Лука 2 - Јаҥы Кереес

Иисус Христостыҥ туулганы

¹ Ол кӱндерде Рим каганы Август ончо јердеги улустыҥ тын-тоозын алзын деп јакарган.

² Квириний Сирияны башкарып турарда, бу баштапкы тооалыш болгон.

³ Ончозы бичидерге, кажызы ла бойыныҥ калазына бардылар.

⁴ Иосиф Давид угынаҥ, оныҥ калдыгы болгон. Оныҥ учун Галилейдеги Назарет каладаҥ Иудейдеги Давидтиҥ Вифлеем дейтен калазына барды.

⁵ Оныла кожо кол алыштырган, барлу болгон Мария барды.

⁶ Вифлеемде Марияныҥ бала табар ӧйи једип,

⁷ тун уул бала тапты. Айылчы тӱжер ӱйде олорго јер табылбаган учун, Оны чуулайла, ӧлӧҥ салгышка салып койды.

⁸ Ол јерде јалаҥда кӱдӱчилер ӱӱрлӱ койын коно каруулдап тургандар.

⁹ Олорго Кайраканныҥ ангели кӧрӱнип, олорды Кайраканныҥ магыныҥ јаркыны чалыдып ийди. Кӱдӱчилер сӱрекей коркыды.

¹⁰ Је ангел олорго: – Коркыбагар! – деди. – Мен слерге Сӱӱнчилӱ Јар – ончо улуска улу сӱӱнчи экелип јадым.

¹¹ Бӱгӱн Давидтиҥ калазында слерге Аргадаачы туулды – Христос Кайракан!

¹² Бат, слерге темдек: ӧлӧҥ салгышта чуулу јаткан баланы кӧрӧригер.

¹³ Сакыбаган јанынаҥ ангелле кожо теҥериниҥ кӧп черӱчилдери кӧрӱнип, Кудайды алкай бердилер:

¹⁴ – Кӧк-теҥериде Кудайга мак болзын, јерде амыр, улус ортодо Кудайдыҥ јакшылыкту кӱӱн-табы болзын!

¹⁵ Ангелдер теҥери ӧрӧ чыга берерде, кӱдӱчилер бой-бойына айтты: – Вифлеемге барып, анда не болгонын, Кайраканныҥ биске айтканын кӧрӧлик.

¹⁶ Јылгырлап барала, Марияны, Иосифти ле ӧлӧҥ салгышта јаткан баланы таап алдылар.

¹⁷ Баланы кӧрӧлӧ, Ол керегинде нени укканын куучындап бердилер.

¹⁸ Кӱдӱчилердиҥ куучынын уккан улус ончозы алаҥ кайкажып турдылар.

¹⁹ Мария дезе, бу сӧстӧрди ончозын кӧксине алынып, ундыбай јӱрген.

²⁰ Кӧргӧни-укканы учун Кудайды алкап ла мактап, кӱдӱчилер кайра бурылдылар: ончозы ангелдиҥ айтканыла болгон.

²¹ Сегис кӱнниҥ бажында, баланы томдойтон ӧй једерде, Ого Иисус деп ат бердилер. Оны анайып энеде табылгалактаҥ озо ангел адаган.

Иисус байзыҥда

²² Моисейдиҥ Јасагыла олордыҥ арутанар кӱндери тӱгенерде, баланы Кайраканга учурлаарга, Иерусалимге экелдилер.

²³ Кайраканныҥ Јасагында анайда ла бичилген: «Эр киндиктӱ болуп тун туулганныҥ кажызы ла Кайракандыйы болор».

²⁴ Олор анайда ок Кайраканныҥ Јасагыла эки кӱӱлечек эмезе кӱӱлениҥ эки балазын тайар учурлу болгон.

²⁵ Ол тушта Иерусалимде Симеон деп кижи јуртаган. Ол акту, ак санаалу кижи болгон, Израильди Кудай аргадаар кӱнди сакып јӱрген. Ол кижиде Агару Тын болгон.

²⁶ Кудай ийген Христосты кӧрбӧгӧнчӧҥ, ӧлбӧзиҥ деп, ого Агару Тыннаҥ кӱн-эртеде айдылып калган.

