Иоанныҥ 3-чи самаразы 1 - Јаҥы Кереес

¹ Серкпениҥ јаанынаҥ – кару Гаийге. Мен ого чынынча буурзап јадым.

² Кару карындаш! Тыныҥ чылап, ончозында једимдӱ болуп, сени су-кадык јӱрзин деп мӱргийдим.

Чында јӱрери

³ Карындаштар келип, сениҥ чындыгыҥды, чындыкта канайып базып јӱргениҥди керелеерде, сӱреен сӱӱндим.

⁴ Балдарым чындыкта базып јӱргендерин угарынаҥ јаан сӱӱнчи менде јок.

⁵ Кару карындаш! Карындаштарга ла ӧскӧ јердиҥ улузына нени эткениҥде, чын эдип јадыҥ.

⁶ Олор сениҥ сӱӱжиҥди серкпе алдында керелеген. Кудайга јарамык эдип, олорго јорыгын улалтарга болушсаҥ, јакшы эдериҥ.

⁷ Олор ӧскӧ улустаҥ нени де албай, Христоско болуп јолго чыккан ине.

⁸ Анайдарда, биске чындыкта кожо туружарга, бис олордый улусты јӧмӧӧр учурлу.

Јаман эдеечи – Кудайды кӧрбӧгӧн

⁹ Мен серкпеге бичиген эдим, је олордо баштапкы болорго сӱӱйтен Диотреф бисти јуутпай јат.

¹⁰ Оныҥ учун келзем, оныҥ эдип јӱрген керектерин эске алындырарым. Ол бис керегинде јаман куучын-эрмек јайат. Онызыла болорзынбай, карындаштарды бойы да јуутпай, јуударга кӱӱнзеген улусты буудактап, серкпедеҥ чыгара сӱрет.

¹¹ Кару карындаш! Јаманга эмес, јакшыга тӱҥейлеш. Кем јакшыны эткен – Кудайдаҥ. Јаман эдеечи кижи – Кудайды кӧрбӧгӧн.

¹² Димитрий керегинде бастыра улус ла чындыктыҥ бойы јакшы керелейт. Анайда ок бис те керелейдис. Бистиҥ керебис чын болгонын билеригер.

¹³ Сеге бичийтеним кӧп эди, је сеге чернеле, каламла бичиир кӱӱним јок.

¹⁴ Сени удабас кӧрӧрим деп, иженип турум. Ол тушта акту бойыбыс эрмектежерис.

¹⁵ Сеге амыр јетсин. Сеге најылар эзенин айдып турулар. Најылардыҥ кажызына ла эзенисти јетир. Аминь.