакылта бу: «Бойыҥды сӱӱгеҥдий, јуугыҥды сӱӱп јӱр».

⁴⁰ Бу эки јакылтага ончо Јасак ла јарлыкчылардыҥ бичигени тӧзӧлгӧн.

Христос кемниҥ уулы?

⁴¹ Фарисейлер јуулыжып келерде, Иисус олордоҥ сурады:

⁴² – Христос керегинде нени сананып туругар? Ол кемниҥ уулы? Олор: – Давидтиҥ – дедилер.

⁴³ Иисус айтты: – Андый болзо, Давид Тыннаҥ кӧдӱриҥи алып, Оны Кайракан деп адап, не керек мынайда айткан:

⁴⁴ «Кайракан Кайраканыма айткан: „Ӧштӱлериҥди будыҥныҥ алдына салып бербегенчем, оҥ јаныма отур“».

⁴⁵ Анайдарда, Давид Оны Кайракан деп адаганда, Ол канайып оныҥ уулы болотон?

⁴⁶ Бирӱзи де Иисуска сӧс тӧ айдып болбоды. Ол кӱннеҥ ала Ого сурак берерге кем де тидинбеди.