Марк 9 - Јаҥы Кереес

Иисус Христостыҥ кубулганы

¹ Иисус оноҥ айтты: – Чынын айдадым слерге: мында тургандардыҥ кезиги Кудайдыҥ Каандыгы бойыныҥ кӱчиле једип келгенин кӧрбӧгӧнчӧ ӧлбӧс.

² Алты кӱнниҥ бажында Иисус јӱк ле Петрды, Иаковты, оноҥ Иоаннды бийик кырга чыгарала, олордыҥ алдына кубулды.

³ Оныҥ кийими мызылдап, јер ӱстинде бир де кийим агартаачы анайып агартып болбогодый, кӧс кылбыгар апагаш болды.

⁴ Олорго Моисей ле Илия кӧрӱнип, Иисусла эрмектежип турдылар.

⁵ Петр Иисуска айтты: – Ӱредӱчи! Биске мында макалу. Ӱч чадыр тудалыктар: бирӱзин Сеге, бирӱзин Моисейге, бирӱзин Илияга.

⁶ Петр нени айдарын билбей турган, нениҥ учун дезе ол бойы, оноҥ ӧскӧ эки ӱренчик коркып калган тургандар.

⁷ Булут чыгып, олорды кӧлӧткӧлӧп ийди, булуттаҥ ӱн угулды: – Бу Мениҥ сӱӱген Уулым. Оны угыгар!

⁸ Кенетийин эбире кӧрзӧ, Иисустаҥ ӧскӧ олорло кожо кижи јок эмтир.

⁹ Кырдаҥ тӱжӱп келедерде, Иисус олорго бу кӧргӧндӧрин Кижи Уулы тирилбегенче кижиге айтпазын деп јакарды.

¹⁰ Олор бу сӧсти кӧксине алынып, «Тирилер дегени не атасы?» – дежип,

¹¹ Иисустаҥ сурадылар: – Бичикчилер не керек озолоп Илия келер учурлу дешкилейт?

¹² Ол каруу јандырды: – Илия озо келеле, ончозын белетеп койотоны чын. Је нениҥ учун Кижи Уулы керегинде Ол кӧп кыйнаттырып, базындырар учурлу деп бичилген?

¹³ Айдып турум слерге: Илия келип јӱрген, је улус бойыныҥ табына салдырып, бичилгени аайынча эткендер.

Кара јелбиске туттурган уулчакты јасканы

¹⁴ Арткан ӱренчиктерге тӱжӱп келеле, олорды эбире кӧп улус јуулганын, олорло бичикчилер сӧс блаажып турганын кӧрдилер.

¹⁵ Бу тарый ончо улус Иисусты кӧрӧлӧ, алаҥ кайкап, јӱгӱрижип келеле, Оныла эзендежип турдылар.

¹⁶ Ол ӱренчиктеринеҥ сурады: – Буларла не деп сӧс блаажып туругар?

¹⁷ Улус ортодоҥ бир кижи айтты: – Ӱредӱчи! Сеге тил јок јелбиске туттырган уулчагымды экелдим.

¹⁸ Јелбис ого кайда ла табарып, јерге чачканда, уулчактыҥ оозынаҥ кӧбӱк ажынып, тижин кыјырадып турала, тала берет. Јелбисти чыгарып ийзин деп, ӱренчиктериҥди сурагам, је олор болуп албады.

¹⁹ Иисус: «Э-э, бӱтпес ӱйе! – деди. – Слерле кожо канчазын јӱрейин? Слерге канчазын чыдажайын? Оны Меге экелигер».

²⁰ Уулчакты Ого экелдилер. Јелбис Иисусты кӧргӧн бойынча, уулчакты курултты, онызы јерге јыгылып, оозыныҥ кӧбӱги ажынып, тоголоно берди.

²¹ Иисус оныҥ адазынаҥ: «Оныла мындый болгоны удаган ба?» – деп сураарда, ол: «Јаштаҥ ала – деди. –

²² Јелбис оны ӧлтӱрейин деп, отко до, сууга да улам сайын таштаган. Је нени-нени эдер аргалу болзоҥ, биске буурзап, болушсаҥ?»

²³ Иисус дезе ого айтты: – «Аргалу болзоҥ» дегени не? Бӱдӱп турган кижиниҥ эдип албазы јок.

²⁴ Бу тарый уулчактыҥ адазы кӧстӧри јашталып, кыйгырып айтты: – Бӱдӱп турум, меге бӱдерге болуш!

²⁵ Улустыҥ јӱгӱрӱже јуулыжып келеткенин кӧрӧлӧ, Иисус кара јелбиске јакарды: – Тил јок, ӱскер јелбис, јакарып турум сеге: уулчактаҥ чык, ого такып кирбе!

