Иоанн 9 - Јаҥы Кереес

Энедеҥ сокор туулганды јасканы

¹ Иисус барып јадала, энедеҥ сокор туулган кижини кӧрӱп ийди.

² – Равви, ол нениҥ учун сокор туулган? – деп, ӱренчиктер Оноҥ сурадылар. – Кемизи кинчек эткен: ол бойы ба, эмезе ада-энези бе?

³ – Ол до, ада-энези де кинчек этпеген – деп, Иисус каруу јандырды. – Је Кудайдыҥ керектери оныҥ бойында кӧрӱнзин деп, ол сокор туулган.

⁴ Кӱн ӧткӧлӧктӧ, Мени Ийгенниҥ керегин Мен эдер учурлу. Тӱн кирип јат, ол тушта кем де эдип болбос.

⁵ Мен бу телекейдиҥ улузы ортодо тужымда, Мен – олорго јарык.

⁶ Мынайда айдала, Ол јерге тӱкӱрди, чилекейине тобрак кожоло, сокордыҥ кӧзине сӱртӱп,

⁷ айтты: – Силоам деп суубуунтыга барып, јунунып ал. (Силоам дегени, «ийилген» дегени.) Ол барып, јӱзин јунды, кӧрӧр болуп калды.

⁸ Айылдаштары ла башкыда оныҥ сокор болгонын кӧргӧн улус айдышты: – Суранчыктап отураачы кижи бу эмес пе?

⁹ Кезиктери: ол – дешти, кезиктери дезе: јок, ого тӱҥей кижи – дешти. Ол бойы: бу мен – деп турды.

¹⁰ – Кӧзиҥ канайып јарыды? – деп, олор сурадылар.

¹¹ Онызы айтты: – Иисус деген кижи чилекейине тобрак кожуп, кӧзиме сӱртеле, айткан: «Силоамга барып, јунунып ал». Мен барып јунунала, кӧстӱ болуп калдым.

¹² Ол кайда деп сурагылаарда, билбезим – деди.

¹³ Сокор болгонды фарисейлерге апардылар.

¹⁴ Иисус чилекейине тобрак кожуп, оныҥ кӧзин јарытканы дезе суббот кӱнде болгон.

¹⁵ Кӧзи канайып јарыганын фарисейлер база сураарда, ол айтты: – Ол кӧзиме тобрактыҥ чейинтизин салды, мен јунунала, кӧстӱ болуп калдым.

¹⁶ Айдарда, фарисейлердиҥ кезиги айдышты: – Бу кижи Кудайдаҥ эмес, ол суббот кӱнди чекчилебейт. Кезиги айдышты: – Андый кайкалдарды кинчектӱ кижи эдип болор беди? Анайып, олор ортодо бӧлиниш болды.

¹⁷ Сокор болгонноҥ ойто сурадылар: – Ол кижи керегинде не деериҥ, Ол сениҥ кӧзиҥди ачкан ине? – Ол Јарлыкчы – деп, онызы айтты.

¹⁸ Кӧзи јарыган кижиниҥ ада-энезин алдырып албаганча, иудейлер оныҥ сокор болгонына, кӧзи јарыганына бӱтпей турдылар. Оныҥ учун ада-энезин алдырып алып,

¹⁹ олордоҥ сурадылар: – Сокор туулган уулыбыс дегенигер бу ба? Эмди ол канайып кӧрӧр боло берди?

²⁰ – Уулыбыс бу, сокор туулганы чын, онызын билерис.

²¹ Эмди канайып кӧрӧр боло бергенин, оныҥ кӧзин кем ачкан, билбей јадыбыс. Бойынаҥ сурагар, ол чыдап калган, бойы керегинде бойы айтсын.

²² Ада-энези иудейлердеҥ коркып турган учун анайда айткандар. Иудейлер дезе Иисусты Христос деп айдар кижини синагогадаҥ чыгарып саларга јӧптӧжип койгондор.

²³ Оныҥ учун ада-энези: «Ол чыдап калган, бойынаҥ сурагар» – деген.

²⁴ Сокор болгонды экинчи катап алдырып, ого айттылар: – Чынды айдып, Кудайды макта. Ол Кижи кинчектӱ деп, бис билерис.

²⁵ – Ол кинчектӱ бе, јок по, мен билбезим – деп, ол каруу јандырды. – Сокор болгом, эмди кӧрӱп турум, билетеним јаҥыс ол.

²⁶ – Ол сениле нени этти? – деп, олор ойто сурадылар. – Кӧзиҥди канайып јарытты?

²⁷ – Мен слерге айтпай кайттым, је слер укпадыгар – деп, ол каруу јандырды. – База нени угайын деп туругар? Айса слер де Оныҥ ӱренчиктери болорго туругар ба?

²⁸ Олор оны талап, айттылар: – Сен Оныҥ ӱренчиги, бис – Моисейдиҥ ӱренчиктери.

²⁹ Моисейле Кудай тил алышканын билерис. Бу кижи кайдаҥ болгонын билбей турубыс.

³⁰ – Ол кайдаҥ болгонын билбейтенигер кайкамчылу – деп, ол кижи каруу јандырды. – Ол мениҥ кӧзимди јарыткан.

³¹ Је бис билерис, Кудай кинчектӱлерди укпайтан, Кудайды тооп, Оныҥ кӱӱниле эдип јӱргендерди угуп јат.

³² Кем де сокор туулганныҥ кӧзин јарыткан деп, чак бӱдердеҥ бери угулбады.

³³ Ол Кудайдаҥ эмес болзо, нени де эдип болбос эди.

³⁴ – Бастыра бойыҥ кинчектӱ туулала, бисти ӱредип туруҥ ба? – дейле, оны чыгара сӱрӱп ийдилер.

³⁵ Оны чыгара сӱрӱп ийгенин угала, Иисус оны таап алып, айтты: – Кудайдыҥ Уулына сен бӱдӱп јадыҥ ба?

³⁶ – Кайракан, мени Ого бӱтсин деп, Ол кем болгонын айтсаҥ? – деп, ол сурады.

³⁷ – Сен Оны кӧрдиҥ – деп, Иисус айтты. – Сениле эрмектежип турганы Ол.

³⁸ – Бӱдӱп турум, Кайракан! – дейле, ол Иисуска бажырды.

³⁹ Иисус айтты: – Кӧрбӧй тургандар кӧрзин деп, кӧрӱп тургандар сокорсын деп, Мен бу телекейге јаргы эдерге келдим.

⁴⁰ Оныла кожо болгон фарисейлердиҥ кезиги мыны угала, Ого айттылар: – Бис те сокор бо?

⁴¹ Иисус каруу јандырды: – Сокор болгон болзогор, слерде кинчек јок болор эди. Эмди дезе слер кӧрӱп јадыбыс деп айдып турганыгарда, кинчектӱ болуп артып јадыгар.