Галаттарга 1 - Јаҥы Кереес

¹ Улустаҥ эмес, кижи ажыра эмес, је Иисус Христос ажыра, Оны тиргискен Ада Кудай ажыра апостол Павелдеҥ,

² анайда ок мениле кожо јӱрген ончо карындаштардаҥ – Галатиядагы серкпелерге.

³ Слерге Ада Кудайдаҥ ла Иисус Христос Кайраканнаҥ јакшылык ла амыр јетсин.

⁴ Ол бисти јаманга алдыртып койгон бу телекейдеҥ айрыырга, кинчектерис учун Бойын берген. Мыны Кудайдыҥ, бистиҥ Адабыстыҥ, табыла эткен.

⁵ Ого ӱргӱлји чакка мак. Аминь.

Ӧскӧ Сӱӱнчилӱ Јар јок

⁶ Слерди Христостыҥ јакшылыгыла кычырып алган Кудайдаҥ ылтам јана болуп, ӧскӧ Сӱӱнчилӱ Јарга баштанганаарды кайкап јадым.

⁷ Ӧскӧ Јар јок, јӱк ле Христостыҥ Јарын ӧскӧртӧргӧ кӱӱнзеп, слерди тӱймедип турган улус бар.

⁸ Је бис те, теҥеридеҥ ийилген ангел де слерге јарлаганыстаҥ ӧскӧни јарлай берген болзо, каргышка калзын!

⁹ Бис алдында айтканыс, эмди база айдадым: слер алган Сӱӱнчилӱ Јардаҥ ӧскӧни јарлап јӱргени, каргышка калзын!

¹⁰ Эмди меге кемниҥ јарадузы керек? Улустыйы ба, эмезе Кудайдыйы ба? Айса, улуска јараарга кичеенип јӱрген болдым ба? Улуска јараарга кичеенген болзом, Христостыҥ кулы болбос эдим.

¹¹ Слерди билзин деп турум, карындаштар: мен јарлаган Сӱӱнчилӱ Јар кижинийи эмес.

¹² Оны кижидеҥ албадым, ого мени кижи ӱретпеди, је оны меге Иисус Христос ачты.

¹³ Иудейлердиҥ чӱм-јаҥыла башкыда канайып јӱргенимди уккан эмейигер. Мен Кудайдыҥ серкпезин кӱӱн-кайрал јок истегем ле јоголтком.

¹⁴ Иудейлердиҥ чӱм-јаҥын бӱдӱреринде јажыт улус ортодо меге једери јок болгон. Анчада ла адалардыҥ јаҥжыгуларыла јӱрерге кичеенгем.

¹⁵ Мени энемниҥ ӧзӧгинеҥ бӧлӱп, Бойыныҥ јакшылыгыла кычырып алган Кудай

¹⁶ калыктар ортодо мени јарлазын деп, мениҥ бойымда Уулын ачарда, улусла јӧптӧшпӧгӧм,

¹⁷ менеҥ озо апостолдор боло берген улуска јолыгайын деп, Иерусалимге барбагам. Мыныҥ ордына Аравияга барып, ойто Дамаскка бурылгам.

¹⁸ Оноҥ, ӱч јылдыҥ бажында, Кифага јолыгайын деп, Иерусалимге барып, анда он беш кӱн кире јӱргем.

¹⁹ Ӧскӧ апостолдорды кӧрбӧгӧм, јӱк Кайраканныҥ карындажын, Иаковты, кӧргӧм.

²⁰ Слерге бичип турганым – чын, оныҥ керечизи – Кудай.

²¹ Оноҥ Сирия ла Киликия ороондор јаар јӱре бергем.

²² Христостыҥ Иудейдеги серкпелеринде акту бойымды билгилебес болгон.

²³ Олор јӱк улустыҥ мынайда айдышканын уккандар: «Бу кижи башкыда бисти истеп, Кудайга бӱдерин јоголткон, је оны эмди јарлап јат».

²⁴ Мыны угуп, мен учун Кудайды алкап тургандар.