Лука 6 - Јаҥы Кереес

Суббот кӱн керегинде сурак

¹ Пасханыҥ экинчи кӱнинде баштапкы субботто Иисус аш салган кырала базып бараткан. Ӱренчиктери мажакты ӱзӱп, уужайла, јип тургандар.

² Фарисейлердиҥ кезиги айдышты: – Суббот кӱнде этпейтенди не керек эдип турганыгар?

³ Иисус каруу јандырды: – Давид бойы да, кожо јӱргендери де, аштайла, нени эткен эди, кычырбаган бедигер?

⁴ Ол Кудайдыҥ байзыҥына киреле, ыйык калашты бойы алып јиген, кожо јӱргендерине де берген. Ол калашты дезе абыстардаҥ ӧскӧ кемниҥ де јиир учуры јок болгон.

⁵ Оноҥ айтты: – Кижи Уулы – суббот то кӱнниҥ бийи.

⁶ База бир суббот кӱнде Ол синагогага кирип, улус ӱретти. Анда оҥ колы кургап калган кижи болгон.

⁷ Бичикчилер ле фарисейлер Иисусты бурулаар шылтак бедиреп, оны суббот кӱнде јаскай не деп, ајыктап турдылар.

⁸ Је Иисус олордыҥ сагыжын билип, кургап калган колду кижиге айтты: – Ӧрӧ туруп, улустыҥ ортозына чык. Ол кижи туруп, ичкери ӧтти.

⁹ Иисус олорго айтты: – Мен слердеҥ сурап угайын: суббот кӱнде нени эдер керек? Јакшыны ба, эмезе јаманды ба? Кижиниҥ јӱрӱмин аргадаар ба, эмезе кыйар ба? Олор унчукпай турдылар.

¹⁰ Олорды ончозын ајыктап, байагы кижиге: – Колыҥды сун – деди. Ол сунды, колы су-кадык боло берди.

¹¹ Бичикчилер ле фарисейлер калјуурып, Иисусты канайдалы деп, шӱӱшкилеп турдылар.

Он эки апостолды талдап алганы

¹² Ол кӱндерде Иисус мӱргийин деп кырга чыгып, тӱниле Кудайга мӱргиген.

¹³ Таҥ адарда, ӱренчиктерин Бойына кычырып алала, олордыҥ ортозынаҥ он эки кижи талдап, апостолдор деп адады.

¹⁴ Олор: Симон, оны Петр деп адады, оныҥ Андрей карындажы, Иаков ло Иоанн, Филипп ле Варфоломей;

¹⁵ Матфей ле Фома, Алфейдиҥ уулы Иаков ло Зилот дейтен Симон;

¹⁶ Иаковтыҥ уулы Иуда ла Иуда Искариот, соҥында садынып ийери ол болгон.

Кежик береечи јакылталар

¹⁷ Иисус олорло кожо кырдаҥ тӱжӱп, тӱс јерге токтоды. Кӧп ӱренчиктери, оноҥ Иудей ичинеҥ, Иерусалимнеҥ, Тир ле Сидонныҥ талай јаказындагы јерлеринеҥ камык улус кожо болгон.

¹⁸ Олор Иисусты угарга, оору-јоболынаҥ јазыларга келгендер. Кара јелбистерге кыйнаткан бойлоры јазылып тургандар.

¹⁹ Ончозы Ого тийип ийерге јӱткӱген, нениҥ учун дезе, Оноҥ кӱч чыгып, ончозын јазып турган.

²⁰ Ол ӱренчиктери јаар кӧрӱп, айтты: – Тыны тӱреҥи јӱргендер кежиктӱ: Кудайдыҥ Каандыгы слердийи.

²¹ Эмди аштап јӱргендер кежиктӱ: слер тойорыгар. Эмди ыйлап јӱргендер кежиктӱ: слер каткырарыгар.

²² Кижи Уулы учун улус слерди јаман кӧрӱп, сӱрӱп, айткылап, адыгарды јамандап турза, кежиктӱ болгоныгар ол.

²³ Ол кӱнде сӱӱнигер, јыргагар, нениҥ учун дезе теҥеридеги кайралыгар улу! Олордыҥ адалары јарлыкчыларла анайып ок эдип јӱрген эдилер.

²⁴ Слерге дезе, байларга, ачу-корон! Слер једер коодыгарга јединип алганыгар.

²⁵ Эмди ӧткӱре тойу јӱргендерге, ачу-корон! Слер аштап торолоорыгар. Эмди каткырып јӱргендерге, ачу-корон! Слер ыйлап, сыктаарыгар.

²⁶ Слерди ончо улус мактап айткажын, слерге ачу-корон! Олордыҥ адалары тӧгӱн јарлыкчыларга анайып ок эдип јӱргендер.