²⁶ Јелбис кыйгырып, уулчакты тыҥ курултып, чыга конды. Уулчак ӧлгӧндий јатты, кӧп улус оны ӧлгӧн дештилер.

²⁷ Је Иисус оны колынаҥ тудуп тургузарда, ол туруп келди.

²⁸ Иисус ӱйге кирерде, ӱренчиктери туура улус јогынаҥ Оноҥ сурадылар: – Бис оны нениҥ учун чыгара сӱрӱп болбодыс?

²⁹ Иисус олорго айтты: – Бу шилемирлер јаҥыс мӱргизе, оноҥ орозо тутса чыгара сӱрӱлер.

³⁰ Оноортынаҥ чыгала, Галилей ичиле ӧдӱп бараткандар. Иисус бу керегинде кижи билбезин деп кӱӱнзеген,

³¹ нениҥ учун дезе, ӱренчиктерин ӱредип, айдып јӱрген: – Кижи Уулы улустыҥ колына берилер, Оны ӧлтӱргилеп койор, ӧлтӱрилген кийнинде дезе, ӱч кӱнниҥ бажында тирилер.

³² Је олор бу сӧстӧрди аайлабадылар. Оноҥ сурап угарга дезе, коркып тургандар.

Јааны кемизи?

³³ Капернаумга келдилер. Ӱйде тужында Иисус олордоҥ сурады: – Јолой бойыгар ортодо не керегинде сӧс блаажып келеттигер?

³⁴ Олор унчукпай турдылар, нениҥ учун дезе олордыҥ кемизи јаан деп, јолой эрмектежип келген.

³⁵ Иисус отурып, он экӱни кычырып алала, олорго айтты: – Баштапкы болойын дегенигер, ончозыныҥ калганчызы болзын, ончозына јалчы болзын.

³⁶ Бир баланы колго алып, олордыҥ ортозына тургусты, оны кучактайла, айтты:

³⁷ – Бир мындый балдардыҥ бирӱзин Меге болуп јуудып алганы, Мени јуудып турганы. Мени јууткан кижи, ол Мени јууткан эмес, Мени Ийгенди јууткан.

Слерге удура эмес кижи – слер учун

³⁸ Иоанн айтты: – Ӱредӱчи! Бир кижи бисле кожо јӱрбей, Сениҥ адыҥла шилемирлер чыгарып јӱргенин кӧрдибис. Бисле кожо эмес учун, оны токтодып койдыбыс.

³⁹ Иисус: «Оны токтотпогор – деди. – Мениҥ адымла кайкал эткен кижи, Мени ылтам јамандап болбос.

⁴⁰ Биске удура эмес кижи – бис учун.

⁴¹ Меге болуп слерди Христостыйы деп, бир айак суу ичерге берген кижи, чынын айдадым слерге: кайралынаҥ куру калбас.

⁴² Меге бӱдӱп турган бу кичӱлердиҥ кажы бирӱзин јаманга баштаган кижиниҥ мойнына теерменниҥ тажын буулап, талайга таштаза, ого торт болор эди.

⁴³ Колыҥ сени јаманга баштаза, оныҥды кезип кой. Эмди эки колду бойыҥ гееннага, ӧчпӧс отко тӱшкенчеҥ, сыҥар колду болуп, ӱргӱлји јӱрӱмге кирзеҥ торт.

⁴⁴ Анда олордыҥ курты ӧлбӧйт, оды ӧчпӧйт.

⁴⁵ Будыҥ сени јаманга баштаза, оныҥды кезип кой. Эки бутту бойыҥ гееннага, ӧчпӧс отко ташталганчаҥ, аксак-бӱксек бу бойыҥ ӱргӱлји јӱрӱмге киргениҥ јакшы.

⁴⁶ Анда олордыҥ курты ӧлбӧйт, оды ӧчпӧйт.

⁴⁷ Кӧзиҥ сени јаманга баштаза, оныҥды ойып кой. Эки кӧстӱ бойыҥ гееннага, ӧчпӧс отко ташталганчаҥ, сыҥар кӧстӱ бойыҥ Кудайдыҥ Каандыгына киргениҥ јакшы.

⁴⁸ Анда олордыҥ курты ӧлбӧйт, оды ӧчпӧйт.

⁴⁹ Кандый ла кижи отло тузалар, кандый ла берӱ тусла тузалар.

⁵⁰ Тус – јакшы неме. Је ол ачузын јылыйтса, оны неле ойто тусту эдеригер? Ӧзӧгӧрдӧ тусту болыгар, ортогордо амыр-энчӱ болзын».