Марк 3 - Јаҥы Кереес

Колы кургап калганды јасканы

¹ Иисус синагогага ойто келди. Анда колы кургап калган кижи болгон.

² Иисусты бурулаарга, оны суббот кӱнде јаскай не деп, ајыктап турдылар.

³ Ол колы кургап калган кижиге: «Ортозына тур – дейле,

⁴ кӧрӱп тургандарга дезе айтты: – Суббот кӱнде нени эдерге јараар: јакшыны ба, эмезе јаманды ба? Кижиниҥ јӱрӱмин аргадаар ба, эмезе кыйар ба?» Је олор унчукпай турдылар.

⁵ Иисус олорго чугулду кӧрӱп, јӱректери катуланганына ачурканып, байагы кижиге айтты: – Колыҥды сун. Ол сунды, колы база бирӱзиндий су-кадык боло берди.

⁶ Фарисейлер чыгала, Оны канайтсабыс ӧлтӱрерис деп, Иродтыҥ улузыла кожо јӧптӧштилер.

⁷ Иисус дезе ӱренчиктериле кожо талай јаар јӱре берди. Оныҥ кийнинеҥ Галилейдеҥ ле Иудейдеҥ кӧп улус барды.

⁸ Иерусалимнеҥ, Идумейдеҥ, Иордан ары јанынаҥ, Тир ле Сидонды јакалай јерлердеҥ ума јок кӧп улус Оныҥ эдип турганын угала, Ого келип тургандар.

⁹ Улустыҥ кӧбине кыстатпаска, «Меге кеме белен болзын» – деп, Ол ӱренчиктерине айтты.

¹⁰ Ол кӧп улусты јаскан, оныҥ учун оору улус Ого тийейин деп, Ол јаар тап эдип тургандар.

¹¹ Кара јелбистер де Оны кӧрӧлӧ, Оныҥ алдына кӧҥкӧрӧ јыгылып, «Сен – Кудайдыҥ Уулы!» – деп, кыйгырыжып тургандар.

¹² Је Ол Бойы кем болгонын јарлабазын деп, кату јакарып турган.

Он эки апостолды талдаганы

¹³ Мыныҥ кийнинде Иисус кырга чыгып, Бойына кычырайын дегендерин кычырып алды. Айдарда, Ого келдилер.

¹⁴ Бойыла кожо јӱргӱзейин деп, јарладып ийип турайын деп,

¹⁵ оору-јоболдуларды јазар, шилемирлерди чыгарар јаҥду болзын деп, олордоҥ он эки кижини талдап, олорды апостолдор деп адады.

¹⁶ Бат, Ол талдап алган он экӱниҥ ады-јолы бу: Симон, оны Петр деп адады;

¹⁷ Зеведейдиҥ уулы Иаков ло оныҥ Иоанн карындажы, олорды Воанергес – «Кӱкӱрт уулдары» деп адады;

¹⁸ Андрей, Филипп, Варфоломей, Матфей, Фома, Алфейдиҥ уулы Иаков, Фаддей, Симон Кананит,

¹⁹ оноҥ Иуда Искариот, соҥында Иисусты садып ийери ол болгон.

Агару Тынды јамандаганы – ташталбас

²⁰ Айылга келгилеерде, улус база ла јуулды, мынаҥ улам олордо курсак та јиир арга јок болды.

²¹ Мыны угала, Иисустыҥ санаазы энделген туру дешкилеп, јуук улузы Оны албанла апарарга келдилер.

²² Иерусалимнеҥ келген бичикчилер дезе, Оныҥ ичинде веельзевул бар, Ол шилемирлерди шилемир бийиниҥ кӱчиле чыгара сӱрӱп турбай – дешкендер.

²³ Айдарда, Иисус олорды кычырып алып, укаа сӧслӧ айтты: – Сатана сатананы канайып чыгаратан?

²⁴ Каандык бойынаҥ бойы бӧлинзе, байагы каандык јайрадылар.

²⁵ Биле бойынаҥ бойы бӧлинзе, ол биле јайрадылар.

²⁶ Сатана бойына бойы табарып, бӧлинген болзо, ол чыдажып туруп болбос: оныҥ ӧлӱми келгени ол.

²⁷ Кӱчтӱ кижиниҥ айлына киргени, кӱчтӱ кижини озо кӱлӱбегенче, јӧӧжӧзин тоноп болбос, јаҥыс кӱлӱзе, айлын тоноор.

²⁸ Чынын айдадым слерге: кижи уулдарыныҥ не ле кинчеги, канайып та јамандап айтканы ташталар.

²⁹ Је Агару Тынды јамандап айткан кижиниҥ бурузы ӱргӱлјиге ташталбас, ол јажын-чакка јаргыга калар.

³⁰ Иисустыҥ ӧзӧк-буурында кара јелбис бар дешкен учун Ол анайып айткан.

Иисустыҥ энези ле карындаштары

³¹ Иисустыҥ энези ле карындаштары келеле, тышкары туруп, Оны айттырып кижи ийдилер.

³² Иисусты эбире кӧп улус отурган. – Сени тышкары энеҥ, карындаштарыҥ ла сыйындарыҥ сурулап јат – дедилер.

³³ – Энем кем, карындаштарым кемдер? – дейле,

³⁴ Ол Бойын эбире отурган улусты ајыктап, айтты: – Бат, Мениҥ энем, Мениҥ карындаштарым бу.

³⁵ Кудайдыҥ табын бӱдӱрип јӱргени, Мениҥ карындажым да, эје-сыйным да, энем де.