Матфей 12 - Јаҥы Кереес

Христос ло суббот кӱн

¹ Ол ӧйдӧ суббот кӱнде Иисус аш салган кыраны кечире барып јаткан. Ӱренчиктери дезе аштайла, аштыҥ мажагын ӱзӱп, јип тургандар.

² Фарисейлер мыны кӧрӧлӧ, Ого айттылар: – Кӧр, ӱренчиктериҥ суббот кӱнде этпести эдип јат.

³ Иисус дезе олорго айтты: – Давид кожо јӱргендериле аштайла, нени эткен эди, кычырбаган бедигер?

⁴ Канайып ол Кудайдыҥ байзыҥына киреле, јаҥыс абыстар јийтен, ол до, кожо јӱргендери де јиирге јарабас ыйык калашты алып јигенин?

⁵ База, суббот кӱнде абыстар байзыҥда иштеп, субботтыҥ байын бусса да, бурулу эмес дегенин, Јасактаҥ кычырбаган бедигер?

⁶ Је айдып турум слерге: алдыгарда турганы – Ол байзыҥнаҥ јаан.

⁷ Буурзаш кӱӱнзеп јадым, тайылга кӱӱнзеп турган эмезим деген сӧс бар. Оныҥ учурын билген болзогор, бурулу эместерди бурулабас эдигер.

⁸ Кижи Уулы дезе суббот то кӱнниҥ бийи.

Иисус суббот кӱнде улус јазат

⁹ Оноортынаҥ келеле, Иисус олордыҥ синагогазына кирди.

¹⁰ Анда колы кургап калган кижи болгон. Иисусты бурулаарга, Оноҥ сурадылар: – Суббот кӱнде ооруны јазарга јараар ба?

¹¹ Иисус дезе олорго: – Кажы бирӱгердиҥ сок јаҥыс койы суббот кӱнде орого тӱшсе, ол оны чыгарып албас беди?

¹² Кижи дезе койдоҥ канча кире артык! Оныҥ учун суббот кӱнде јакшыны эдерге јараар – дейле,

¹³ байагы кижиге баштанды: – Колыҥды сунуп ий. Ол сунды, колы база бирӱзиндий су-кадык боло берди.

¹⁴ Фарисейлер чыгала, канайтсабыс Иисусты ӧлтӱрерис деп, Ого удура јӧп чыгардылар.

¹⁵ Је Иисус мыны билип, оноортынаҥ јӱре берди. Иисустыҥ кийнинеҥ кӧп улус барды, Ол ончозын јасты,

Талдап алган Јалчы

¹⁶ је Бойы кем болгонын јарлабазын деп јакарды.

¹⁷ Исаия деген јарлыкчыныҥ айтканы бӱтсин деп, мынайда болгоны бу. Ол айткан:

¹⁸ «Бат, талдап алган Јалчым бу, Мениҥ сӱӱгеним, јуламныҥ сӱӱнчизи. Ого Тынымды берерим, Ол калыктарга јаргы јарлаар.

^19-20 Чындыкты јеҥӱге экелбегенче, Ол сӧс блаашпас, кыйгы чыгарбас, Оныҥ ӱнин оромдордо кем де укпас; сыныкту кулузынды сындырбас, буруксып јаткан кӱделини ӧчӱрбес.

²¹ Ого калыктар иженер».

Агару Тын эмезе веельзевул

²² Иисуска ӧзӧк-буурында шилемирлӱ сокор ло тил јок кижини экелдилер. Иисус оны јазып ийерде, ол эрмектенер ле кӧрӧр боло берди.

²³ Ончо улус алаҥ кайкап, – Бу Давид Уулы Христос болор бо? – дешти.

²⁴ Фарисейлер дезе мыны угала, айттылар: – Ол шилемирлерди шилемир бийи веельзевулдыҥ кӱчиле чыгара сӱрӱп турбай.

²⁵ Је Иисус олордыҥ санаазын билип, айтты: – Бойынаҥ бойы бӧлинишкен кандый ла каандык ээн калар; бойынаҥ бойы бӧлӱнишкен кандый да кала эмезе јурт чыдажып туруп болбос.

²⁶ Сатана сатананы чыгара сӱрӱп турган болзо, ол бойынаҥ бойы бӧлӱнген. Оныҥ каандыгы канайып чыдажып турар?

²⁷ Веельзевулдыҥ кӱчиле шилемирлерди чыгара сӱрӱп турган болзом, слердиҥ уулдарыгар кемниҥ кӱчиле чыгара сӱрӱп јат? Оныҥ учун олор слерге јаргычылар болор.

