Иоанныҥ 1-кы самаразы 3 - Јаҥы Кереес

Кудайдыҥ балдары

¹ Кудайдыҥ балдары деп адаларга Адабыс биске кандый сӱӱш бергенин кӧригер. Бис чындаптаҥ Кудайдыҥ балдары. Бу телекейдиҥ улузы Оны билип албаган учун бисти билбес.

² Кару улузым! Бис эмди Кудайдыҥ балдары. Је кандый болорыс, эм тура ачылгалак. Христос ачылза, Ого тӱҥей болорысты билерис, нениҥ учун дезе Ол кандый болгонын кӧрӱп ийерис.

³ Ого мындый ижемјилӱ кандый ла кижи, Ол ару болгоны чылап, бойын арутайт.

⁴ Кинчек эдеечи кандый ла кижи јарамасты да эдет. Кинчек – ол јарамас.

⁵ Ол бистиҥ кинчектеристи Бойына аларга ачылганын ла Оныҥ Бойында кинчек јогын слер билеригер.

⁶ Оныла бирлик јӱреечи кандый ла кижи кинчек этпейт. Кинчек эдеечи кажы ла кижи Оны кӧрбӧгӧн, Оны билип албаган.

⁷ Балдар! Слерди кижи астыктырбазын. Кудай акту болгоны чылап, чынды эдеечи акту.

⁸ Кинчек эткен кижи – кӧрмӧстӧҥ, нениҥ учун дезе озо баштап кӧрмӧс кинчек эдет. Мыныҥ учун кӧрмӧстиҥ керектерин бузарга Кудайдыҥ Уулы ачылган.

⁹ Кудайдаҥ туулган не ле кижи кинчек этпейт, нениҥ учун дезе Оныҥ ӱрени оныҥ бойында јӱрет. Ол кинчек эдип болбос, нениҥ учун дезе Кудайдаҥ туулган.

¹⁰ Кудайдыҥ балдары ла кӧрмӧстиҥ балдары мынайда танылып јат: чынды этпей, карындажына карузыбай турган кандый ла кижи – Кудайдаҥ эмес.

Бой-бойыгарга карузыгар

¹¹ Бат, бажынаҥ ала слер уккан јар: бис бой-бойыбыска карузыыр учурлу.

¹² Јаманга баштадып, бойыныҥ карындажын ӧлтӱрген Каиндий болбогор. Нениҥ учун оны ӧлтӱрген? Оныҥ керектери јаман, карындажындыйы акту болгон учун.

¹³ Бу телекейдиҥ улузы слерди јаман кӧрӱп турган болзо, кайкабагар, карындаштар.

¹⁴ Ӧлӱмнеҥ јӱрӱмге кечкенисти бис билерис, нениҥ учун дезе карындаштарга карузып јадыбыс. Карындажына карузыбай турганы, ӧлӱмде јӱрет.

¹⁵ Бойыныҥ карындажын јаман кӧрӧӧчи кандый ла кижи, – кижи ӧлтӱреечи. Кандый да ӧлтӱреечиде ондо јӱретен ӱргӱлји јӱрӱм јок деп, слер билеригер.

¹⁶ Ол бис учун Бойыныҥ јӱрӱмин бергенинеҥ сӱӱшти билип алганыс. Бис те тыныбысты карындаштар учун салар учурлу.

¹⁷ Бу јерде јеткилдӱ бойы, карындажы немеге јединбей турганын кӧрӱп, кӧзин јапкан кижиде Кудайдыҥ сӱӱжи канайып јӱретен?

¹⁸ Балдар! Сӧслӧ, тилле эмес, је керекле, чынла сӱӱйли.

^19-20 Мынаҥ бис чындыктаҥ болгонысты билерис. Јӱрегис бисти јаргылап та турган болзо, Кудайдыҥ алдында јӱрегисти токынадып койорыс, нениҥ учун дезе Кудай јӱрегистеҥ јаан, Ол ончозын билер.

²¹ Кару улузым! Јӱрегис бисти јаргылабай турган болзо, бис Кудайдыҥ алдында ачык-јарык.

²² Нени де суразабыс, Оноҥ алып јадыбыс, нениҥ учун дезе, Оныҥ јакылталарын чеберлеп, Оныҥ алдында јараганды эдип јадыбыс.

²³ Оныҥ јакылтазы мындый: бис Оныҥ Уулына, Иисус Христоско, бӱдер учурлу, Оныҥ биске јакыганыла бой-бойыбыска карузыыр учурлу.

²⁴ Оныҥ јакылталарын чеберлеечи, Оныҥ Бойында јӱрет. Кудай – ол кижиниҥ бойында. Ол бистиҥ бойыбыста јӱргенин, Ол биске берген Тыннаҥ билип аладыс.