Лука 17 - Јаҥы Кереес

Кинчек ле бӱдетени керегинде

¹ Иисус ӱренчиктерине айтты: – Јаманга баштайтан немелер келбегенче болбос, је олор кем ажыра келген, ого ачу-корон!

² Бу кичӱлердиҥ кажы бирӱзин јаманга баштаган кижиниҥ мойнына теерменниҥ тажын буулап, оны талайга таштаган болзо, ого торт болор эди.

³ Мынаҥ чеберленип јӱрӱгер! Карындажыҥ сеге јаман эткежин, каарып айт, кинчегин алынза, јаманын таштап кой.

⁴ Кӱнине јети катап јаман эделе, сеге јети катап келип, «Мен бурулу» дегежин, јаманын таштап кой.

⁵ – Кудайга бӱдер кӱӱнибисти тыҥыдарга болуш – деп, апостолдор Кайраканды сурадылар.

⁶ Кайракан каруу јандырды: – Бӱдӱмјигер горчицаныҥ ӱренинче болуп, бу турган агашка: «Тазыл-тамырыҥла кожо кодорылып, бойыҥды бойыҥ талайга апарып отургус!» – деген болзогор, ол слерге багар эди.

⁷ Кажы бирӱгер кыралап эмезе малдап јӱрген кулду болзын. Байагы кул иштеҥ јанып келзе, ого: «Капшай отурып ажан!» – деп айдар бедигер?

⁸ Карын, мынайда айдар јогоор бо: «Меге казан ас, мен ичип-јип отурганчам, курчанып алып, мени кӱндӱле, оноҥ бойыҥ ичип-јиириҥ».

⁹ Јакаругарды бӱдӱрген кулыгарга алкыш-быйаныгарды айдар бедигер?

¹⁰ Анайып ок слер де, јакаруны бӱдӱреле, мынайда айдыгар: «Бис неге де турбас кулдар эдибис, бис јӱк молју-керегисти бӱдӱрдис».

¹¹ Иерусалим јаар јолдо Иисус Самар ла Галилейдиҥ ортозыла барып јаткан.

¹² Бир јуртка кирип јадарда, Ого капкаш балулу он кижи учурады. Олор ыраагында токтой тӱжӱп,

¹³ кыйгырыжа бердилер: – Иисус, Ӱредӱчи! Биске буурза!

¹⁴ Олорды кӧрӧлӧ, Иисус: – Абыстарга барып кӧрӱнигер – деди. Олор барып јадала, арутала бердилер.

¹⁵ Олордыҥ бирӱзи дезе, бойыныҥ јазылганын кӧрӧлӧ, ойто бурылды. Тыҥ ӱнденип Кудайды алкап,

¹⁶ Иисустыҥ будыныҥ јанына кӧҥкӧрӧ јыгылып, Ого алкыш-быйанын јетирип турды. Ол самар кижи болгон.

¹⁷ – Аруталганы он кижи эмес беди? Арткан тогузы кайда? – деп, Иисус сурады. –

¹⁸ Кудайга алкыш-быйанын јетирерге, ӧскӧ укту бу кижидеҥ башка, олордыҥ бирӱзи де келбеди бе? – дейле,

¹⁹ ого айтты: – Тур, бар. Бӱдӱп турганыҥ сени аргадап алды.

Кудайдыҥ Каандыгыныҥ келери

²⁰ Кудайдыҥ Каандыгы качан келер деп, фарисейлер сураарда, Иисус каруу јандырды: – Кудайдыҥ Каандыгы танылу келбес.

²¹ «Ол мында!» эмезе «Туку анда!» дебес, нениҥ учун дезе Кудайдыҥ Каандыгы – ӧзӧк-кӧксигерде.

²² Ӱренчиктерине дезе айтты: – Кижи Уулыныҥ ого јӱк бир де кӱнин болзо кӧрӧр кӱӱнигер келер ӧй болор, је оны кӧрбӧзигер.

²³ Слерге: «Ол мында!», «Туку анда!» – дешкилеер. Тап эдип, олордыҥ кийнинеҥ јӱгӱрбегер.

²⁴ Јалт эделе, теҥериниҥ бир учынаҥ экинчи учына јетире јарыдып ийген јалкындый, Кижи Уулы Бойыныҥ кӱнинде андый болор.

²⁵ Је озо баштап Ол кӧп кыйналар, бу ӱйениҥ улузы Оноҥ јана тӱжер учурлу.

²⁶ Нойдыҥ кӱндеринде болгондый, Кижи Уулыныҥ кӱндеринде андый ок болор:

²⁷ Ной ковчегке кирердиҥ киргенче, улус ичип-јип јаткан, кижи алары алып, кижиге барары барып турган. Оноҥ чайык чыгып, ончозы чӧҥӱп калган.

²⁸ Лоттыҥ кӱндеринде база андый ок болгон: улус ичкен-јиген, садышкан, аш салган, агаш тарыган, туралар туткан.

²⁹ Је Лот Содомноҥ јӱре берген кӱн теҥеридеҥ от ло кӱкӱр јаап, ончозы кырылып калган.

³⁰ Кижи Уулы ачылар кӱн андый ок болор!

³¹ Ол кӱн јабынчыда болгон кижи, не-немези дезе айылдыҥ ичинде болгожын, онызын алайын деп тӱшпезин; кырада јӱргени, бурылбазын!

³² Лоттыҥ абакайын эзеп јӱригер!

³³ Јӱрӱмин чеберлейин дегени, онызын јылыйтар, јӱрӱмин јылыйтканы, онызын тындандырып алар.

³⁴ Айдып турум слерге, ол тӱнде эки кижи бир тӧжӧктӧ јадар: бирӱзин апаргылаар, бирӱзин дезе артырып койгылаар;

³⁵ эки ӱй кижи кол теермен тартар: бирӱзин апаргылаар, бирӱзин дезе артырып койгылаар.

³⁶ Кырада эки кижи јӱрер: бирӱзин апаргылаар, бирӱзин дезе артырып койгылаар.

³⁷ Айдарда, ӱренчиктер Оноҥ сурадылар: – Бу кайда болор, Кайракан? Иисус айтты: – Сӧӧк јаткан јерге кан-кеределер јуулар.