Марк 5 - Јаҥы Кереес

Кара јелбиске туттурган кижини јасканы

¹ Талайдыҥ ол јанына, Гадара деп ороонго, јӱзӱп келдилер.

² Иисус кемедеҥ тӱжерде, бу тарый сӧӧк салар јердеҥ кара јелбиске туттурган кижи чыга конды.

³ Ол сӧӧк салар јерде јаткан, оны бир де кижи кынјылап та болбогон.

⁴ Оны кӧп катап кижендеп, кынјылап та турза, кынјыны ӱзӱп, киженди оодып салатан. Оны јобожыдар кижи чыкпаган.

⁵ Тӱни-тӱжи ол сӧӧк салар јерлерде ле кырларда кыйгырып, ташка согулып јӱрген.

⁶ Иисусты ыраагынаҥ кӧрӧлӧ, јӱгӱрип келип, Ого бажырып,

⁷ тыҥ ӱнденип кыйгырды: – Ӧрӧ турган Кудайдыҥ Уулы Иисус! Сеге менеҥ не керек болды? Сени Кудайдыҥ учун сурап турум: мени кыйнаба!

⁸ Ол мынайып айткан, нениҥ учун дезе Иисус: «Кара јелбис, бу кижидеҥ чык!» – деген.

⁹ Адын сураарда, айтты: – Бис кӧп, оныҥ учун адым – тӱмен черӱ.

¹⁰ Олорды бу јердеҥ сӱрбезин деп, Ого јалына бердилер.

¹¹ Андагы кырдыҥ эдегинде јаан ӱӱр чочколор одорлоп јӱрген.

¹² – Бисти чочколорго ийе бер, олордыҥ ӧзӧк-буурына барып кирели – деп, шилемирлер сурап турдылар.

¹³ Иисус јӧбин берди. Кара јелбистер кижидеҥ чыгып, чочколордыҥ ӧзӧк-буурына барып кирдилер. Айдарда, ӱӱрде эки муҥ кире чочко каскактаҥ талайга калып, чӧҥӱп калды.

¹⁴ Кӱдӱчилер дезе сыр-јӱгӱрикте барып, каладагы ла јурттардагы улуска айттылар. Олор не болгонын кӧрӧргӧ чыкты.

¹⁵ Иисуска келип кӧрзӧ, ӧзӧк-буурында тӱмен шилемирлӱ болгон кижи санаазы ордында, кийимдӱ отурды. Олорго коркымчылу боло берди.

¹⁶ Кӧргӧн улус шилемирлӱ кижиле, оноҥ чочколорло не болгонын куучындап бердилер.

¹⁷ Олордыҥ јеринеҥ јӱре берзин деп, Иисусты сурап турдылар.

¹⁸ Ол кемеге отурып јадарда, байагы ӧзӧк-буурында шилемирлӱ болгон кижи Оныла кожо јӱрейин деп суранды.

¹⁹ Је Иисус болдырбай, айтты: – Айлыҥдагы улузыҥа јан. Сеге Кайракан нени эткенин, канайда буурзаганын олорго айдып бар.

²⁰ Онызы барып, Иисус ого нени эткенин Он-Тура деп јерде јарлыктап баштады. Ончолоры кайкажып турдылар.

Оору ӱй кижини јасканы ла кызычакты тиргискени

²¹ Иисус кемеле ол јанына ойто кечерде, Оны эбире кӧп улус јуулды. Ол талайдыҥ јаказында болгон.

²² Је бат, синагоганыҥ јаандарыныҥ бирӱзи, Иаир деп кижи, келди. Иисусты кӧрӧлӧ, Оныҥ будыныҥ јанына кӧҥкӧрӧ тӱжӱп,

²³ эреп-јайнай берди: – Кызычагым ӧлӱп јадыры. Барып, оныҥ ӱстине колыҥды салып алка, ол аргадалып, тирӱ артсын.

²⁴ Иисус оныла кожо барды. Оныҥ кийнинеҥ кӧп улус базып, Оны кыстап турган.

²⁵ Анда он эки јыл кан келип, јобоп јӱрген бир ӱй кижи болгон.

²⁶ Ол кӧп эмчилерге јӱрӱп, кӧп шыралап, не барын ончозын кородып, бир де туза албай, оорузын там јаанаткан.

²⁷ Иисус керегинде угала, улустыҥ ортозыла кийнинеҥ базып келип, Оныҥ кийимине тийди.

²⁸ «Оныҥ кийимине де тийзем, јазыларым» – деп, ол айдынган.

²⁹ Бу ла тарый кан токтоп, ол јоболынаҥ јазылганын эди-каныла сезип ийди.

³⁰ Иисус бу ла тарый Бойынаҥ кӱч чыга бергенин сезип, улус јаар кайра баштанып, сурады: – Кийимиме кем тийди?

³¹ Ӱренчиктери Ого айттылар: – Улус Сени кыстап турганын кӧрӱп, Меге кем тийди деп, не сурайдыҥ?

³² Је Ол анайткан кижини кӧрӧйин деп, эбире кӧстӧп турды.

³³ Ӱй кижи бойыла не боло бергенин билди. Ол коркып ла тыркыражып, базып келеле, Иисустыҥ будыныҥ јанына кӧҥкӧрӧ тӱжӱп, чынын ончозын айтты.

³⁴ Иисус ого: «Кызым, бӱдӱп турганыҥ сени аргадап алды. Амырыҥ алып, јӱре бер, оору-јоболго бастырба» – деди.

³⁵ Ол айдып турганча, синагога башчызыныҥ айлынаҥ улус келип, айттылар: – Кызычагыҥ јада калды, Ӱредӱчини темей јоботпо.

³⁶ Иисус дезе, бу сӧстӧрди уккан бойынча, синагоганыҥ јаанына айтты: – Коркыба, јаҥыс ла бӱт.

³⁷ Ол Бойыныҥ кийнинеҥ Петр ла Иаковтоҥ, Иаковтыҥ Иоанн карындажынаҥ башка кижи бастырбады.

³⁸ Олор синагоганыҥ јааны-эшке келдилер. Иисус тӱймежип, ыйлажып-сыктажып турган улусты кӧрди.

³⁹ Киреле, олорго айтты: – Не тӱймежип, ыйлажып туругар? Кызычак ӧлбӧгӧн, ол уйуктап јат.

⁴⁰ Оны шоодо бердилер. Ол дезе, ончозын ӱйдеҥ чыгарып, кызычактыҥ ада-энезин, Бойыла кожо јӱргендерин алганча, баланыҥ јаткан јерине кирди.

⁴¹ Кызычактыҥ колын тудуп, айтты: – Талифа-куми! Бу сӧс: «Кызычак, сеге айдадым: тур!» – дегени.

⁴² Кызычак бу тарый туруп, база берди. Ол он эки јаш кирелӱ болгон. Ончозы алаҥ кайкадылар.

⁴³ Мыны бир де кижи билбезин деп, Иисус олорго кату јакарала, балага курсак берзин деди.