Иоанныҥ 1-кы самаразы 5 - Јаҥы Кереес

Телекейди јеҥгени – Кудайга бӱткенис

¹ Иисус – ол Христос деп бӱткен кажы ла кижи Кудайдаҥ туулган. Тууганды сӱӱген кижи, Оныҥ Бойынаҥ туулганды да сӱӱп турганы ол.

² Кудайдыҥ балдарын сӱӱп турганысты мынаҥ биледис: Кудайды сӱӱп, Оныҥ јакылталарын бӱдӱрип јӱрзебис.

³ Кудайдыҥ јакылталарын бӱдӱрип јӱрзебис – Оны сӱӱп јадыбыс. Оныҥ јакылталары уур эмес,

⁴ нениҥ учун дезе Кудайдаҥ туулганы бу телекейдиҥ јаҥын јеҥет. Телекейдиҥ јаҥын јеҥген бу јеҥӱ, – бистиҥ бӱдӱмјибис.

⁵ Кем телекейдиҥ јаҥын јеҥет? Иисус – ол Кудайдыҥ Уулы деп бӱдӱп турган кижи телекейдиҥ јаҥын јеҥет.

⁶ Иисус Христос биске суу, кан ла Тын ажыра келген. Јаҥыс та суула эмес, је суула, канла. Онызын Тын керелейт, нениҥ учун дезе Тын – ол чындык.

⁷ Теҥериде ӱчӱ керелейт: Ада, Сӧс лӧ Агару Тын. Бу ӱчӱниҥ учуры јаҥыс.

⁸ Јерде ӱчӱ керелейт: тын, суу ла кан. Ӱчӱлези бирӱни керелейт.

⁹ Улустыҥ керезин јарадып турган болзобыс, Кудайдыҥ керези – јаан. Бат, Кудайдыҥ керези: Ол Бойыныҥ Уулын керелейт.

¹⁰ Кудайдыҥ Уулына бӱдеечи, бойында бойы керелӱ. Кудайга бӱтпей турганы, Оны тӧгӱнчи эдет, нениҥ учун дезе ол Кудай Бойыныҥ Уулын керелеген кереге бӱтпеген.

¹¹ Кере дезе Кудай биске ӱргӱлји јӱрӱм бергенинде, бу јӱрӱм – Оныҥ Уулында.

¹² Уулдузы јӱрӱмдӱ, Кудайдыҥ Уулы јогы – јӱрӱм јок.

¹³ Слер ӱргӱлји јӱрӱмдӱ болгоныгарды билзин деп, мыны слерге, Кудайдыҥ Уулына бӱдӱп турган улуска, бичидим.

¹⁴ Оныҥ алдында бисте бар бӱдӱмји – Оныҥ табыла нени суразабыс, Ол бисти угуп турганында.

¹⁵ Нени де суразабыс, Ол бисти угуп турганын билер болзобыс, Оноҥ сураганысты алып турганысты да билерис.

¹⁶ Ӧлӱмге јетирбес кинчек эдип турган карындажын кӧргӧн кижи мӱргизин, Кудай ого јӱрӱм берзин. Ӧлӱмге апарбас кинчек эткен улус керегинде айдадым. Ӧлӱмге јетирер кинчек бар: андый кинчек эдеечилер учун оны мӱргизин деп айтпай јадым.

¹⁷ Кандый ла тӧгӱн – ол кинчек, је ӧлӱмге экелбес кинчек бар.

¹⁸ Бис билерис, Кудайдаҥ туулган кандый ла кижи кинчек этпей јат. Је Кудайдаҥ туулган кижи бойын чеберлеп јат, ого јаман тийбей јат.

¹⁹ Бис – Кудайдаҥ деп, бис билерис. Телекей дезе бӱткӱлинче јаманныҥ табында.

²⁰ Бисти Чын Болгонды билип турзын деп, Кудайдыҥ Уулы келип, биске санаа бергенин, бис билерис. Бис – Чын Болгондо, Оныҥ Иисус Христос Уулында. Ол – чын Кудай ла ӱргӱлји јӱрӱм.

²¹ Балдар! Бойыгарды чалулардаҥ чеберлегер. Аминь.