Марк 10 - Јаҥы Кереес

Кижи алары ла айрылыжары керегинде

¹ Иисус оноортынаҥ чыгала, Иордан ары јанындагы Иудейге келди. Ого база ла улус јуулды, Ол Бойыныҥ јаҥыла олорды ӱредип турды.

² Фарисейлер базып келип, Оны ченеп, сурадылар: – Алган эжиле айрылыжарга јараар ба?

³ – Моисей слерге не деп јакыган эди? – Иисус сурады.

⁴ Олор айдышты: – Айрылыштыҥ кере бичигин бичип, айрылыжарын Моисей јараткан.

⁵ Иисус айтты: – Јӱректеригер кату ла ӧчӧш учун, ол слерге бу јакылтаны бичип берген.

⁶ Не-немени јайап баштаган тужында Кудай олорды эр кижи ле ӱй кижи эдип јайаган.

⁷ Оныҥ учун кижи ада-энезин таштап,

⁸ алганына јапшынар, эки бойы јаҥыс эт-кан болор. Андый болгондо, олор эки эмес, јаҥыс эт-кан.

⁹ Анайдарда, Кудайдыҥ бириктиргенин кижи айрыбазын.

¹⁰ Ӱйде ӱренчиктери бу ла керегинде ойто сурадылар.

¹¹ Иисус олорго айтты: – Ӱйиле айрылыжып, ӧскӧ кижи алганы, онызыла кинчекке киргени ол.

¹² Ӱйи ӧбӧӧниле айрылыжып, ӧскӧ кижиге барза, кинчекке кирип јат.

Балдарды алкаганы

¹³ Балдарга колын тийгиссин деп, олорды Иисуска экелдилер. Ӱренчиктер дезе олорды јууктатпай турдылар.

¹⁴ Иисус мыны кӧрӧлӧ, чугулданып, ӱренчиктерине айтты: – Балдарды бери божодыгар, Меге келерге буудактабагар. Кудайдыҥ Каандыгы мындыйлардыйы.

¹⁵ Чынын айдадым слерге: Кудайдыҥ Каандыгын бала чылап јуудып албаган кижи ого кирбес.

¹⁶ Ол балдарды кучактап, олорго колын салып, алкады.

Бай кижиниҥ сурагы

¹⁷ Иисус јолго кӧндӱгип јадарда, бир кижи јӱгӱрип келеле, Оныҥ алдына тизеленип, сурады: – Быйанду Ӱредӱчи! Ӱргӱлји јӱрӱмди энчиленерге, нени эдейин?

¹⁸ Иисус ого айтты: – Мени не быйанду дейдиҥ? Кем де быйанду эмес, јаҥыс Кудай быйанду.

¹⁹ Кижи ӧлтӱрбе, чайдам кылынба, ууры этпе, тӧгӱндеп керелебе, куурмактаба, ада-энеҥди тооп јӱр деген јакылталарды билериҥ.

²⁰ Байагы кижи дезе Ого айтты: – Ӱредӱчи! Мыныҥ ончозын мен јаштаҥ ала бӱдӱрген эдим.

²¹ Иисус ол јаар кӧрӧлӧ, ого карузып, айтты: – Сеге бир ле неме јетпейт. Барып, не барыҥды садала, тӱреҥилерге ӱлеп бер. Ол тушта теҥериде эрјинелӱ болорыҥ. Оноҥ келип, керӱ агажыҥды алганча, Мениле кожо бар.

²² Ол дезе, бу сӧстӧҥ чырайы кубулып, кунукчылду јӱре берди, нениҥ учун дезе коркышту бай кижи болгон.

²³ Иисус эбире ајыктап, ӱренчиктерине айтты: – Бай улуска Кудайдыҥ Каандыгына кирерге кандый кӱч!

²⁴ Ӱренчиктерди Оныҥ сӧстӧри алаҥ кайкатты. Је Иисус катап айтты: – Балдар, байлыкка иженген улуска Кудайдыҥ Каандыгына кирерге кандый кӱч!

²⁵ Бай кижиге Кудайдыҥ Каандыгына киреринеҥ, тӧӧгӧ ийне ӱйдинеҥ ӧдӧргӧ јеҥил.

²⁶ Олор там кайкажып, бойлоры ортодо айдыжып турдылар: – Айдарда, кем аргаданар аргалу?

²⁷ Иисус олор јаар кӧрӱп, айтты: – Улус мыны эдип болбос, јаҥыс Кудай эдер, нениҥ учун дезе Кудайдыҥ эдип болбозы јок.

²⁸ Петр айдып баштады: – Бат, бары-јогысты таштап, Сениле кожо бардыбыс.

