Матфей 14 - Јаҥы Кереес

Крестеечи Иоанныҥ ӧлӱми

¹ Ол тушта тӧрт тӧчинниҥ бирӱзин башкарган Ирод, Иисус керегинде табышты угала,

² јалчыларына айтты: – Бу Крестеечи Иоанн болор. Ол тирилген, оныҥ учун ол кайкалдар эдет.

³ Башкыда Ирод бойыныҥ Филипп деп карындажыныҥ абакайы болгон Иродиада учун Иоаннды кижендейле, тӱрмелеп койгон,

⁴ нениҥ учун дезе Иоанн ого айдып туратан: «Сеге оны аларга јарабас».

⁵ Ирод Иоаннды ӧлтӱрерге сананган, је оны ончозы јарлыкчы деп турарда, калыктаҥ коркып, ӧлтӱрбей турган.

⁶ Иродтыҥ чыккан кӱнинде Иродиаданыҥ кызы, јуулган улус алдында бијелеп, Иродко јараган.

⁷ Оныҥ учун нени ле сураза, ого Ирод берер болуп чертенген.

⁸ Кыс дезе энезиниҥ ӱреткениле айткан: «Бого ло, Крестеечи Иоанныҥ бажын табакка салып, меге бер».

⁹ Каан кунуга берген, је чертине ле кожо кыйын отурган улуска болуп, башты беригер – деген.

¹⁰ Тӱрмеде Иоанныҥ бажын кезе чапсын деп, улус ийген.

¹¹ Оныҥ бажын табакка салала экелип, кыска табыштыргандар, кыс дезе энезине апарып берген.

¹² Иоанныҥ ӱренчиктери келеле, оныҥ сӧӧгин алып, јууп койгондор. Оноҥ Иисуска барып, тил јетиргендер.

Беш муҥ кижини тойдырганы

¹³ Иисус не болгонын угала, кемеге отурып, јаҥыскан јӱрерге, аалга јер јаар јӱсти. Је улус мыны угала, калаларынаҥ Оны ээчий јойу барды.

¹⁴ Иисус јаратка чыгып, кӧп улусты кӧрӧлӧ, олорго ичи ачыды, оору-јоболдуларын јасты.

¹⁵ Эҥир кире берерде, ӱренчиктер Ого базып келеле, айттылар: – Бу аалга јер эди, оноҥ ӧй дӧ орой. Улусты божодып ий, јурттарга барып, бойлорына курсак садып алзын.

¹⁶ Је Иисус олорго айтты: – Олордыҥ баратан кереги јок. Слер олорды азырагар.

¹⁷ – Мында бисте јӱк ле беш болчок калаш ла эки болчок балык – деп, ӱренчиктер каруу јандырдылар.

¹⁸ – Олорды бери Меге экелигер – деп, Ол айтты.

¹⁹ Улусты ӧлӧҥгӧ кыйын отурзын дейле, беш болчок калаш ла эки болчок балык алып, теҥери ӧрӧ кӧрӱп алкады. Калашты сындырып, ӱренчиктерине берди, олор дезе, – улуска.

²⁰ Ончозы јиди, тойды. Јигениниҥ арткан-калганын он эки каламага толтыра јууп алдылар.

²¹ Курсак јигени дезе, ӱй улустаҥ ла балдардаҥ башка, беш муҥ кире эр кижи болгон.

Сууныҥ ӱстиле басканы

²² Бу тарый Иисус ӱренчиктерге: – Улусты јандырганчам, кемеге отурып, ол јанына Менеҥ озо кечигер – деди.

²³ Улусты божодып ийеле, Ол јаҥыскандыра мӱргийин деп, кырга чыкты. Эҥирде анда јаҥыскан јӱрди.

²⁴ Кеме дезе талайдыҥ тал ортозына једеле, терс салкын тӱжерде, толкуга соктырган.

²⁵ Таҥ алдында Иисус ӱренчиктери јаар талайдыҥ ӱстиле базып ийди.

²⁶ Оныҥ талайла базып келеткенин кӧрӧлӧ, ӱренчиктер тӱймеп, – Бу сӱне! – деп, кыйгырыжа бердилер.

²⁷ Иисус дезе ол тарый эрмектенип, олорго айтты: – Јалтанбагар, бу Мен, коркыбагар.

²⁸ Петр дезе Ого айтты: – Кайракан! Бу Сен болзоҥ, Сеге сууныҥ ӱстиле базып барзын деп, меге јакар.

²⁹ Иисус: – Кел – деди. Петр кемедеҥ чыгып, Иисуска једерге, сууныҥ ӱстиле базып ийди.

³⁰ Је тыҥ салкын согуп турганын кӧрӧлӧ, коркый берди, сууга чӧҥӱп, кыйгырды: – Кайракан, мени аргадазаҥ!

³¹ Иисус ол тарый колын сунуп, оны чыгара тартып, айтты: – Ас бӱдеечи кижи, не эреҥистелдиҥ?

³² Олор кемеге кирерде, салкын токтой берди.

³³ Кемеде отургандар Ого бажырып, айттылар: – Чын, Сен Кудайдыҥ Уулы.

Геннисаретте оору улусты јасканы

³⁴ Кечип чыгала, Геннисарет деп јерге келдилер.

³⁵ Ол јердиҥ улузы Иисусты таныйла, эбире турган јурттар сайын улус ийдилер. Олор Ого ончо оору улусты экелип,

³⁶ эдегиҥе де болзо тийзин деп, сурай бердилер. Тийгендери дезе јазылып турдылар.