²⁷ Је угуп турган слерге айдадым: ӧштӱлеригерге буурзап јӱригер, слерди јаман кӧргӧндӧргӧ јакшыгарды јетирип јӱригер;

²⁸ слерди каргагандарды алкап јӱригер, слерди јамандагандар учун мӱргип јӱригер.

²⁹ Јаагыҥа тажыган кижиге база бир јаагыҥды тӧгӧп бер; катанчыгыҥды блаап јаткан кижиге чамчаҥды да аларга буудак этпе.

³⁰ Сенеҥ сурап турган кажы ла кижиге – бер, сенийин алган кижидеҥ – кайра некебе.

³¹ Слерге улус кандый болзын дезегер, бойыгар да олорго андый ок болыгар.

³² Слерге карузып тургандарга карузып турган болзогор, слерге нениҥ учун алкыш-быйан айдатан? Кинчектӱлер де олорго карузыгандарга карузып јат.

³³ Слерге јакшызын јетирип тургандарга јакшыгарды јетирип турган болзогор, ол учун слерге кандый алкыш-быйан? Кинчектӱлер де анайда эдип јадылар.

³⁴ Ойто јандырып бергедий ижемјилӱ улуска тӧлӱге берип турган болзогор, слерге кандый алкыш-быйан? Кинчектӱлер де кинчектӱлерге ордына ойто аларым деп берип јадылар.

³⁵ Је слер ӧштӱлеригерге карузып јӱригер, кайра аларым деп сакыбай, јакшыгарды јетиригер, тӧлӱге беригер. Ол тушта слерге улу кайрал болор, Ӧрӧ Турганныҥ уулдары болорыгар, нениҥ учун дезе Ол јакшызы јок то, јаман да улуска быйанзак.

³⁶ Адагар улуска буурзак эди, слер де буурзак болыгар.

³⁷ Јаргылабагар, слерди де јаргылабас; бурулабагар, слерди де бурулабас; јаманды таштагар, слердийи де ташталар;

³⁸ беригер, слерге де берилер: јакшы кемјӱле, тыктап, тепсеп, эдегеерге толо уруп бергилеер. Кандый кемјӱле кемјииригер, анайып ла бойыгарга кемјилер.

³⁹ Иисус олорго анайда ок укаа сӧс айтты: – Сокор сокорды јединип јӱрер бе? Экилези орого тӱжер эмес пе?

⁴⁰ Ӱренчик ӱредӱчизинеҥ бийик болбос, је ӱренеле, ӱредӱчизиндий болор.

⁴¹ Карындажыҥныҥ кӧзиндеги тегенекти не кӧрӱп јадыҥ, бойыҥныҥ кӧзиҥдеги тоормошты дезе сеспейдиҥ бе?

⁴² Эмезе, кӧзиҥдеги тоормошты бойыҥ кӧрбӧй јадып, «Карындаш, кӧзиҥнеҥ тегенекти чыгарып ийейин» – деп, канайып айдарыҥ? Эки јӱстӱ! Озо бойыҥныҥ кӧзиҥнеҥ тоормошты чыгар, ол тушта карындажыҥныҥ кӧзинеҥ тегенекти канайып чыгарарын кӧрӱп аларыҥ.

⁴³ Јакшы агаштаҥ јаман јиилек бӱтпейтен, јаман агаштаҥ јакшы јиилек бӱтпейтен.

⁴⁴ Не ле агашты бӱткен јиилегинеҥ таныйтан. Смокваны тегенектеҥ јуубайтан, виноградты тегенектӱ кырчыннаҥ тербейтен.

⁴⁵ Јакшы кижи јӱрегинде јакшыны чеберлеген јеринеҥ јакшызын алып чыгар; јаман кижи дезе јӱрегинде јаманды чеберлеген јеринеҥ јаманын алып чыгар. Кижиниҥ јӱреги неле толо, оозынаҥ ол ло чыгар.

⁴⁶ Слер, айтканымды этпес бойыгар, Мени «Кайракан! Кайракан!» деп не айдадыгар?

⁴⁷ Меге келип, айткан сӧзимди угуп, оны бӱдӱрип јӱрген кижи кемге тӱҥейин слерге айдып берейин:

⁴⁸ ол тура туткан кижиге тӱҥей. Ол кижи јерди тереҥжиде казып, тураныҥ тӧзин ташка салган. Чайык чыгып, турага табарган, је оны јайрадып болбогон, нениҥ учун дезе ол быжулап тудулган.

⁴⁹ Сӧзимди угарын угуп, оны бӱдӱрбегени, туразын тӧзӧлгӧ јокко, јердиҥ бойына туткан кижиге тӱҥей. Турага суу табарарда, ол бу тарый јемириле берген, байагы тураныҥ јемирилгени коркышту болгон.