Матфей 13 - Јаҥы Кереес

Аш ӱрендеечи керегинде укаа сӧс

¹ Ол кӱн Иисус ӱйдеҥ чыгып, талайдыҥ јаказына барып, анда отурган.

² Ого кӧп улус јуулыжып келерде, кемеге кирип, отурды, улус дезе ончозы јаратта тура калды.

³ Кӧп немелер керегинде олорго укаа сӧстӧр айтты. – Бат, ӱрендеечи ӱрендеерге чыккан – деди. –

⁴ Ол ӱрендеп турарда, ӱренниҥ кезиги јолдыҥ кырына тӱшкен. Куштар учуп келеле, олорды чокып салган.

⁵ Кезиги тобрагы ас ташту јерге тӱшкен. Тобрагы калыҥ эмес болгондо, саадабай кылгазы ӧзӱп чыккан.

⁶ Кӱн чыгарда, оҥуп, тазыл јок болгон учун кургап калган.

⁷ Кезиги тегенектӱ јерге тӱшкен. Тегенек ӧзӱп, оны туй базып койгон.

⁸ Кезиги јакшы јерге тӱжӱп, ӱренделгенине кӧрӧ, бирӱзи јӱс, кажызы алтан, кезиги дезе одус катап кӧп тӱжӱм берген.

⁹ Кулакту кижи уксын!

Иисус нениҥ учун укаалап айдат?

¹⁰ Ӱренчиктер базып келеле, Иисустаҥ сурадылар: – Олорго не керек укаалап айдадыҥ?

¹¹ – Слерге Теҥери Каандыгыныҥ јажыттарын билери берилген, олорго дезе берилбеген учун – деп, Ол каруу јандырды. –

¹² Кемде бар, ого берилер, ӱзеери кожулар; кемде дезе јок, оныҥ бар болгоны да айрылар.

¹³ Олор кӧрзӧ дӧ, кӧрбӧйдилер, укса да, укпайдылар, аайлабайдылар. Оныҥ учун олорго укаалап айдып турганым ол.

¹⁴ Анайып, олор керегинде Исаия деген јарлыкчыныҥ айтканы бӱдӱп јат. Ол айткан: «Кулактараарла угарыгар, је аайлабазыгар; кӧстӧрӧӧрлӧ кӧрӧригер, је кӧрбӧй каларыгар.

¹⁵ Бу улустыҥ јӱреги јууга туттурган, кулактарыла јӱк арайдаҥ угат, кӧстӧрин де јумуп алган, оныҥ учун кӧстӧриле кӧрбӧйт, кулактарыла укпайт, кӧгӱстериле аайлабайт, Меге де баштанбайт, Мен олорды јазар эдим».

¹⁶ Кӧстӧригер кӧрӱп турган учун кежиктӱ, кулактарыгар угуп турган учун кежиктӱ.

¹⁷ Чынын айдадым слерге: кӧп јарлыкчылар ла актулар кӧрӱп јӱргенеерди кӧрӧйин дейле, кӧрбӧгӧн, угуп јӱргенеерди угайын дейле, угуп болбогон.

Ӱрендеечи керегинде укааныҥ учуры

¹⁸ Анайдарда, ӱрендеечи керегинде укаа сӧстиҥ учурын угугар.

¹⁹ Каандык керегинде сӧсти угарын угуп, је оны аайлабай турган кижиге кӧрмӧс келип, кӧксинде ӱренделгенди айрып апарар. Јол кырына ӱренделген дегени бу болор.

²⁰ Ташту јерге ӱренделген дегени, мындый кижи керегинде айтканы: ол айткан сӧсти угуп, бу тарый сӱӱнип, кӧксине алынат.

²¹ Је ол бойында тазыл јок, турумкай эмес. Сӧс учун ачу келгежин эмезе истежӱ болгожын, бу тарый јана тӱжет.

²² Тегенектӱ јерге ӱренделген дегени, сӧсти уккан кижи керегинде айтканы. Је јадынды кичеейтени, јӧӧжӧгӧ тартылатаны уккан сӧсти туй базып койот, ол сӧс тӱжӱм јок артып калат.

²³ Јакшы јерге ӱренделген дегени, сӧсти угуп, аайлап турган кижи керегинде айтканы. Андый кижиниҥ ӱрени тӱжӱмдӱ болуп, ӱренделгенине кӧрӧ бирӱзи јӱс, кажызы алтан, кезиги дезе одус катап кӧп тӱжӱм берет.

Теҥери Каандыгы керегинде укаа сӧстӧр

²⁴ Иисус олорго база бир укаа сӧс айтты: – Теҥери Каандыгы бого тӱҥей: бир кижи кыразына јакшы ӱрен ӱрендеген.

²⁵ Улус уйуктап јадарда, оныҥ ӧштӱзи келип, буудайга от ӧлӧҥ колыштыра ӱрендейле, јӱре берген.

²⁶ Аштыҥ кылгазы чыгып, аш быжарда, от ӧлӧҥ дӧ кӧрӱнип келген.

²⁷ Ээзиниҥ кулдары ого келип, айткан: «Бийибис, кырага јакшы ӱрен салган јокпоҥ, анда от ӧлӧҥ кайдаҥ келди?»

²⁸ «Оны ӧштӱ эткен» – деп, ээзи каруу јандырган. Айдарда, кулдары: «Барып, оны одойлы ба?» – дегендер.