²⁸ Је шилемирлерди чыгара сӱрӱп турганым Кудайдыҥ Тынынаҥ болзо, слерге Кудайдыҥ Каандыгы јеткени ол туру.

²⁹ Кӱчтӱ кижиниҥ айлына киргени, оны кӱлӱбегенче, оныҥ јӧӧжӧзин канайып тоноор? Озо баштап кӱлӱзе, ол тушта айлын тоноор.

³⁰ Мениле кожо эмес кижи, Меге удура болгоны ол. Мениле кожо јуубаганы, кородып турганы ол.

³¹ Оныҥ учун айдып турум слерге: кижиниҥ кандый ла кинчеги, канайып та јамандап айтканы ташталар, Тынды јамандаганы дезе, ташталбас.

³² Кижи Уулына удура сӧс айтканы ташталар, је Агару Тынды јамандап айтканы бу да чакта, келер де ӧйлӧрдӧ ташталбас.

³³ Агаштыҥ бойын јакшы дезегер, јиилегин де јакшы дегер, агаштыҥ бойын јаман дезегер, јиилегин де јаман дегер: агаш јиилегинеҥ танылу.

³⁴ Јыланныҥ ач-ӱрени! Јаман ичтӱ бойыгар, јакшы айдар бедигер? Кижиниҥ јӱреги неле толо, оозынаҥ чыгары ол ине.

³⁵ Јакшы кижи јакшыны чеберлеген јеринеҥ јакшызын алып чыгар, јаман кижи дезе јаманды чеберлеген јеринеҥ јаманын алып чыгар.

³⁶ Айдып турум слерге: кижи кажы ла кей-куру сӧзи учун Јаргы болор кӱнде каруузына турар.

³⁷ Сӧзиҥле акталарыҥ, сӧзиҥле ок јаргыладарыҥ.

Иона јарлыкчыла болгон билди

³⁸ Ол тушта бичикчилер ле фарисейлердиҥ кезиги Иисуска айттылар: – Ӱредӱчи, Сенеҥ билди кӧрӧргӧ турубыс.

³⁹ Је Иисус олорго каруу јандырды: – Кал, чайдам ӱйе билди кӧрӧйин деп туру, је Иона јарлыкчыныҥ билдизинеҥ башка, ого билди берилбес.

⁴⁰ Иона кер-балыктыҥ ичинде ӱч тӱш ле ӱч тӱн јӱрген чилеп, Кижи Уулы да јердиҥ јӱрегинде ӱч тӱш ле ӱч тӱн јӱрер.

⁴¹ Ниневияныҥ улузы Јаргы болор кӱнде бу ӱйениҥ улузыла кожо туруп, олорды бурулаар. Олор Ионаныҥ јарлыктаганын угала, кинчегин алынып, Кудайга баштанган эдилер. Је бат, мында Турганы Ионадаҥ јаан.

⁴² Тӱштӱктиҥ абакай-кааны Јаргы болор кӱнде бу ӱйениҥ улузыла кожо туруп, олорды бурулаар: ол Соломонныҥ ойгор сӧзин угайын деп, јака јердеҥ келип јӱрген эди. Је бат, мында Турганы Соломонноҥ јаан.

Кара јелбистиҥ кайра бурылатаны

⁴³ Кара јелбис кижиниҥ ӧзӧк-буурынаҥ чыкканда, токунал бедиреп, суу јок јерлерде тенип јӱрет. Таппай салала,

⁴⁴ «Чыгып барган айлыма бурылатам» – дейле, барып кӧрзӧ, айлы бош, јалмалган, јуунадылган болот.

⁴⁵ Барып, бойынаҥ јаман ӧскӧ јети јелбис ээчиткенче келет, кирип, анда јуртай бергилейт. Байагы кижиге мынызы башкызынаҥ коомой болор. Бу кал ӱйениҥ улузыла база андый болор.

Иисустыҥ энези ле карындаштары

⁴⁶ Иисус улуска айдып турганча, энези ле карындаштары Оныла эрмектежерге, тышкары тургандар.

⁴⁷ Бир кижи Ого айтты: «Энеҥ ле карындаштарыҥ Сениле эрмектежерге, тышкары тургулары».

⁴⁸ Је Иисус ол кижиге: – Энем кем, карындаштарым кемдер? – дейле,

⁴⁹ ӱренчиктери јаар колыла уулап, айтты: – Бат, Мениҥ энем, Мениҥ карындаштарым бу.

⁵⁰ Теҥеридеги Адамныҥ табын бӱдӱрип јӱргени, Мениҥ карындажым да, эје-сыйыным да, энем де.