²⁷ Агару Тын Симеонды байзыҥга экелди. Кудайдыҥ јаҥын јаҥдаарга, ада-энези Иисус баланы экелерде,

²⁸ Симеон Оны колго алып, Кудайды алкайла, айтты:

²⁹ – Кайракан! Бойыҥныҥ айтканыҥла, эмди кулыҥды амырыла божодып јадыҥ.

³⁰ Мениҥ кӧзим Сениҥ аргадажыҥды кӧрди.

³¹ Сен оны ончо калыктар алдында белетегеҥ:

³² ӧскӧ калыктарга ачылтаны, Израиль калыгыҥа мак берип турган јарыкты.

³³ Иосиф ле Мария бала керегинде айтканын кайкап уктылар.

^34-35 Симеон олорды алкайла, Иисустыҥ энезине, Марияга, айтты: – Бу баладаҥ улам Израильде кӧп улус јыгылар, кӧбизи ӧрӧ турар, сениҥ де јулаҥнаҥ ӱлдӱ ӧдӧр. Бу бала Кудайдыҥ билдизи болор, Ого удура кӧп улус туруп чыгар, онызыла олор кӧгӱстеринде алып јӱрген санааларын ачар.

³⁶ Байзыҥда анайда ок Ханна јарлыкчы болгон. Ол Асир укту, Фануилдиҥ кызы, јетире ле јажап калган. Барган кижизиле јети јыл јуртайла, тул калган.

³⁷ Оноҥ ло бери сегизен тӧрт јашка јеткенче тул јӱрген. Байзыҥнаҥ ырабай, тӱни-тӱжи мӱргип, орозо тудуп, Кудайга јалчы болуп јӱрген.

³⁸ Бу ӧйдӧ ол базып келеле, Кудайга алкыш јетирип, Кудай Иерусалимди јайымдаарын сакып јӱрген ончо улуска бала керегинде айдып турды.

³⁹ Иосиф ле Мария Кайраканныҥ јаҥын јаҥдайла, Галилейдеги Назарет калазына јанып келдилер.

⁴⁰ Бала дезе чыдап, кӱчи кирип, ойгорып турган. Кудайдыҥ јакшылыгы Оныҥ Бойында болгон.

⁴¹ Иисустыҥ ада-энези јылдыҥ сайын Иерусалимге Пасха байрамга барып туратан.

⁴² Ол он эки јашту болордо, олор јаҥжыкканыла Иерусалимге байрамдап бардылар.

⁴³ Байрамныҥ кӱндери божоордо, јанып ийдилер, Иисус дезе Иерусалимде артып калды. Иосиф ле Оныҥ энези мыны билбей,

⁴⁴ Ол ӧскӧ улусла кожо келип јаткан деп бодогон. Кӱндик јерди ӧдӧлӧ, тӧрӧӧндӧрдиҥ, кӧрӱш-таныштардыҥ ортозынаҥ бедирей бердилер.

⁴⁵ Таппай салала, Оны бедиреп, Иерусалимге бурылдылар.

⁴⁶ Иисусты ӱч кӱнниҥ бажында байзыҥнаҥ таптылар. Ол ӱредӱчилердиҥ айтканын угуп, сурактар берип, олордыҥ ортозында отурган.

⁴⁷ Уккан улус ончозы Оныҥ керсӱзин ле карууларын кайкажып тургандар.

⁴⁸ Ада-энези Оны кӧрӧлӧ, алаҥ кайкадылар, энези Ого айтты: – Балам! Бу Сен кайттыҥ, не онойдо кылындыҥ? Адаҥ да, мен де Сени бедиреп, ал-сагышка тӱштис.

⁴⁹ – Мени не керек бедиредигер? – деп, Ол сурады. – Мен Адамныҥ айлында болотонымды билбедигер бе?

⁵⁰ Је олор Оныҥ айтканын оҥдободылар.

⁵¹ Иисус ада-энезиле кожо барып, Назаретке келди, олорго сӧсуккур јӱрди. Энези дезе Оныҥ айткан сӧстӧрин кӧксинде чебер алып јӱрди.

⁵² Иисус чыдаган сайын, ойгоры кӧптӧп, Кудайдыҥ да, улустыҥ да алкыш-быйаны Ого тыҥып турды.