Иоанн 7 - Јаҥы Кереес

Иисус ла Оныҥ карындаштары

¹ Мыныҥ кийнинде Иисус Иудейде јӱрбеске, Галилей ичиле јӱрди, нениҥ учун дезе иудейлер Оны ӧлтӱрерге тургандар.

² Иудейлердиҥ байкан тургузатан деп байрамы јууктап келерде,

³ карындаштары Ого айттылар: – Мынаҥ чыгып, Сениҥ эдип јӱргениҥди ӱренчиктериҥ де кӧрзин деп, Иудей јерине бар.

⁴ Јарлу болойын деген кижи, јажырып неме этпейтен. Сен андый керектер эдип јӱрген болзоҥ, Бойыҥды Бойыҥ бу телекейдиҥ улузына ач.

⁵ Карындаштары да Ого бӱтпей турган учун анайып айткандар.

⁶ Иисус олорго каруу јандырып, айтты: – Мениҥ ӧйим јеткелек, слерге дезе кандый ла ӧй келижип јат.

⁷ Улус слерди јаман кӧрӱп болбос, Мени дезе јаман кӧрӱп јат, нениҥ учун дезе олордыҥ кылынып турганы јаман деп, Мен керелеп айдып јӱрӱм.

⁸ Слер байрамга барыгар, Мен бу байрамга эмди тура барбазым, нениҥ учун дезе Мениҥ ӧйим јеткелек.

⁹ Мынайда айдала, Ол Галилейде артып калды.

¹⁰ Је карындаштары байрамга јӱре берерде, Ол улуска кӧрӱнбей, јажытту барды.

¹¹ Иудейлер Оны байрамнаҥ бедиреп, «Ол кайда?» – деп, сурап турдылар.

¹² Улус ортодо Ол керегинде кӧп куучын јӱрди. Кезиктери: «Ол јакшы кижи», ӧскӧлӧри: «Јок, Ол улусты астыртып јат» дешкилеер болды.

¹³ Андый да болзо, иудейлердеҥ коркып, Ол керегинде кем де ачыгынча айтпай турган.

Байзыҥда јарлыктаганы

¹⁴ Байрамныҥ ортозы киреде Иисус байзыҥга кирип, ӱретти.

¹⁵ Иудейлер кайкап, айдышты: – Бу ӱренбеген Бойы, Агару Бичикти канайып билип туру болбогой?

¹⁶ Иисус айтты: – Мениҥ ӱредӱӱм Менийи эмес, Мени Ийгендийи.

¹⁷ Оныҥ табыла эдип јӱрейин дегени, бу ӱредӱ Кудайдаҥ ба, эмезе Мен Бойымнаҥ таап айдып тургам ба деп, билип алар.

¹⁸ Бойынаҥ таап айдаачы, бойы јакшы атка калайын деп сананат. Је Оны Ийгенге мак бедиреп јӱргени чындык, мекези јок болгоны ол.

¹⁹ Моисей слерге Јасак берген эмес пе? Је слердиҥ кемигер де Јасакты бӱдӱрбей јат. Мени нениҥ учун ӧлтӱрерге турганыгар?

²⁰ – Сениҥ ӧзӧк-буурыҥда шилемир бар ба? – деп, улус каруу јандырды. – Сени кем ӧлтӱрерге туру?

²¹ Иисус каруу јандырып, олорго айтты: – Мен бир ле керек эттим, ончогор кайкап јадыгар.

²² Моисей слерге томдоорын берген – онызы Моисейдеҥ эмес те болзо, адалардаҥ јаҥдалып келген, – слер кижини суббот кӱнде де томдоп јадыгар.

²³ Моисейдиҥ јасагы бузулбазын деп, кижи суббот кӱнде томдодып турганда, суббот кӱнде кижиниҥ бастыра бойын јасты деп, Меге кородоп јадыгар ба?

²⁴ Тыш кебериле јаргылабагар, је чындык јаргыла јаргылагар!

²⁵ Иерусалимниҥ бир кезик улузы айдышты: – Ӧлтӱрерге турган кижизи бу болор бо?

²⁶ Кӧрзӧгӧр дӧ, Ол ачыгынча айдат, Ого кем де неме айтпайт! Ол Христос деп, јаандар чынын билип алган болор бо?

