Лука 20 - Јаҥы Кереес

Иисустыҥ јаҥы

¹ Иисус байзыҥда улусты ӱредип, Сӱӱнчилӱ Јар јарлап јӱрген кӱндердиҥ бирӱзинде улу абыстар, бичикчилер јаандарла кожо базып келеле,

² Ого айттылар: – Биске айт, мыны кандый јаҥла эдип тургаҥ, андый јаҥды Сеге кем берген?

³ Иисус олорго каруу јандырды: – Мен де слердеҥ бир неме сурап угайын, Меге айдыгар:

⁴ Иоанныҥ крестеп јӱргени теҥеридеҥ болгон бо, эмезе улустаҥ ба?

⁵ Олор дезе бойы ортодо табыштылар: «„Теҥеридеҥ“ дегей эди, ол тушта: „Ого не керек бӱтпедигер?“ – деер.

⁶ „Улустаҥ“ дезебис, ончозы бисти ташла шыбалап ӧлтӱрер, нениҥ учун дезе Иоанныҥ јарлыкчы болгонына бӱткилеп јат».

⁷ «Кайдаҥ болгонын билбезис» – дедилер.

⁸ Иисус олорго айтты: – Мыны кандый јаҥла эдип турганымды слерге Мен де айтпазым.

Јалданган ишчилер керегинде

⁹ Оноҥ Иисус улуска мындый укаа сӧс айтты: – Бир кижи виноград-агаш тарыйла, оны ишчилерге табыштырып, узакка атана берген.

¹⁰ Бойыныҥ ӧйинде виноградтыҥ јиилегинеҥ ого берзин деп, ишчилерге кулын ийген. Је олор ийген кулды токпоктойло, как куру јандыргандар.

¹¹ Виноград ээзи ӧскӧ кулын ийген, је онызын да токпоктоп, электейле, база как куру јандыргандар.

¹² Ӱчинчи кулын ийерде, оны шыркалап, сӱрӱп ийгендер.

¹³ Айдарда, виноград ээзи айткан: «Эмди канайдайын? Карузыган уулымды ийедим, айса болзо, олор оноҥ уйалар».

¹⁴ Је ишчилер байагы уулды кӧрӧлӧ, бой-бойы ортодо шӱӱшкендер: «Адазыныҥ энчизин алар уул бу. Оны ӧлтӱрип салалы, энчи бистийи болор».

¹⁵ Уулды виноградту садтыҥ тыштына чыгара таштап, ӧлтӱрип койгондор. Виноград-агаштыҥ ээзи эм олорды канайдар деп туругар?

¹⁶ Келип, байагы ишчилерди ӧлтӱрер, виноградты дезе ӧскӧ улуска табыштырар. Мыны угуп турган улус: – Андый неме болбос! – дештилер.

¹⁷ Иисус олорго кезе кӧрӱп, айтты: – Айдарда, «Тура тудаачылар јектеп койгон таш булуҥныҥ тӧзиндеги таш болуп калды» – деп бичилгени не болотон?

¹⁸ Ол ташка јыгылган кандый ла кижи јер башка чачылар; таш кемниҥ ӱстине тӱшсе, оны былчып койор.

¹⁹ Улу абыстар ла бичикчилер бу укаа сӧстӧ олор керегинде айдылганын билип ийдилер. Иисусты каруулга алайын дейле, улустаҥ коркыдылар.

Калан керегинде сурак

²⁰ Иисусты кетежип, Ого бир канча улус ийдилер. Олор ак-чек улус болуп кӧрӱнип, јаҥныҥ ла башчыныҥ колына Оны табыштырып берерге, Оныҥ сӧзинеҥ јик табар учурлу болгон.

²¹ Ийген улус барып, Ого айттылар: – Ӱредӱчи! Сениҥ айткан сӧзиҥ ле ӱредӱӱҥ чындык болгонын, улусты ылгаштырбай, Кудайдыҥ јолына чын ӱредип турганыҥды бис билерис.