²⁹ Иисус айтты: – Чынын айдадым слерге: кем айлы-јуртын, эмезе ага-карындажын, эмезе эје-сыйнын, эмезе адазын, эмезе энезин, эмезе бала-барказын, эмезе кыразын Меге болуп, Сӱӱнчилӱ Јарга болуп таштаза,

³⁰ эмдиги ӧйдӧ, бу чакта, айыл-јуртты, ага-карындашты, эје-сыйынды, ада-энени, бала-барканы, кыраны, истедип јӱрӱп, јӱс катап артыктай алар, келер чакта дезе ӱргӱлји јӱрӱмди алар.

³¹ Је кӧп баштапкы болгондор калганчылар болор, калганчы болгондор баштапкылар болор.

³² Олор Иерусалим јаар чыгып, јолдо болордо, Иисус алдында барып јаткан. Ӱренчиктери алаҥ кайкап, кожо јӱрген улузы дезе коркып калган бараттылар. Ол он экӱни таҥынаҥ кычырып алып, Бойыла не болорын олорго база катап айдып баштады.

³³ – Бат, Иерусалим јаар чыгып барадырыс. Кижи Уулы улу абыстардыҥ ла бичикчилердиҥ колына берилер. Оны ӧлтӱрер эдип јаргылайла, кара јаҥдуларга берип ийгилеер.

³⁴ Оны электегилеер, Ого тӱкӱргилеер, Оны камчылаар, ӧлтӱргилеп койор. Ӱчинчи кӱнде дезе Ол тирилер.

Зеведейдиҥ уулдарыныҥ сурагы

³⁵ Иисуска Зеведейдиҥ уулдары Иаков ло Иоанн базып келип, «Ӱредӱчи! – дедилер. – Сени бистиҥ сураганысты этсин деп турубыс».

³⁶ Иисус олорго айтты: – Мени слерге нени этсин деп туругар?

³⁷ Олор айттылар: – Сениҥ магыҥ келзе, бирӱбисти оҥ јаныҥа, бирӱбисти сол јаныҥа отургуссын деп турубыс.

³⁸ Је Иисус олорго айтты: – Нени сурап турганыгарды билбей јадыгар. Мениҥ ичип турган айагымды ичип болороор бо, Мениҥ тӱжӱп турган крезиме тӱжӱп болороор бо?

³⁹ Олор: – Болорыс – дедилер. Иисус дезе олорго айтты: – Ичип турган айагымды ичерин ичеригер, тӱжӱп турган крезиме тӱжерин тӱжеригер.

⁴⁰ Оҥ ло сол јаныма дезе отургызар јаҥ Менде јок, је Кудай ол јерди кемге белетеген, ого ол кижи отурар.

⁴¹ Мыны угала, арткан он ӱренчик Иаков ло Иоаннга чугулдана бердилер.

⁴² Иисус дезе, олорды кычырып алып, айтты: – Калыктарда баштапкы болгоны – олорды башкаратанын, сайыттары олорды бийлейтенин билеригер.

⁴³ Је ортогордо андый болбозын. Ортогордо јааны болойын дегенигер, слерге јалчы болзын.

⁴⁴ Ортогордо баштапкы болойын дегенигер, ончогорго кул болзын.

⁴⁵ Кижи Уулы да улусты Ого јалчы болзын деп эмес, улуска јалчы болойын деп, кӧп улус учун Бойыныҥ јӱрӱмин берейин деп келген ине.

Сокор Вартимейди јасканы

⁴⁶ Иерихонго келдилер. Иисус ӱренчиктериле, кӧп улусла кожо Иерихонноҥ чыгып јадарда, јолдыҥ кырында Тимейдиҥ уулы Вартимей деп сокор суранчыктап отурган.

⁴⁷ Бу Назарет јеринеҥ Иисус деп угала, ол кыйгырып, айда берди: – Давид Уулы Иисус, меге буурза!

⁴⁸ Кӧп улус оны унчуктырбаста, ол: «Давид Уулы, меге буурза!» – деп, там тыҥыда кыйгыра берди.

⁴⁹ Иисус токтой тӱжӱп, оны кычыртып ийди. Сокорды кычырып, айттылар: – Коркыба, тур, Ол сени келзин дийт.

⁵⁰ Ол катанчыгын суурып, таштайла, ӧрӧ туруп, Иисуска базып келди.

⁵¹ Иисус оноҥ сурады: – Мени сеге нени этсин деп туруҥ? Сокор кижи Ого айтты: – Ӱредӱчи, кӧзим јарызын деп турум!

⁵² Иисус айтты: – Бар, бӱдӱп турганыҥ сени аргадап алды. Бу тарый кӧзи јарып, ол Иисусты ээчий јолло басты.