Лука 5 - Јаҥы Кереес

Баштапкы ӱренчиктер

¹ Бир кӱн Иисус Геннисарет кӧлдиҥ јаказында болордо, улус Кудайдыҥ сӧзин угарга, кысталыжып турган.

² Ол кӧлдӧ турган эки кемени кӧрӱп ийди. Балыкчылар кемелеринеҥ чыгып, шӱӱндерин чайбап, јунуп тургандар.

³ Ол Симондыйы болгон бир кемеге отурып, јараттаҥ эмеш ары јӱссин деп сурады. Оноҥ улусты кемедеҥ ӱретти.

⁴ Ӱредип божойло, Симонго айтты: – Кӧлдиҥ тереҥ деген јерине јӱс, анда шӱӱндегер.

⁵ Симон Ого айтты: – Ӱредӱчи! Бис тӱниле иштенип, неме тутпадыс, је Сениҥ айтканыҥла шӱӱнди чачайын.

⁶ Шӱӱндегилеп, ума јок кӧп балык туттылар, керек дезе шӱӱндери јыртылып турды.

⁷ Келип болушсын деп, ӧскӧ кемедеги нӧкӧрлӧрине кол јаҥыдылар. Олор јӱзӱп келдилер. Кемениҥ экилезин балыкла толтырарда, кемелер чӧҥӱп баштады.

⁸ Мыны кӧрӧлӧ, Симон-Петр Иисустыҥ алдына тизеленип, айтты: – Менеҥ ары тур, Кайракан, мен кинчектӱ кижи эдим!

⁹ Олор туткан балыктыҥ кӧбине Симонныҥ ла оныла кожо болгондордыҥ коркыжы келген,

¹⁰ анайда ок Симонныҥ нӧкӧрлӧри – Зеведейдиҥ уулдары Иаков ло Иоанныҥ. Је Иисус Симонго: – Коркыба, – деди, – бӱгӱннеҥ ала улус тударыҥ.

¹¹ Олор кемелерин јаратка чыгарып, бар-јогын артырып койоло, Оны ээчий бастылар.

Капкаш балулу кижини јасканы

¹² Иисус бир калада јӱрерде, бастыра бойы капкаш балулу кижи келди. Иисусты кӧрӧлӧ, Оныҥ алдына кӧҥкӧрӧ јыгылып, јайнай берди: – Кайракан, мени арутайын дезеҥ, арутап ийериҥ!

¹³ Иисус колын сунуп, ого тийеле, айтты: – Арутайын, ару бол. Ол ло тарый капкаш балу сойылып, тӱже берди.

¹⁴ Кижиге неме айтпазын деп, Иисус ого јакыды. – Абыска барып кӧрӱн – деди. – Аруталганыҥ учун Моисейдиҥ јакарганыла тайылга эт, улуска кере болзын.

¹⁵ Је Иисус керегинде табыш там јайылды, Оныҥ айткан сӧзин угарга, оору-јоболын јастырарга, ума јок кӧп улус келип турды.

¹⁶ Ол дезе, аалга јерлерге барып, мӱргиир болды.

Курулып калган кижини јасканы

¹⁷ Бир кӱн Иисус ӱредип турарда, Галилей ле Иудейдиҥ ончо јерлеринеҥ, оноҥ Иерусалимнеҥ келген фарисейлер ле јасакчылар анда ок отургандар. Иисуста Кайраканныҥ улусты јазар кӱчи болгон.

¹⁸ Бир кезик улус курулып калган кижини тӧжӧккӧ салганча экелдилер. Оны ӱйге кийдирерге, Иисустыҥ алдына салып берерге албаданып турдылар.

¹⁹ Улустыҥ кӧбине ӱйге кирип болбой салала, оныҥ ӱстине чыгып, тежик эделе, оору кижини улустыҥ ортозына, Иисустыҥ чике алдына тӧжӧгиле катай тӱжӱрип ийдилер.

²⁰ Иисус олордыҥ бӱдӱп турганын кӧрӧлӧ, айтты: – Кижи, кинчектериҥ ташталды.

²¹ Бичикчилер ле фарисейлер бойлоры ортодо табыштылар: «Кудайды мынайып јамандап турган бу не кижи? Кинчекти Кудайдаҥ ӧскӧ кем таштаар аргалу?»

²² Иисус олордыҥ ичиндеги санаазын билип, айтты: – Слер не анайда сананып јадыгар?

²³ Не деп айдарга јеҥил: «Кинчектериҥ ташталды» – деерге бе, эмезе: «Тур, базып јӱр» – деерге бе?

²⁴ Је Кижи Уулында јер ӱстинде кинчектерди таштайтан јаҥ барын слерди билзин деп, анайда айттым – дейле, курулып калганга баштанды: – Сеге айдадым: тур, тӧжӧгиҥди алып, айлыҥа јан.

²⁵ Онызы ол тарый олордыҥ алдына туруп, јаткан тӧжӧгин алып, Кудайды мактап, јана берди.

²⁶ Ончозы алаҥ кайкажып, Кудайды мактадылар. Коркып калган бойлоры, айдыжып турдылар: – Бӱгӱн бис саҥ башка кайкамчылу немелер кӧрдибис!

Левийди кычырып алганы

²⁷ Мыныҥ кийнинде Иисус чыгып, Левий деп каланчы калан јуур јеринде отурганын кӧрӧлӧ, – Мени ээчий бас! – деди.

²⁸ Онызы ончо немезин артырып койоло, ӧрӧ туруп, Оныҥ кийнинеҥ басты.

²⁹ Левий айлында Ого јаан кӱндӱ-кӱрее этти. Анда олорло кожо кыйын отурган кӧп каланчылар ла ӧскӧ дӧ улус болгон.

³⁰ Фарисейлер ле бичикчилер дезе арбаныжып, Оныҥ ӱренчиктерине айдып турдылар: – Слер каланчыларла, кинчектӱлерле кожо не керек ичип-јип јадыгар?

³¹ Иисус олорго айтты: – Эмчини кадык улус эмес, оору улус керексиир.

³² Мен Кудайга баштанзын деп, актуларды эмес, кинчектӱлерди кычырарга келгем.

Орозо керегинде сурак

³³ Бичикчилер ле фарисейлер Иисуска айттылар: – Иоанныҥ ӱренчиктери улай ла орозо тудуп, мӱргип јат, фарисейлердийи база. Сенийи дезе ичип-јип јадылар.

³⁴ Иисус олорго айтты: – Колту кожо јӱргенде, тойдогы улусты орозолодып болороор бо?

³⁵ Је колтуны олордоҥ айрып алар кӱндер келер, ол тушта, ол кӱндерде олор орозо тудар.

³⁶ Оноҥ олорго укаа сӧс айтты: – Јаҥы кийимнеҥ јамачы кезип, эски кийимди јамабайтан. Анайткажын, јаҥы кийим де јыртылар, јаҥы јамачы да эски кийимге јарабас.

³⁷ Јаҥы аракыны эски тажуурга урбайтан. Анайткажын, јаҥы аракы тажуурды јара тебер, аракызы да тӧгӱлер, тажууры да ӱрелер.

³⁸ Карын, јаҥы аракыны јаҥы тажуурга уратан. Ол тушта мынызы да, онызы да ӱрелбес.

³⁹ Эски аракыны ичкен кижи ол тарыйында јаҥызын ичпес, эскизи артык – деер.