Матфей 20 - Јаҥы Кереес

Теҥ јал керегинде укаа сӧс

¹ Теҥери Каандыгы айылдыҥ ээзине тӱҥей. Ол тарыган виноградту садына ишчилер јалдайын деп, сары таҥда айлынаҥ чыккан.

² Кӱнине бир динарийдеҥ тӧлӧӧр болуп эрмектежеле, олорды садка ийген.

³ Тогус саат киреде чыгып, базарда иштебей, соодоп турган улусты кӧрӧлӧ,

⁴ олорго до айткан: «Слер де садыма барып иштегер. Ижигер учун тӧлӧп берейин». Олор барган.

⁵ Оноҥ он эки саат ла ӱч саат кирезинде чыгып, анайып ла эткен.

⁶ Беш саат кирезинде чыгып, база тегин турган улусты таап, олорго айткан: «Кере-тӱжине мында тегин не тургулараар?»

⁷ «Бисти кижи јалдабады» – дежерде, олорго айткан: «Слер де садыма барып иштегер. Ижигер учун аларыгар».

⁸ Эҥир кире берерде, виноградтыҥ ээзи айыл-јурттыҥ башкараачызына айткан: «Ишчилерди кычырып ал, кийнинде јалданганынаҥ баштайла, озо јалданганыла тӱгезип, јалын тӧлӧп бер».

⁹ Айдарда, беш саат кирезинде јалдангандары келип, бир динарийдеҥ алгандар.

¹⁰ Озо јалдангандары дезе олордоҥ кӧп аларыс деп санангандар. Је олор до бир динарийдеҥ алгандар.

¹¹ Акчазын алала, айылдыҥ ээзине тарынып, айткандар:

¹² «Бу кийнинде келген улус бир саат иштеген. Сен олорды кере-тӱжине кӱнге быжып иштеген биске теҥ эттиҥ».

¹³ Виноградтыҥ ээзи дезе олордыҥ бирӱзине каруу јандырган: «Најы, сени тарындырып турганым јок. Мениле бир динарийге эрмектешкен эмес бедиҥ?

¹⁴ Бойыҥдыйын алып, јан. Бу кийнинде келгенге сенийинче теҥ берейин.

¹⁵ Бойымдыйын канайып та этсем, мениҥ табым эмес беди? Эмезе мениҥ буурзагыма сениҥ кӧзиҥ кӱйӱнчек болды ба?»

¹⁶ Анайып, калганчылары баштапкылары болор, баштапкылары калганчылары болор. Айттырылганы кӧп, талдалганы ас.

Иисус ӧлӱмин ле тирилетенин озолодо айтканы

¹⁷ Иисус Иерусалим јаар чыгып барадала, јолой он эки ӱренчигин таҥынаҥ кычырып алып, айтты:

¹⁸ – Бат, Иерусалим јаар чыгып барадырыс. Кижи Уулы улу абыстар ла бичикчилердиҥ колына берилер. Оны ӧлтӱрер эдип јаргылап,

¹⁹ электедерге, соктырарга, кере тартырарга кара јаҥдуларга берип ийгилеер, је ӱчинчи кӱнде Ол тирилер.

Энениҥ сурагы

²⁰ Ол тушта Зеведейдиҥ уулдарыныҥ энези уулдарыла кожо базып келеле, Иисуска бажырып, Оноҥ нени де сурап турды.

²¹ – Сеге не керек? – деерде, ол айтты: – Сениҥ Каандыгыҥда бу эки уулымныҥ бирӱзи оҥ јаныҥа, бирӱзи сол јаныҥа отурзын деп айт.

²² – Нени сурап турганыгарды бойыгар билбей јадыгар – деп, Иисус каруу јандырды. – Мениҥ ичер айагымнаҥ ичип болороор бо? Ол эмезе Мениҥ тӱжер крезиме тӱжӱп болороор бо? Олор: – Болорыс – дедилер.

²³ Иисус олорго айтты: – Мениҥ айагымнаҥ ичерин ичеригер, Мениҥ тӱшкен крезиме тӱжеригер, је оҥ ло сол јаныма отургызар јаҥ Менде јок, кемге ол јерди Адам белетеген, ол кижи отурар.

²⁴ Арткан он ӱренчик мыны угала, бу эки карындашка чугулданды.

²⁵ Иисус дезе олорды кычырып алып, айтты: – Кудайга бӱтпес калыктар ортодо башчылар олорды башкаратанын, јаҥда тургандар олорды бийлейтенин билеригер.

²⁶ Је ортогордо андый болбозын. Ортогордо улу болойын дегенигер, слерге јалчы болзын.

²⁷ Ортогордо баштапкы болойын дегенигер, слерге кул болзын.

²⁸ Анайып ок Кижи Уулы улусты Ого јалчы болзын деп эмес, улуска јалчы болойын деп, кӧп улус учун Бойыныҥ јӱрӱмин берейин деп келген.

Эки сокорды јасканы

²⁹ Олор Иерихонноҥ чыгып јадарда, Иисусты ээчий кӧп улус барган.

³⁰ Је бат, јол кырында отурган эки сокор, јаныла Иисус ӧдӱп јатканын угала, кыйгырыжа бердилер: – Кайракан, Давид Уулы! Биске буурза!

³¹ Улус олорды унчуктырбаста, олор там тыҥыда кыйгырып турдылар: – Кайракан, Давид Уулы! Биске буурза!

³² Иисус токтой тӱшти, олорды кычырып алып, айтты: – Мени слерге нени этсин деп туругар?

³³ Олор: – Кайракан, кӧзибис јарызын деп турубыс! – дедилер.

³⁴ Иисус олорго буурзап, кӧстӧрине тийди, бу тарый олордыҥ кӧстӧри јарып, Оны ээчий бастылар.