Матфей 17 - Јаҥы Кереес

Иисус Христостыҥ кубулганы

¹ Алты кӱнниҥ бажында Иисус јӱк ле Петрды, Иаковты ла оныҥ Иоанн карындажын алганча, бийик кырга чыгала,

² олордыҥ алдына кубулды: чырайы кӱндий јаркындалды, кийими дезе јарыктый ак болды.

³ Је бат, Моисей ле Илия Оныла эрмектежип турганы олорго кӧрӱнип турды.

⁴ Петр Иисуска айтты: – Кайракан, биске мында макалу! Кӱӱниҥ бар болзо, бого ӱч чадыр тудалы: бирӱзин Сеге, бирӱзин Моисейге, бирӱзин Илияга.

⁵ Ол мынайып айдып турганча, олорды јаркынду булут кӧлӧткӧлӧп, булуттаҥ эрмектенген ӱн угулды: – Бу Мениҥ сӱӱген Уулым, Оныҥ Бойында Мениҥ јакшылыкту табым. Оны угугар!

⁶ Ӱренчиктер мыны угала, сӱрекей коркып, кӧҥкӧрӧ јыгылдылар.

⁷ Иисус јууктай базып келеле, олорго тийип, – Туругар, коркыбагар – деди.

⁸ Ӱренчиктер ӧрӧ кӧрӧрдӧ, Иисустаҥ ӧскӧ кижи јок эмтир.

⁹ Олор кырдаҥ тӱжӱп келедерде, Иисус олорго јакарып, айтты: – Кижи Уулы тирилбегенче, бу кӧргӧнӧӧрди кижиге айтпагар.

¹⁰ Ӱренчиктери Оноҥ сурадылар: – Озо Илия келер учурлу деп, бичикчилер не керек анайда айдыжат?

¹¹ – Илия озо келеле, ончозын белетеп койотоны, чын – деп, Иисус каруу јандырды. –

¹² Је айдып турум слерге: Илия келип јӱрген эди, је оны таныбагандар, оныла бойлорыныҥ табына салдырып эткендер. Анайып Кижи Уулы да олорго кыйнаттырар.

¹³ Айдарда, Иисус олорго Крестеечи Иоанн керегинде айтканын билип алдылар.

Ӧзӧк-буурында шилемирлӱ уулчакты јасканы

¹⁴ Олор улуска тӱжӱп келерде, Иисуска бир кижи јууктап, Оныҥ алдына тизеленип,

¹⁵ айтты: – Кайракан, уулыма буурза! Ол улаарып, тыҥ кыйналып, улам ла отко, улам ла сууга калып турат.

¹⁶ Оны ӱренчиктериҥе экелген болгом, је олор јазып болбодылар.

¹⁷ Иисус дезе каруу јандырып, айтты: – Э-э, бӱтпес, балыр ӱйе! Слерле кожо канчазын јӱрейин? Слерге канчазын чыдажайын? Оны Меге бери экелигер.

¹⁸ Иисус шилемирге јакарып ийерде, ол чыга конды, уулчак бу тарый јазыла берди.

¹⁹ Ӱренчиктери Иисуска јаҥыс бойлоры базып келеле, сурадылар: – Бис оны нениҥ учун чыгара сӱрӱп болбогоныс?

²⁰ – Бӱтпей турганыгар учун – деп, Иисус каруу јандырды. – Чынын айдадым слерге: Бӱдӱмјигер горчицаныҥ ӱренинче болуп, бу кырды мынаҥ кӧчӱп бар дезегер, ол кӧчӱп барар. Слердиҥ эдип албазыгар јок болор.

²¹ Бу шилемирлер јаҥыс мӱргизе ле орозо тутса чыгара сӱрӱлер.

²² Олор Галилей јеринде јӱрген тужында Иисус олорго айтты: – Кижи Уулы улустыҥ колына берилер.

²³ Оны ӧлтӱргилеп койор, ӱчинчи кӱнде Ол тирилер. Ӱренчиктер мыны угала, ал-санаага тӱштилер.

Байзыҥга калан

²⁴ Олор Капернаумга келерде, байзыҥга калан јуучылар Петрга базып келип, – Ӱредӱчигер эки драхма бергей не? – деп сурадылар.

²⁵ Петр: – Эйе – деди. Ол ӱйге кирерде, Иисус озо эрмектенип, айтты: – Симон, не деп сананып туруҥ? Јердиҥ каандары каланды кемнеҥ алып јат: бойыныҥ уулдарынаҥ ба, эмезе туш улустаҥ ба?

²⁶ Петр: – Туш улустаҥ – деди. Иисус айтты: – Анайдарда, бойыныҥ уулдары каланнаҥ јайым.

²⁷ Је олорды ӧӧркӧтпӧскӧ, талайга барып кармакта. Кармакка озо илинген балыкты алып, оозын ачып, статир акча табарыҥ. Оны чыгарып, Мениҥ учун, бойыҥныҥ учун олорго бер.