Иаковтыҥ самаразы 2 - Јаҥы Кереес

Экијӱстенбегер

¹ Карындаштарым! Иисус Христос Кайраканыска, мактыҥ Кайраканына, экијӱстенбей бӱдигер.

² Јууныгарга алтын јӱстӱктӱ, бай кийимдӱ кижи кирзе, анайда ок уйан кийимдӱ јокту кижи кирер.

³ Слер бай кийимдӱни ајарып, айдарыгар: «Сеге бого отурза јакшы», јоктузына айдарыгар: «Сен ондо тур», эмезе «бого, будымныҥ јанына отур».

⁴ Бой-бойыгарды ылгап, јаман сагышту јаргычылар боло бергенигер ол эмес пе?

⁵ Угыгар, кару карындаштарым: бӱдериле бай болзын, Кудайдыҥ Каандыгында энчи алзын деп, телекейде јокту јӱргендерди Кудай талдап алган эмес беди? Ол бу Каандыкты Оны сӱӱген улуска берер болгон.

⁶ Слер дезе јоктуны јабыс кӧрдигер. Слерди байлар кыстап турган эмес беди, слерди јаргыга олор апарып турган эмес беди?

⁷ Слер аданып јӱрген јакшы атты олор јамандап турган эмес беди?

⁸ Бойыҥды сӱӱгеҥдий, јуугыҥды сӱӱп јӱр деп, Агару Бичикте айдылган каанныҥ јасагын бӱдӱрип турган болзогор, јакшы эдип јадыгар.

⁹ Је экијӱстенип турган болзогор, кинчек эдип, Јасак бузаачылар болуп каладыгар,

¹⁰ нениҥ учун дезе, ончо Јасакты бӱдӱрип, је бирӱзинде кинчек эткен кижи, ончозында бурулу болуп калат.

¹¹ «Чайдам кылынба» деп Айтканы, «ӧлтӱрбе» дегени ине. Оныҥ учун чайдам кылынбай, је ӧлтӱрип турган болзоҥ, сен – Јасак бузаачы.

¹² Анайып, јайым берип турган јасакла јаргыладар улус чылап айдыгар, эдигер.

¹³ Быйанын јетирбеген кижиге быйан јок јаргы болор ине. Быйан јаргыдаҥ бийик.

Кудайга бӱдери ле керектер эдери

¹⁴ Кем «Кудайга бӱдӱп јадым» деп айдып, је керектер этпей турган болзо, кандый туза, карындаштарым? Бу мынайда бӱткени оны аргадап болор бо?

¹⁵ Карындажыгар эмезе сыйныгар јылаҥаш эмезе кӱндик курсагы јок јӱрзе,

¹⁶ кажы бирӱгер дезе: «Амырыгар алып барыгар, јылыныгар, курсактаныгар» деп айдып, је олорго эди-канына керектӱзин бербезе, кандый туза?

¹⁷ Анайып бӱдӱмји де: кем Кудайга бӱдӱп, је керектер этпей турган, оныҥ Кудайга бӱткени бойы таҥынаҥ бӱдӱмји де эмес.

¹⁸ Је кем де айдар: «Сен Кудайга бӱдӱп јадыҥ, мен керектер эдип јадым». Мен айдарым: «Керектер этпей Кудайга бӱдӱп турганыҥды меге кӧргӱс, мен Кудайга бӱдӱп турганымды бойымныҥ керектеримле кӧргӱзерим».

¹⁹ Кудай јаҥыс деп, бӱдӱп јадыҥ ба? Јакшы эдип јадыҥ. Шилемирлер де бӱдӱп, сертилдеп јадылар.

²⁰ Је керектер этпес кижиниҥ Кудайга бӱткени ӧлӱ деп, билер кӱӱниҥ бар ба, куру кижи?

²¹ Авраам адабыс Исаак уулын тагылга салып, эткен керектериле акталган эмес беди?

²² Кӧрӱп туруҥ ба, оныҥ Кудайга бӱткени ле керектери колбулу болуп, Кудайга бӱткени керектер ажыра толо кемдӱ боло бергенин?

²³ Анайып, бичилген сӧс бӱткен: «Авраам Кудайга бӱткен, бу учун ол акту кижи деп бодолып, Кудайдыҥ нӧкӧри деп адалган».

²⁴ Кӧрӱп турыгар ба, кижи эткен керектериле акталат, јаҥыс бӱдӱп јӱргениле эмес.

²⁵ Анайып ок балыр јӱрӱмдӱ ӱй кижи Раав та эткен керектериле акталган эмес беди? Ол кайучылдарды айылына кийдирип, ӧскӧ јолло аткарган.

²⁶ Эт-кан тын јокко јӱрӱм јок. Анайып бӱдӱмји де эдилген керектер јокко јӱрӱм јок.