Иаковтыҥ самаразы 3 - Јаҥы Кереес

Тил

¹ Карындаштарым! Мынаҥ кату јаргыла јаргыладарысты билип, ончогор ӱредӱчилер болорго амадабагар.

² Бис ончобыс кӧп јастырып јадыбыс ине. Сӧс айдып, јастырбай турган кижи толо кемине јеткен кижи болуп јат. Ол ончо эди-канын бойына бактырар аргалу.

³ Бат, биске уккур болзын деп, аттарды сулуктап, олордыҥ ончо эди-канын башкарып јадыбыс.

⁴ Керептер ондый ок. Олор, андый јаан бойлоры, кандый да тыҥ салкынга айдатса, олорды кичинек тискин башкарат; керепчи кайдаар кӱӱнзезе, оноор ууланат.

⁵ Анайып тил де. Ол эт-канныҥ кичинек ӱйези, је кӧп мактанат. Кӧр, кичинек от элбек агашту јерди ӧртӧп койот.

⁶ Тил де – от, јаманныҥ кееркемјизи. Ол эт-канныҥ ӱйелери ортодо јӱрӱп, ончо эт-канды быјарсыдат, бойы таамыныҥ одынаҥ камылып, бастыра јӱрӱмисти ӧртӧйт.

⁷ Кижи кандый ла јайалганды: аҥ-куштарды, јылып, јорголоп јӱрер тындуларды, талайдыҥ тындуларын јобожыдат, јобожыдып та койгон.

⁸ Тилди дезе улустыҥ кемизи де јобожыдып болбойт: бу – токтодып болбос јаман; ол ӧлӱмдӱ коронло толо.

⁹ Оныла Кудайды ла Аданы алкайдыс, оныла ок Кудайга тӱҥейлеп јайалган улусты каргайдыс.

¹⁰ Бир ле оостоҥ алкыш ла каргыш чыгат. Андый болбос учурлу, карындаштарым.

¹¹ Тоҥмоктыҥ бир ӱйдинеҥ тату ла ачу суу агат па?

¹² Смоква агаш май-агаштыҥ јиилегин бӱдӱрип болбос, карындаштарым, эмезе виноградтыҥ тӧс сабы смокваныҥ јиилегин. Анайып бир тоҥмок суу тусту ла тату сууны агызып болбос.

Чын ойгорлык

¹³ Слердиҥ кемигер ойгор ло керсӱ? Мыны јакшы кылыгыла, бойы јобош ло ойгор болуп эткен керектериле кӧргӱссин.

¹⁴ Је јӱрегерде ачу кӱйӱниш ле арбаныш јӱрген болзо, мактанбагар, чындыкка удура тӧгӱн кере этпегер.

¹⁵ Бу ӧрӧртинеҥ келип турган ойгорлык эмес, ол јердийи, сезимдийи, шилемирдийи,

¹⁶ нениҥ учун дезе кайда кӱйӱниш ле арбаныш, анда аай-тӧӧй јок ло ончо јаман болуп јат.

¹⁷ Је ӧрӧртинеҥ келип турган ойгорлык баштапкыда ару, оноҥ энчӱ, тӧп, уккур, буурзашла, јакшы керектерле толо, ылгабас ла ачык-јарык.

¹⁸ Чындыктыҥ ӱрени энчӱ тужында, энчӱни чеберлеген улуста ӱренделет.