Иоанн 13 - Јаҥы Кереес

Ӱренчиктердиҥ будын јунганы

¹ Пасха байрамныҥ алдында Иисус бу телекейдеҥ Адага баратан ӧйи јеткенин билип, Бойыныҥ улузына бу телекейде карузып, онызын учына јетире кӧргӱсти.

² Кӧрмӧс Иисусты берип ийзин деп шӱӱлтени Симон Искариоттыҥ уулы Иуданыҥ јӱрегине салып койгон. Эҥирде, ажанып отурган ӧйдӧ,

³ Иисус, Адазы ончозын Оныҥ колына бергенин, Бойы Кудайдаҥ келгенин ле ойто Кудайга барып јатканын билип,

⁴ ӧрӧ турды. Катанчыгын чечип, коларткыш алала, курчанды.

⁵ Оноҥ јунгушка суу урды, ӱренчиктердиҥ будын јунуп, курчанып алган коларткыжыла арчый берди.

⁶ Симон-Петрга базып келерде, онызы айтты: – Кайракан, будымды Сен јунарыҥ ба?

⁷ – Эдип турганымды эмди билбей јадыҥ, је соондо билип аларыҥ – деп, Иисус каруу јандырды.

⁸ – Сен будымды качан да јунбазыҥ! – деп, Петр айтты. – Сени јунбазам, Мениҥ энчимде ӱлӱ јок болорыҥ – деп, Иисус каруу јандырды.

⁹ Симон-Петр айтты: – Кайракан, јаҥыс та будымды эмес, колымды да, бажымды да јун!

¹⁰ – Јунулганныҥ јӱк будын јунар керек, оныҥ ончо бойы ару ине – деп, Иисус каруу јандырды. – Слер де ару эмейигер, је ончогор эмес.

¹¹ Иисус Бойын садып јатканды билип, «Ончогор ару эмес» дегени ол.

¹² Олордыҥ будын јунуп, Бойыныҥ кийимин кийеле, ойто кыйын отурып, айтты: – Слерге нени эткенимди билип туругар ба?

¹³ Мени слер Ӱредӱчи ле Кайракан дейдигер, айтканыгар чын: Мен ол болорым.

¹⁴ Анайдарда, Мен, Кайракан ла Ӱредӱчи Бойым, будыгарды јунарымда, слер де бой-бойыгардыҥ будыгарды јунужар учурлу.

¹⁵ Слерди Мениҥ эткенимнеҥ кӧрӱже эдип турзын деп, слерге јозок кӧргӱстим.

¹⁶ Чынын, чынын айдадым слерге: кул бийинеҥ јаан эмес, элчи ийгенинеҥ јаан эмес.

¹⁷ Слер мыны билип, эдип турган болзогор, кежиктӱ болгоныгар ол.

¹⁸ Слердиҥ ончогорды айдып турган эмезим: талдап алгандарымды Бойым билерим. Је Мениле кожо курсак јигени Меге чоҥчойын кӧдӱрди деп, Агару Бичикте айдылган сӧс бӱдер учурлу.

¹⁹ Бу сӧс бӱдердеҥ озо эмди слерге айдып турум, бӱтсе, бу Мен болгоныма слерди Меге бӱтсин деп.

²⁰ Чынын, чынын айдадым слерге: Мениҥ ийер кижимди јуутканы, Мени јуутканы ол. Мени јуутканы дезе, Мени Ийгенди јуутканы.

Садып ийер кижини айтканы

²¹ Мыны айдала, Иисус тыҥ ӧкпӧӧрип, кереледи: – Чынын, чынын айдадым слерге: бирӱгер Мени садып ийер.

²² Ӱренчиктер оп-соп тӱшкилеп, бу кемди айдып туру болбогой деп, бой-бойына кӧрӱжип турдылар.

²³ Ӱренчиктериниҥ бирӱзи, Иисуска кару болгоны, Ого коштой кыйын отурган.

²⁴ Оныҥ айткан кижизи кем болгонын суразын деп, Симон-Петр ого имдеп ийди.

²⁵ Онызы Иисуска эҥчейип, сурады: – Кайракан, ол кем болотон?

²⁶ – Тилим калашты тепшиге сугуп, кажызына берзем, ол болор – дейле, Иисус калашты тепшиге сугуп, Симон Искариоттыҥ уулы Иудага берди.

²⁷ Бу калашты алган кийнинде Иуданыҥ ӧзӧк-буурына сатана кире конды. – Эдип турганыҥды капшай эт – деп, Иисус ого айтты.

²⁸ Је Иисус ого не анайда айтканын кыйын отурган улустыҥ кемизи де оҥдободы.

²⁹ Иудада акчалу кайырчагаш болгон учун кезиги сананды: «Биске байрамга не керек, садып экел эмезе тӱреҥи улуска нени-нени бер деген болор».

³⁰ Иуда тилим калашты алган бойынча, чыга берди. Тӱн болгон.

Јаҥы јакылта

³¹ Ол чыга берерде, Иисус айтты: – Кижи Уулы эмди макталды, Оныҥ Бойында Кудай да макталды.

³² Оныҥ Бойында Кудай макталган болзо, Кудай да Оны Бойында мактадар, Оны саадабай мактадар.

³³ Балдарым, ортогордо узак болбозым. Мени бедиреп јӱреригер, је «Барар јериме келип болбозыгар» деп, иудейлерге айтканымды эмди слерге де айдып турум.

³⁴ Слерге јаҥы јакылта берип турум: бойы бойыгарга буурзап јӱригер. Мен слерге буурзагамдый, бойы бойыгарга буурзап јӱригер.

³⁵ Ортогордо сӱӱш болзо, слерди Мениҥ ӱренчиктерим деп, ончозы танып ийер.

Петрдыҥ јана тӱжерин айтканы

³⁶ – Кайракан, Сен кайдаар барып јаткаҥ? – деп, Симон-Петр Оноҥ сурады. – Мениҥ барар јериме эмди сен Мениҥ кийнимнеҥ барып болбозыҥ, је соондо ээчиде барарыҥ – деп, Иисус каруу јандырды.

³⁷ Петр айтты: – Кайракан, эмди нениҥ учун Сениҥ кийниҥнеҥ барып болбойтом? Сен учун мен јӱрӱмимди берерим.

³⁸ Иисус каруу јандырды: – Мен учун јӱрӱмиҥди берериҥ бе? Чынын, чынын айдадым сеге: пӧтӱк эткелекте, Менеҥ ӱч катап јана тӱжериҥ.