²⁹ Је ээзи айткан: «Бойсын, одоп турзагар, кожо буудайы јулулбазын.

³⁰ Аш кезер ӧйгӧ јетире кажызы ла кожо ӧзӱп тургай. Аш кезер ӧйинде ишчилериме айдарым: „Озо баштап от ӧлӧҥди јууп, ӧртӧӧргӧ буулам эдип буулагар, буудайын дезе алмарыма јууп салыгар“».

³¹ Иисус олорго база бир укаа сӧс айтты: – Теҥери Каандыгы горчицаныҥ ӱренине тӱҥей. Оны кижи алып, кыразына ӱрендеп койгон.

³² Ол ончо ӱрендердеҥ оок то болзо, је ӧзӱп, бӱткен тужында, кандый ла маала ажынаҥ бийиктеп, агашка теҥ болот, теҥериниҥ куштары учуп келип, будактарына уйа тартат.

³³ Иисус олорго база бир укаа сӧс айтты: – Теҥери Каандыгы ачыткыга тӱҥей. Оны ӱй кижи алып, ӱч кемјӱ кулурга саларда, ончо тесте кӧдӱрилип калган.

³⁴ Иисус мыны ончозын улуска укаалап айткан, укаалабай неме айтпас болгон.

³⁵ Јарлыкчы ажыра айдылганы бӱтсин деп, мынайда болгоны бу. Ол айткан: «Оозым ачып, укаалап айдарым, телекей јайалганынаҥ ала јажыт болгонды јарлаарым».

³⁶ Иисус улусты божодып ийеле, ӱйге кирди. Ӱренчиктери Ого базып келеле, айттылар: – Кырадагы от ӧлӧҥ керегинде укаа сӧсти биске јартап берзеҥ.

³⁷ Иисус каруу јандырды: – Јакшы ӱрен ӱрендеп турганы – Кижи Уулы.

³⁸ Кыра – бу телекей. Јакшы ӱрен – Каандыктыҥ уулдары. От ӧлӧҥ – кӧрмӧстиҥ уулдары,

³⁹ оны ӱрендеген ӧштӱ дезе – кӧрмӧс. Аш кезер ӧй – калганчы чак, аш кезеечилер дезе – ангелдер.

⁴⁰ Оныҥ учун от ӧлӧҥди јууп алып, отко ӧртӧгӧндий, калганчы чакта андый болор.

⁴¹ Кижи Уулы ангелдерин ийер, олор Оныҥ Каандыгынаҥ кинчекке тартар кандый ла немелерди, јаман кылынып јӱргендерди јууп алып,

⁴² отту печкеге таштаар. Анда ый ла тиш кыјырты болор.

⁴³ Ол тушта актулар Адазыныҥ Каандыгында кӱн кептӱ јаркындалар. Кулакту кижи уксын!

⁴⁴ Теҥери Каандыгы јалаҥда сугуп койгон јӧӧжӧгӧ тӱҥей. Оны кижи табала, кӧмӱп койгон, сӱӱнген бойынча барып, не барын садып ийип, байагы јалаҥды садып алган.

⁴⁵ Анайда ок Теҥери Каандыгы јакшы эрјине бедиреп јӱрген којойымга тӱҥей.

⁴⁶ Ол бир баалу эрјине табала, барып, не барын садып ийип, байагы эрјинени садып алган.

⁴⁷ Теҥери Каандыгы шӱӱнге база тӱҥей. Ол шӱӱн талайга ташталарда, јӱзӱн-јӱӱр балык тудылган.

⁴⁸ Шӱӱнге балык толордо, оны јаратка чыгарып, отурып алып, балыктыҥ јакшызын каламага салгандар, јаманын дезе кеде таштап ийгендер.

⁴⁹ Калганчы чакта андый ок болор: ангелдер чыгып, јаман улусты актулардаҥ айрып,

⁵⁰ отту печкеге таштаар. Анда ый ла тиш кыјырты болор.

⁵¹ Мыныҥ ончозын аайладаар ба? Олор: – Эйе, – дедилер.

⁵² Иисус олорго айтты: – Оныҥ учун Теҥери Каандыгыныҥ ӱренчиги боло берген кажы ла бичикчи кижи јӧӧжӧлӱ јеринеҥ јаҥызын да, эскизин де чыгарып турган айыл ээзине тӱҥей.

Назареттиҥ улузы Иисусты јектегени

⁵³ Иисус бу укаа сӧстӧрин айдып божойло, оноортынаҥ јӱре берди.

⁵⁴ Бойыныҥ алтайына келеле, синагогада улус ӱретти. Олор кайкажып, айдыжып турдылар: – Оныҥ мындый ойгор санаазы ла кӱчи кайдаҥ келген болотон?

⁵⁵ Ол агашла узанардыҥ уулы эмес беди? Энезиниҥ ады Мария дезеер? Иаков ло Иосий, Симон ло Иуда оныҥ карындаштары беди?

⁵⁶ Оныҥ ончо эје-сыйындары ортобыста јок беди? Бу ончозы Ого кайдаҥ келген?

⁵⁷ Анайып Ого бӱтпей, Оны јуутпай тургандар. Иисус дезе олорго айтты: – Јарлыкчы кӱндӱзи јок болбойтон, оны јаҥыс алтайында ла айлындагы улузы тообойтон.

⁵⁸ Олордыҥ бӱтпей турганынаҥ улам анда кӧп кайкал этпеди.