²⁷ Је бу кижи кайдаҥ болгонын билерис. Христос келер болзо, Ол кайдаҥ болгонын кем де билбес.

²⁸ Айдарда, Иисус байзыҥ ичинде јаан ӱнденип, ӱредип айтты: – Слер Мени билеригер, кайдаҥ болгонымды база билеригер, је Мен Бойымнаҥ Бойым келген эмезим, Мени Ийгени чындык, слер Оны билбезигер.

²⁹ Мен Оны билерим, нениҥ учун дезе Мен Оноҥ келгем, Мени ийгени Ол.

³⁰ Оны тудуп алар эбин бедиредилер, је кем де Ого тийбеди, нениҥ учун дезе Оныҥ ӧйи јеткелек болгон.

³¹ Калык ортодоҥ кӧп улус Ого бӱдӱп, «Христос келзе, мыныҥ эткенинеҥ артык кайкал эдер беди?» – дежип турдылар.

³² Улустыҥ анайда айдыжып турганы фарисейлерге угулган. Айдарда, улу абыстар ла фарисейлер Оны тудуп аларга, бойлорыныҥ јалчыларын ийгендер.

³³ Иисус дезе олорго айткан: – Слерле кожо эмеш болорым, оноҥ Мени Ийгенге јӱре берерим.

³⁴ Мени бедиреригер, је таппазыгар, Мен кайда болорым, оноор келип болбозыгар.

³⁵ Айдарда, иудейлер бой-бойына айдыштылар: – Бис таппас кандый јерге барарга туру бу? Еллин ортодо тарай јаткан улустарга барып, анда еллиндерди ӱредерге туру эмеш пе?

³⁶ «Мени бедиреригер, је таппазыгар, Мен кайда болорым, оноор келип болбозыгар» деп айткан сӧзи не сӧс болотон?

Агару Тын керегинде сӧс

³⁷ Байрамныҥ калганчы улу кӱнинде Иисус ӧрӧ туруп, јаан ӱнденип айтты: – Суузап турганы Меге келип, ичсин.

³⁸ Агару Бичикте айдылганыла, Меге бӱткен кижиниҥ ӧзӧгинеҥ тирӱ суулар агып чыгар.

³⁹ Иисус мынайда Ого бӱткен улус алынатан Тынды айткан. Олордо дезе, Иисустыҥ ады макка чыккалакта, Агару Тын јок болгон.

Иисустаҥ улам бӧлиниш

⁴⁰ Улустыҥ кезиги, бу сӧзин угала, айдышты: – Чын, Ол Јарлыкчы!

⁴¹ Ӧскӧлӧри: – Ол Христос! – дедилер. Кезиги дезе: – Христос Галилейдеҥ келетен беди? – дешти. –

⁴² Христос Давидтиҥ ӱренинеҥ, Давидтиҥ турган јери Вифлеемнеҥ келер деп, Агару Бичикте айдылбаган беди?

⁴³ Анайып, Иисустаҥ улам јуулган улус ортодо бӧлиниш болды.

⁴⁴ Олордыҥ кезиктери Оны тудуп аларга сананды, је Ого кем де тийбеди.

⁴⁵ Јалчылар једип келерде, улу абыстар ла фарисейлер олордоҥ сурадылар: – Слер Оны не керек экелбедигер?

⁴⁶ – Ол Кижи чилеп кем де, качан да эрмектенбеген – деп, јалчылар каруу јандырдылар.

⁴⁷ – Слер де Оныҥ мекезине кирип калган болдыгар ба? – деп, фарисейлер олорго айдышты. –

⁴⁸ Бийлердиҥ эмезе фарисейлердиҥ Ого бӱткени бар беди?

⁴⁹ Је бу калык Јасак билбес, каргышка калган ол.

⁵⁰ Олордыҥ бирӱзи, башкыда Иисуска келип барган Никодим, олорго айтты:

⁵¹ – Озо баштап кижиниҥ бойынаҥ укпаганча, нени кылынып туру деп билип албайынча, бистиҥ Јасак кижини јаргылайтан беди?

⁵² – Сен де Галилейдеҥ болорыҥ ба? – деп, олор айттылар. – Шиҥде, Галилейдеҥ јарлыкчы бӱтпейтенин билип аларыҥ.

⁵³ Мыныҥ кийнинде ончозы айылдары сайын таркай берди.