Лука 3 - Јаҥы Кереес

Крестеечи Иоанныҥ јарлыктаганы

¹ Бу керек Тиверий каган Римди он бежинчи јыл башкарып турарда болгон. Ол тушта Понтий Пилат Иудейде, Ирод дезе Галилейде бийлеген, оныҥ Филипп карындажы Итурейде ле Трахонитида тергееде, Лисаний дезе Авилинейде бийлеген.

² Ханна ла Каиафа улу абыстар болордо, куба чӧлдӧ Захарияныҥ уулы Иоаннга Кудайдаҥ сӧс болгон.

³ Ол Иордан-сууны сындай јерлерди эбирип, јарлыктап јӱрген: «Кинчектеригер ташталзын деп, Кудайга баштанып, креске тӱжӱгер!»

⁴ Исаия јарлыкчыныҥ тӱрбегинде бичилгениле: «Куба чӧлдӧ кыйгырганныҥ ӱни бу: „Кайраканга јол белетегер, Оныҥ јолдорын тӱс эдигер!

⁵ Кажы ла кобы толып, кажы ла туу ла тӧҥ јабызазын, бурылчыктар, орык јолдор тӱзелзин!

⁶ Ол тушта Кудайдыҥ аргадажын кандый ла кижи кӧрӱп ийер“».

⁷ Креске тӱжерге келген улуска Иоанн айдып турган: – Јыланныҥ ач-ӱрени! Кудайдыҥ келер ӧйдӧги чугулынаҥ кыйыжар јолды слерге кем кӧргӱзип берди?

⁸ Чындаптаҥ кинчегерди алынып, Кудайга баштанганыгарды керекте кӧргӱзигер! «Адабыс Авраам» – деп, ичигерде айдарга сананбагар! Айдып турум слерге: Кудай бу таштардаҥ Авраамга балдарды јазап берер аргалу.

⁹ Малта да агаштардыҥ тазылында јадыры: јакшы јиилек бӱтпес агашты кезип, отко таштайтан.

¹⁰ – Бис нени эдетенис? – деп, улус сурап турарда,

¹¹ олорго каруу јандырган: – Эки чамчалу кижи бирӱзин чамча јогына берзин. Аш-курсакту кижи анайда ок этсин.

¹² Креске тӱжерге каланчылар база келген. – Ӱредӱчи, бис нени эдетенис? – деп, олор сурагандар.

¹³ Иоанн олорго: – Улустаҥ артык неме некебегер – деген.

¹⁴ Анайып ок јуучылдар: – Бис нени эдетенис? – деп сурагандар. Ол айткан: – Кемди де тарындырбагар, тӧгӱндеп бурулабагар, ишјалыгарла болорзыныгар.

¹⁵ Сакылтада јӱрген улус: «Шак бу кижи Христос болды ба?» – деп, ончозы ичинде Иоанн керегинде сананып турган.

¹⁶ Је Иоанн ончозына айткан: – Мен слерди суула крестеп јадым. Је менеҥ кӱчтӱзи келедири, мен Оныҥ ӧдӱгиниҥ буузын да чечерге турбазым. Ол слерди Агару Тынла, отло крестеер.

¹⁷ Оныҥ кӱреги колында, Ол идиргенин арутап, буудайын алмарына урар, саламын дезе, ӧчпӧс отко таштап, ӧртӧӧр.

¹⁸ Иоанн улусты анайып ла кӧп ӧскӧ дӧ сӧстӧрлӧ бӱдӱндирип, Сӱӱнчилӱ Јар јарлап јӱрген.

¹⁹ Тӧрт тӧчинниҥ бирӱзин башкарган Ирод бойыныҥ карындажыныҥ абакайын Иродиаданы алганы учун, ӧскӧ дӧ јарабас кылыктары учун Иоанн оны бурулап турган.

²⁰ Ирод дезе, база бир јарабас керек эдип, Иоаннды тӱрмелеп койгон.

Иисус Христостыҥ креске тӱшкени

²¹ Улус ончозы креске тӱжӱп турарда, Иисус база креске тӱжеле, мӱргип турарда, кӧк-теҥери ачылып,

²² Агару Тын кӱӱлениҥ кеберин алынып, Оныҥ ӱстине тӱжӱп келди, теҥеридеҥ ӱн угулды: – Сен Мениҥ сӱӱген Уулым, Сенде Мениҥ јакшылыкту табым!

Иисус Христостыҥ ада-ӧбӧкӧлӧри

²³ Иисус бойыныҥ керегин эдип баштаарда, одус јаш кирелӱ болгон. Оны улус Иосифтиҥ уулы, Илийдиҥ јеен уулы деп бодогон.

²⁴ Оныҥ арткан ада-ӧбӧкӧлӧри: Матфат, Левий, Мелхий, Ианнай, Иосиф,

²⁵ Маттафий, Амос, Наум, Еслим, Наггей,

²⁶ Мааф, Маттафий, Семей, Иосиф, Иуда,

²⁷ Иоаннан, Рисай, Зоровавел, Салафиил, Нирий,

²⁸ Мелхий, Аддий, Косам, Елмодам, Ир,

²⁹ Иосий, Елиезер, Иорим, Матфат, Левий,

³⁰ Симеон, Иуда, Иосиф, Иоанан, Елиаким,

³¹ Мелеай, Маинан, Маттафай, Нафан, Давид,

³² Иессей, Овид, Вооз, Салмон, Наассон,

³³ Аминадав, Арам, Есром, Фарес, Иуда,

³⁴ Иаков, Исаак, Авраам, Фарра, Нахор,

³⁵ Серух, Рагав, Фалек, Евер, Сала,

³⁶ Каинан, Арфаксад, Сим, Ной, Ламех,

³⁷ Мафусал, Енох, Иаред, Малелеил, Каинан,

³⁸ Енос, Сиф, Адам, Кудай.