²² Биске Рим каганына калан тӧлӧӧргӧ јараар ба, эмезе јок по?

²³ Иисус олордыҥ меке-сӱмезин билип, айтты: – Мени не ченеп турыгар?

²⁴ Меге динарий акча кӧргӱзигер: анда кемниҥ сӱри ле ады? Олор: – Кагандыйы – дедилер.

²⁵ Ол айтты: – Анайдарда, кагандыйын каганга беригер, Кудайдыйын – Кудайга.

²⁶ Улус алдында Оныҥ сӧзинеҥ јик таап болбой, берген каруузына кайкажып, унчукпай туруп калдылар.

Тирилиш керегинде сурак

²⁷ Ӧлгӧндӧр тирилбес дежетен бир кезик саддукейлер келип, Иисустаҥ сурадылар:

²⁸ – Ӱредӱчи! Аказы ӱйлӱ бололо, бала јок ӧлгӧжин, оныҥ ӱйин карындажы алып, аказыныҥ угын улалтар учурлу деп, Моисей биске бичип берген эди.

²⁹ Јети карындаш улус болгон. Бирӱзи кижи алала, бала јокко јада калган.

^30-31 Ӱй кижини экинчи, ӱчинчи карындажы алган, анайып јетилези алып, бала артырбай, ончозы јада калгандар.

³² Оноҥ ӱй кижи де јада калган.

³³ Эмди, айдарда, тирилгежин, бу јети эрдиҥ кажызыныҥ ӱйи болор ол? Оны јетилези алган ине.

³⁴ Иисус олорго каруу јандырды: – Бу чактыҥ улузы кижи алып, кижиге барып јадылар.

³⁵ Је ӧлӧлӧ, тирилерге, келер ӧйдӧ јӱрерге једип алган јарамык улус кижи де албас, кижиге де барбас;

³⁶ ӧлӱп те болбос, ангелдер чилеп јӱрер. Олор Кудайдыҥ балдары болгылаар – тиргискен балдар.

³⁷ Кӱйӱп јалбыраган тайа-јыраа керегинде куучынында Моисей Кайраканды Авраамныҥ Кудайы, Исаактыҥ Кудайы ла Иаковтыҥ Кудайы деп адап, ӧлгӧн улус тирилер деп кӧргӱскен.

³⁸ Је Кудай – Ол ӧлгӧндӧрдиҥ Кудайы эмес, Ол эзен јӱргендердиҥ Кудайы. Кудайга ончо улус тирӱ.

³⁹ Кезик бичикчилер: – Јакшы айттыҥ, Ӱредӱчи! – дештилер.

⁴⁰ Иисустаҥ кем де, нени де сураарга тидинбеди.

Христос кем?

⁴¹ Иисус дезе олорго айтты: – Улус нениҥ учун Христосты Давид Уулы дежет?

⁴² Сарындардыҥ бичигинде Давид бойы мынайда айткан эмес беди: «Кайракан Кайраканыма айткан:

⁴³ „Ӧштӱлериҥди будыҥныҥ јанына салып бербегенчем, оҥ јаныма отур“».

⁴⁴ Анайдарда, Давид бойы Христосты Кайракан деп адап турганда, Ол канайып оныҥ Уулы болотон?

⁴⁵ Ончо улус угуп турарда, Ол ӱренчиктерине айтты:

⁴⁶ – Узун эдектӱ кеп кийип базып јӱрерин сӱӱр бичикчилердий болбоско, бойыгарды тудуныгар. Олор тепсеҥдерде уткыдарын, синагогаларда ичкери ӧдӱп отурарын, той-јыргалда тӧрдӧ кыйын отурарын сӱӱп јадылар.

⁴⁷ Булар, тул ӱй улустыҥ јӧӧжӧзин ӱптеп јип, улус кӧзинче узак мӱргип турган бойлоры, там буруга калар!