Иаковтыҥ самаразы 1 - Јаҥы Кереес

¹ Израильдиҥ јер сайын чачылган он эки угына. Слерге Кудайдыҥ ла Иисус Христос Кайраканныҥ Иаков кулынаҥ эзен!

Кудайга бӱдери ле ойгорлык

² Јӱзӱн-јӱӱр ченелтелерге учурап турганыгарда, оны бойыгарга улу сӱӱнчи деп бодогор, карындаштарым.

³ Слердиҥ Кудайга бӱткенигер ченелтени ӧдӱп, чыдамкай экелип јат деп, билип јадыгар.

⁴ Чыдамкай дезе бойыныҥ ижин тӱгезе этсин. Анайдарда слер сыраҥай јакшы, кемжикпеген, бир де тутак јок болорыгар.

⁵ Кемигерге ойгорлык јетпей турган болзо, ончо улуска тегинге, каарып айтпай берип турган Кудайдаҥ сурагажын, – ого берилер.

⁶ Је бӱдӱп, эмеш те алаҥзыбай суразын, нениҥ учун дезе алаҥзып турган кижи салкынга айдадып чачылган талайдыҥ толкузындый.

⁷ Андый кижи Кайраканнаҥ неме аларым деп сананбазын.

⁸ Санаазы экиленген кижи бойыныҥ ончо керектеринде турумкай эмес.

⁹ Јокту карындаш бийиктедилгениле мактанзын,

¹⁰ бай – јабызадылганыла, нениҥ учун дезе ол ӧлӧҥдӧги чечек чилеп јоголып калар.

¹¹ Кӱн чыгып, изип баштайт, изӱдеҥ ӧлӧҥ какшайт, оныҥ ӧҥи ӧчӱп, јаражы јоголып јат. Анайып бай да кижи бойыныҥ керектериле кожо чалдыгар.

Ченелтелер

¹² Ченелтеге чыдажып турган кижи кежиктӱ, нениҥ учун дезе, ол ченеделе, јӱрӱмниҥ кайралын алар. Бу кайралды Кайракан Оны сӱӱген улуска берер болгон.

¹³ Ченедип турган улустыҥ кемизи де: «Мени Кудай ченеп јат» – дебезин, нениҥ учун дезе Кудайды кем де јаманла ченеп болбос, Ол Бойы да кемди де ченебейт.

¹⁴ Је кажы ла кижи акту бойыныҥ кычазына јилбиркедип ле мекеледип ченелет.

¹⁵ Кыча дезе, табынала, кинчек чыгарып алат, эдилген кинчек – ӧлӱм экелет.

¹⁶ Бойыгарды аскырбагар, кару карындаштарым.

¹⁷ Кандый ла јакшы сый, кандый ла толо кемдӱ јайалта ӧрӧртинеҥ, јарыктыҥ Адазынаҥ келет. Ол кубулбайт, Ондо кубултаныҥ кӧлӧткӧзи јок.

¹⁸ Бис Оныҥ јайагандарыныҥ баштамызы болзын деп, Ол бисти Бойыныҥ табыла, чындыктыҥ сӧзиле тууган.

Угары ла багары

¹⁹ Анайдарда, кару карындаштарым: кандый ла кижи угарга јылгыр болзын, сӧс айдарга, чугулданарга бачымдабазын.

²⁰ Кижиниҥ чугулы Кудайдыҥ чындыгын јайабай јат.

²¹ Оныҥ учун кандый ла быјардаҥ, бойыгарда толгон јаманнаҥ айрылып, јӱрегерге тарылып турган сӧсти јобожып алыныгар. Бу сӧс јӱрӱмигерди аргадап алар кӱчтӱ.

²² Сӧсти бӱдӱрип јӱригер, јӱк ле угуп јӱрген болзогор, бойыгарды бойыгар мекелеп јадыгар,

²³ нениҥ учун дезе, сӧсти угуп, оны бӱдӱрбей јӱрген кижи, бойын кӱскӱдеҥ кӧрӱнип турган кижидий:

²⁴ ол бойына кӧрӧлӧ, мынаар болгон, бойы кандыйын ол тарый ундып койгон.

²⁵ Је кем јайым берип турган сыраҥай јакшы јасакты оҥдоп аларга кичеенип, ондо болуп јӱрзе, ол ундынчак угаачы эмес, је керекти бӱдӱреечи болор, бойыныҥ керегинде кежиктӱ болор.

²⁶ Кемигер бойын кудайзак деп сананып, је тилин тудунбайт, ол јӱрегин мекелейт, оныҥ кудайзагында туза јок.

²⁷ Ада Кудай алдында ару ла јек јок кудайзак болоры ол: ӧскӱс-јабыстарга ла тул ӱй улуска ачу-коронында килемји эдери, бу телекейдеги јаманнаҥ бойыгарды чеберлеери.