Марк 11 - Јаҥы Кереес

Иерусалимге киргени

¹ Иерусалимнеҥ ыраак јокто Елеон кырдыҥ эдегинде турган Виффагия ла Вифания деп јурттарга јууктагылап келерде, Иисус ӱренчиктериниҥ экӱзин ийип,

² айтты: – Одоштой јуртка барыгар. Ого кирген бойынча, буулап койгон, кижи минбеген кулун эштекти кӧрӱп ийеригер. Оны чечеле, экелигер.

³ Слерге кандый бир кижи: «Слер нени эдип туругар?» – дегежин, «Ол Кайраканга керек. Ол оны удабас кайра ийер» – дегер.

⁴ Олор барып, оромдо каалганыҥ јанында буулап койгон кулун эштекти таап, чечип алдылар.

⁵ Анда турган улустыҥ кезиги: «Нени эдип туругар? Эштекти не чечип јадыгар?» – деп сураарда,

⁶ олор Иисустыҥ јакыганыла айттылар. Айдарда, олорды божодып ийдилер.

⁷ Кулун эштекти Иисуска экелип, кийимдерин токуп бердилер. Иисус ого минди.

⁸ Кӧп улус кийимдерин јолго јайып турдылар, ӧскӧлӧри дезе агаштыҥ бӱрин кезип, јолго јайдылар.

⁹ Иисустыҥ алды-кийнинеҥ барып јаткан улус кыйгырыжып турдылар: – Осанна! Кайраканныҥ адынаҥ келип јатканы алкышту!

¹⁰ Кайраканныҥ адынаҥ келип јаткан Давид адабыстыҥ каандыгы алкышту! Кӧк-теҥериде турганга, осанна!

¹¹ Иисус Иерусалимге једип, байзыҥга кирди. Анда ончозын ајыктап кӧрӧлӧ, орой болгон учун он экӱни алганча, Вифания јаар барды.

Јиилек јок агаш

¹² Эртезинде Вифаниядаҥ чыгып барадала, Ол аштай берди.

¹³ Бӱрлӱ смоква агажын ыраактаҥ кӧрӧлӧ, оноҥ неме табарым ба, јок по деп барды. Је ого келеле, бӱрдеҥ ӧскӧ неме таппады, нениҥ учун дезе јиилек бӱдер ӧй јеткелек болгон.

¹⁴ Айдарда, Иисус ого айтты: – Эмдидеҥ ала ӱргӱлји чакка кижи сенеҥ јиилек јибезин! Ӱренчиктер мыны угуп тургандар.

Байзыҥды арутаганы

¹⁵ Иерусалимге келдилер. Иисус байзыҥга кирип, байзыҥда садыжып ла садып алып турган улусты сӱрӱп баштады. Акча солычылардыҥ столдорын, кӱӱле садаачылардыҥ такталарын аҥтарды.

¹⁶ Кандый бир кижи байзыҥныҥ ичиле неме алып ӧтпӧзин деп, токтодып турды.

¹⁷ Олорды ӱредип, айтты: – Бичилбеген беди: «Мениҥ айлым ончо калыктардыҥ мӱргийтен айлы деп адалар»? Слер дезе оны тонокчылардыҥ уйазы эдип алдыгар.

¹⁸ Улу абыстар ла бичикчилер мыны угала, Оны ӧлтӱрер эбин бедиредилер. Олор Оноҥ коркып турган, нениҥ учун дезе калык ончозы Оныҥ ӱредӱзин кайкап угатан болгон.

¹⁹ Эҥир кирерде, Ол каладаҥ чыгып, јӱре берди.

²⁰ Эртен тура ӧдӧ барадып, смоква агажы тазылына јетире кургап калганын кӧрдилер.

²¹ Петр эске алынып, Ого айтты: – Ӱредӱчи, кӧрзӧҥ, Сен каргаган смоква кургап калтыр!

²² Иисус каруу јандырып, олорго айтты: – Кудайга бӱдигер!

²³ Чынын айдадым слерге: кандый бир кижи бу кырга: «Кӧдӱрилип, талайга таштал!» – дейле, јӱрегинде эреҥистелбей, айтканымла болор деп бӱтсе, андый ла болор.

²⁴ Оныҥ учун айдып турум слерге: мӱргип тура, нени де суразаар, сураганымды аларым деп бӱдигер, слерге андый ла болор.

²⁵ Мӱргип турганыгарда, кижиге ӧӧркӧгӧнигерди таштап ийигер. Ол тушта теҥеридеги Адагар да кинчектеригерди таштаар.

²⁶ Таштабас болзогор, теҥеридеги Адагар да кинчектеригерди таштабас.

Јаҥ керегинде сурак

²⁷ Иерусалимге ойто келдилер. Иисус байзыҥда базып јӱрерде, Ого улу абыстар, бичикчилер ле јаандар јууктап,

²⁸ айдып турдылар: – Мыны кандый јаҥла эдип турадыҥ? Мыны эдер јаҥды Сеге кем берген?

²⁹ Иисус олорго: «Мен де слердеҥ бир неме сурап угайын – деди. – Меге каруузын айдыгар, мыны кандый јаҥла эдип турганымды слерге Мен де айдайын.

³⁰ Иоанныҥ крестеп јӱргени теҥеридеҥ болгон бо, эмезе улустаҥ ба? Меге каруузын айдыгар».

³¹ Олор дезе бойлоры ортодо табыштылар: «„Теҥеридеҥ“ дегей эди, ол тушта: „Ого не керек бӱтпедигер?“ – деер».

³² «Кижидеҥ» деп айдарга, улустаҥ коркып тургандар, нениҥ учун дезе ончозы Иоаннды чын јарлыкчы деп бодоп јӱргендер.

³³ Олор Иисуска «билбезис» – деерде, Иисус каруу јандырып, айтты: – Мыны кандый јаҥла эдип турганымды слерге Мен де айтпазым.