Марк 2 - Јаҥы Кереес

Курулып калган кижини јасканы

¹ Бир канча кӱнниҥ бажында Иисус Капернаумга бурылды. Ол ӱйде деп, табыш угулды.

² Кӧп улус јуулып келген учун эжик те јанында јер јок болгон. Иисус олорго сӧс айдып турарда,

³ Ого тӧрткижилеп, курулып калган кижини экелдилер.

⁴ Улустыҥ кӧбине Иисуска јууктаар эбин таппай, Ол отурган айылдыҥ јабынчызында тежик эделе, оору кижини тӧжӧктӧ јаткан бойынча тӱжӱрип ийдилер.

⁵ Иисус олордыҥ бӱдӱп турганын кӧрӧлӧ, курулып калган кижиге айтты: – Балам, кинчектериҥ ташталып јат.

⁶ Анда отурган бир кезик бичикчилер ичинде санандылар:

⁷ «Бу не дийт? Кудайды анайып не јамандайт болбогой? Кинчекти Кудайдаҥ ӧскӧ кем таштайтан?»

⁸ Иисус бу тарый олордыҥ ичиндеги санаазын ӧзӧк-тыныла билип, айтты: – Ичигерде анайып не керек сананып јадыгар?

⁹ Нези јеҥил? Курулып калганга: «Кинчектериҥ ташталып јат» – деерге бе, эмезе: «Тур, тӧжӧгиҥди алып, базып јӱр» – деерге бе?

¹⁰ Је Кижи Уулында јердеги кинчекти таштаар јаҥ барын билип јӱрӱгер – дейле, курулып калганга: –

¹¹ Сеге айдадым: тур, тӧжӧгиҥди алып, айлыҥа јан – деди.

¹² Онызы бу тарый ӧрӧ туруп, тӧжӧгин алала, ончо улус кӧзинче чыга берди. Ончолоры кайкажып, «Мындый немени эр-јажына кӧрбӧдис!» – дежип, Кудайды алкап турдылар.

Левийди кычырып алганы

¹³ Иисус ойто ло талай јаар јӱре берди. Ончо улус Ого келип турды, Ол олорды ӱретти.

¹⁴ Ӧдӱп барадып, Ол Алфейдиҥ уулы Левий калан јуур јерде отурганын кӧрӧлӧ, «Мени ээчий бас» – деди. Онызы ӧрӧ туруп, Оныҥ кийнинеҥ басты.

¹⁵ Иисус Левий-эште кыйын отурарда, Оныла, Оныҥ ӱренчиктериле кожо кӧп каланчылар ла кинчектӱлер кыйын отургандар. Андый улус кӧп болгон ине, олор Оныла кожо јӱргендер.

¹⁶ Ол каланчыларла, кинчектӱлерле кожо ажанып отурганын кӧрӧлӧ, бичикчилер ле фарисейлер Оныҥ ӱренчиктерине айдышты: – Ол каланчыларла, кинчектӱлерле кожо канайып ичет-јийт болбогой?

¹⁷ Мыны уккан Иисус олорго айтты: – Эмчини кадык улус эмес, оору улус керексиир. Мен актуларды эмес, кинчектӱлерди кычырарга келгем.

Орозо керегинде

¹⁸ Иоанныҥ ла фарисейлердиҥ ӱренчиктери орозо туткандар. Иисуска келип, айткандар: – Нениҥ учун Иоанныҥ ла фарисейлердиҥ ӱренчиктери орозолоп јадылар, Сениҥ ӱренчиктериҥ дезе орозолобой јадылар?

¹⁹ Иисус олорго айтты: – Колту кожо јӱргенде, тойдогы улус орозолойтон беди? Колту кожо јӱргенде, олор орозолоп болбос.

²⁰ Је колтуны олордоҥ айрып алар кӱндер келер, ол тушта, ол кӱндерде олор орозо тудар.

²¹ Эски кийимге јаҥы бӧстиҥ ӧӧнин јамабайтан. Оноҥ башка, јамачы эскизин јырта тартып, јыртыгы там ары барар.

²² Јаҥы аракыны эски тажуурга урбайтан. Оноҥ башка, аракы тажуурды јара тебер, аракызы да тӧгӱлер, тажууры да ӱрелер. Карын, јаҥы аракыны јаҥы тажуурга уратан.

Суббот кӱн керегинде

²³ Бир катап суббот кӱнде Иисус аш салган кыраны кечире барып јаткан. Ӱренчиктери јолой аштыҥ мажагын ӱзӱп, јип тургандар.

²⁴ Фарисейлер Ого айттылар: – Олордыҥ суббот кӱнде этпейтенди эдип тургандарын кӧрзӧҥ.

²⁵ Иисус олорго айтты: – Качан да кычырбаган бедигер, Давид аш-курсактаҥ тутакту болуп, бойы да, кожо јӱргендери де аштайла, нени эткен эди?

²⁶ Ол Авиафар деп улу абыс тужында Кудайдыҥ байзыҥына киреле, абыстардаҥ башка кем де јибейтен ыйык калаштарды алып јийле, кожо јӱргендерине де берген.

²⁷ Оноҥ айтты: – Суббот кӱн кижиге болуп јайалган, кижи суббот кӱнге болуп јайалган эмес.

²⁸ Оныҥ учун Кижи Уулы суббот то кӱнниҥ бийи.