Галаттарга 3 - Јаҥы Кереес

Јасакла эмес, бӱдӱп турганысла акталарыс

¹ Э-э, санаа-укаа јок галаттар! Слерди чындыкка бакпазын деп, кем тармалады? Слерде кере тартылган Иисус Христосты бойыгардыҥ кӧзигерле кӧргӧн јок бедигер.

² Јӱк ле мыны слердеҥ сурап угар кӱӱним бар: Јасакты бӱдӱргенигер учун Тынды алдыгар ба, эмезе Сӱӱнчилӱ Јарды угала, Кудайга бӱткенигер учун ба?

³ Слер андый санаа-укаа јок болдыгар эмеш пе? Тынла јӱрӱп баштайла, эмди бойыгардыҥ кӱчигерле туузылтып јадыгар.

⁴ Кӧпти шыралап ӧткӧнигер калас болды эмеш пе? Бу калас болор аргазы јок.

⁵ Анайдарда, слерге Тын берип, ортогордо кайкалдар јайап турган Кудай мыны Јасакты бӱдӱрип јӱргенигер учун эдет пе, эмезе Сӱӱнчилӱ Јарды угала, бӱткенигер учун ба?

⁶ Авраам анайып Кудайга бӱткен, оныҥ учун оны Кудай акту кижи деп адаган.

⁷ Билип јӱригер, бӱдӱп турган улус – Авраамныҥ уулдары.

⁸ Кудай ӧскӧ калыктарды Ого бӱдӱп турганы ажыра актаар деп, Агару Бичикте судурлалып, Авраамга озолодо Сӱӱнчилӱ Јар айдылган: «Сен ажыра ончо калыктар алкалар».

⁹ Оныҥ учун бӱдӱп турган ончо улус бӱдӱп турган Авраамла кожо алкалып јадылар.

¹⁰ Је Јасакка иженген ончо улус каргышту јӱрӱп јат. Бичилген јок беди: «Јасактыҥ бичигинде айдылганды ончозын бӱдӱрбей турган кандый ла кижи, каргышка калган».

¹¹ Јасакла Кудайдыҥ алдында кем де акталып болбозы јарт, нениҥ учун дезе, акту кижи бӱдӱп, тирӱ јӱрер.

¹² Јасак ла Кудайга бӱдери ортодо бир де колбу јок. Је Јасакты бӱдӱрип турган кижи оныла тирӱ јӱрер.

¹³ Христос бисти Јасактыҥ каргыжынаҥ јайымдаган, бистиҥ ордыбыска каргышты бойына алынган. Бичилген јок беди: «Агашка кере тартылган кажы ла кижи, каргышка калганы ол».

¹⁴ Авраамныҥ алкыжы Христос Иисус ажыра ӧскӧ калыктарга да берилзин деп, Кудай берер болгон Тынды Ого бӱткенис ажыра бисти де алзын деп, мынайда болгоны бу.

Јасак ла берген сӧс

¹⁵ Карындаштар! Кижи чилеп шӱӱп айдадым: кижи де јараткан кереести кем де јектеп те, ого нени де кожуп болбос.

¹⁶ Је Авраамга ла оныҥ калдыгына Кудай сӧзин берген. Кӧп чилеп, «калдыктарына» деп айдылбаган, је јаҥыс чылап, «калдыгыҥа» деп айдылган. Ол дезе Христос.

¹⁷ Мыныла айдайын дегеним бу: тӧрт јӱс одус јылдыҥ бажында табылган Јасак Кудай јараткан Христос керегинде кереести ле ондо берилген сӧсти токтодып болбос.

¹⁸ Энчини Јасактаҥ алып турган болзо, оны берген сӧслӧ алып болбос ине. Је мыны Кудай Авраамга Бойыныҥ сӧзиле сыйлаган.

¹⁹ Анайдарда, Јасак не керек? Ол соҥында јазыктардаҥ улам Кудай берер болгон калдык једип келер ӧйгӧ јетире берилип, ангелдер ажыра, ортокчыныҥ болужыла тургузылган.

²⁰ Је Ортокчы экӱниҥ ортодо керек. Кудай дезе јаҥыс.

²¹ Анайдарда, Јасак Кудайдыҥ берген сӧзине удурлаш па? Јок туру! Улус јӱрӱм бергедий Јасак алган болзо, Јасакла акталар эди.

²² Иисус Христоско бӱткени ажыра берер болгонын Кудай бӱдӱп турган улуска берзин деп, Агару Бичик ончозын кинчектиҥ олјозында деген.

²³ Кудайга бӱдетен ӧй келгелекте бӱдетени ачыларга јетире Јасактыҥ каруулына алылганыс.

²⁴ Оныҥ учун бӱдӱп акталзын деп, биске Јасак Христоско экелетен таскадаачы чылап берилген.

²⁵ Је бӱдетен ӧй једип келерде, таскадаачыныҥ башкартузынаҥ чыга бергенис.

Кулдар ла Кудайдыҥ уулдары

²⁶ Ончогор Христос Иисуска бӱдӱп, Кудайдыҥ уулдары болуп јадыгар.

²⁷ Ончогор Христостыҥ Бойында креске тӱжӱп, Христоско тӱҥейлештигер.

²⁸ Эмди иудей де, кара јаҥду да јок; кул да, јайым кижи де јок; эр де, ӱй де кижи јок – ончогор Христос Иисустыҥ Бойында бир бӱдӱн.

²⁹ Је Христостыйы болзогор, слер – Авраамныҥ калдыгы, Кудайдыҥ берген сӧзиле энчиленеечилер.