Филиппыдагыларга 4 - Јаҥы Кереес

Алкыш сӧстӧр

¹ Анайдарда, кару ла кӱӱним салган карындаштарым, сӱӱнчим ле кайралым, Кайраканнаҥ бек тудуныгар, кару улузым.

² Еводияны јайнап турум, Синтихияны јайнап турум: Кайраканга болуп јӱрген улус чылап, ол ло керегинде сананыгар.

³ Эйе, сени де, мениле кожо чындык иштеп јӱрген нӧкӧримди, сурап турум: бу ӱй улуска болуш. Олор экӱ мениле, Климентле кожо, ады-јолдоры јӱрӱмниҥ бичигинде бичилген ӧскӧ дӧ ишчилерле кожо Сӱӱнчилӱ Јарды јарлап, кӧп иштеп јӱрген эдилер.

⁴ Кайраканныҥ Бойында јаантайын сӱӱнигер, база айдадым: сӱӱнигер!

⁵ Кӱӱнзек болгоныгарды ончо улус кӧрзин. Кайракан јуук.

⁶ Не де керегинде санааркабагар, је јаантайын мӱргип ле сурап, алкыш айдып, Кудайдыҥ алдында керексигенеерди ачыгар.

⁷ Ол тушта Кудайдыҥ не ле сагыштаҥ бийик амыры јӱректеригерди ле сагыжыгарды Христос Иисустыҥ Бойында чеберлеер.

⁸ Адакыда, карындаштар, нези чын, нези ак-чек, нези чындык, нези ару, нези улуска јарап турган, нези баалу, нези мактаарга ла тоорго јарамыкту – ол керегинде сананыгар.

⁹ Менеҥ неге ӱренгенигер, нени алганыгар, нени укканыгар ла нени кӧргӧнигер, оны эдигер. Ол тушта амырдыҥ Кудайы слерле кожо болор.

Килемји ле болуш учун алкыш-быйан

¹⁰ Меге ойто килемји эдип баштаганыгарга Кайраканла кожо сӱрекей сӱӱндим. Слер башкыда да килемји эткенигер, је слерде арга јок болгон.

¹¹ Керексинип јӱргеним учун мыны айдып турган эмезим. Мен бойымда барыла болорзынарга ӱренип алгам,

¹² немеге јединбей де, јеткилдӱ де јӱрерге билерим. Мен ончозы ажыра ӧткӧм дӧ, ончозына белен де: тойорго ло торолоорго, јеткилдӱ де, јединбей де јӱрерге.

¹³ Меге кӱч берип турган Иисус Христостыҥ болужыла ончозын эдер аргам бар.

¹⁴ Андый да болзо, мениҥ кыйынымды ӱлежип, јакшы эттигер.

¹⁵ Слер билеригер, Филиппыдагы карындаштар: Македониядаҥ чыгала, Сӱӱнчилӱ Јарды јарлыктап баштаарымда, јаҥыс слердеҥ башка, бир де серкпе мениле кирелтени ле чыгымды ӱлешпеген.

¹⁶ Немедеҥ тутакту болорымда, Фессалоника да јаар бир, эки катап болуш ийгенигер.

¹⁷ Мен болуш бедиреген учун мыны айдып турган эмезим, је слердиҥ бойыгарда Кудайдыҥ јайалтазы кӧптӧзин деп кӱӱнзейдим.

¹⁸ Мен ончозын алгам, керек дезе артыктай. Слер Епафродитле меге керектӱзинеҥ кӧпти ийдигер, эмди менде ончозы бар. Слердиҥ сыйыгар – ол јараш јытту берӱ, Кудайга јараар тайылга.

¹⁹ Мениҥ Кудайым немедеҥ тутакту болгоныгарды Христос Иисус ажыра берер. Ол мыны Бойыныҥ мактулу байлыгынаҥ берер.

²⁰ Кудайыска ла Адабыска ӱргӱлји чактарга баш болзын! Аминь.

²¹ Мен ле мениле кожо јӱрген карындаштар Христос Иисустыйы болгон ончо агаруларга эзен айдып турубыс.

²² Анайда ок мындагы ончо агарулар, анчада ла каганныҥ улузы слерге эзен айдып турулар.

²³ Иисус Христос Кайраканыстыҥ јакшылыгы ончогорло кожо болгой. Аминь.