Иоанныҥ 1-кы самаразы 1 - Јаҥы Кереес

Христос – Јӱрӱмниҥ Сӧзи

¹ Слерге бажынаҥ ала не болгонын, нени укканысты, бойыстыҥ кӧзибисле нени кӧргӧнисти, нени ајыктаганысты, колдорыс неге тийгенин – Јӱрӱмниҥ Сӧзи керегинде бичип турубыс.

² Јӱрӱм ачыларда, бу ӱргӱлји Јӱрӱмди кӧргӧнис, Оны слерге керелеп ле јарлап турубыс. Ол Адада болгон, биске ачылган.

³ Нени кӧргӧнисти ле укканысты слерге де јарлап, слер де бисле бирлик болзын деп турубыс. Бис Адабысла, Оныҥ Уулы Иисус Христосло бирлик.

⁴ Сӱӱнчигер толо болзын деп, мыны слерге бичип турганыс бу.

Јарыкта базып јӱригер

⁵ Је бат, Оноҥ угала, эмди слерге јарлап турган Јар: Кудай – ол јарык, Оныҥ Бойында кандый да караҥуй јок.

⁶ Оныла бис бирлик деп айдып, је караҥуйда базып јӱрген болзобыс, тӧгӱнденип, чындыкла этпей јадыбыс.

⁷ Ол јарыкта јӱргени чилеп, јарыкта базып јӱрген болзобыс, бойы бойыбысла бирлик болгоныс ол. Анайып, Оныҥ Иисус Христос Уулыныҥ каны бисти кандый ла кинчектеҥ арутайт.

⁸ Бисте кинчек јок деп турган болзобыс, бойысты бойыс астырып јадыбыс, бистиҥ бойыбыста чындык јок.

⁹ Кинчектеристи айдынып турган болзобыс, Ол, чындык ла акту Бойы, кинчектеристи таштап, бисти кандый ла тӧгӱннеҥ арутаар.

¹⁰ Кинчек этпедис дежип турган болзобыс, Оны тӧгӱнчи эдип јадыбыс, Оныҥ сӧзи бистиҥ бойыста јок.