Филиппыдагыларга 3 - Јаҥы Кереес

Христоско бӱткени ажыра акталары

¹ Анайдарда, карындаштар, Кайраканныҥ Бойында сӱӱнигер. Слерге ол ло керегинде бичийтени меге кӱч эмес, је слерди бу корулап алар.

² «Ийттердеҥ» чеберленигер, јаман эдип турган улустаҥ чеберленигер, эт-кандагы томдоштоҥ чеберленигер,

³ нениҥ учун дезе чындаптаҥ томдолгон улус – ол бис, Кудайга Тынла бажырып, Христос Иисусла мактанып, тыш керектерге иженбей јӱрген бойлорыс.

⁴ Кем де тыш јанын бӱдӱрип, ого ижемји салып турган болзо, мен оноҥ кӧп иженер эдим.

⁵ Мен сегизинчи кӱнде томдолгом, Израиль калыгынаҥ, Вениамин угынаҥ бӱткем, су-еврей болорым. Фарисей бойым, Јасакты кыйбай бӱдӱргем,

⁶ бойымныҥ јӱткимелимле Серкпени истегем, Јасактагы чындыкла јек јок болгом.

⁷ Је ол тушта нени кирелте деп бодогом, оны эмди Христосты билип алала, коромјы деп бодоп јадым.

⁸ Эйе, Христос Иисус Кайраканымды билип алатанына кӧрӧ ончозын коромјы деп бодойдым. Ого болуп ончозын јылыйтып, Христос менийи болзын деп, ончозын чӧпкӧ бодогом.

⁹ Јасакты бӱдӱргеним ажыра эмес, Христоско бӱткеним ажыра акталарга, Оныҥ Бойында јӱрейин деп јӱткийдим. Бу акташты кижиниҥ бӱткени ажыра Кудай берип јат.

¹⁰ Христостыҥ кыйынын ӱлежип, Ол ӧлгӧни чилеп ӧлӱп, Оныҥ Бойын, Оны тиргискен кӱчти билип аларга кӱӱнзеп,

¹¹ тирилишке јединерим деп, иженип јадым.

Амадуга јӱткиш

¹² Мен бого једингеним эмезе толо кемдӱ болуп калганым учун мынайда айдып турган эмезим, је мен амадуга јӱткийдим, бу амадуга болуп Христос мени јуудып алган.

¹³ Карындаштар, мен бойымды бого једингем деп бодобойдым, јӱк кийнимдезин ундып, ичкеризине ууланып,

¹⁴ амадуга – Христос Иисустыҥ Бойында Кудай кычырып турган кайралга јӱткийдим.

¹⁵ Анайдарда, эр кемине јеткенис анайда сананар учурлу. Кандый-бир неме керегинде башка сананып јӱрген болзогор, мыны да Кудай слерге ачар.

¹⁶ Је бис неге једип алганыс, анайда ла сананар, ол ээжиле јӱрер учурлу.

¹⁷ Менеҥ тем алыгар, карындаштар, бис слерге берген темле јӱрӱп турган улуска ајарыгар.

¹⁸ Кӧп улус Христостыҥ керӱ агажыныҥ ӧштӱлери чилеп јӱрет ине. Олор керегинде слерге улайын айткам, эмди керек дезе кӧстӧрим де јашталып айдып турум.

¹⁹ Олордыҥ учы – јайраду, олордыҥ кудайы – ич-карын, олордыҥ мактанып турганы олорго уйат болор; олор јердийин сананып јадылар.

²⁰ Бистиҥ орооныс – теҥериде. Оноортынаҥ Аргадаачыны – Иисус Христос Кайраканды сакып јадыбыс.

²¹ Ол бистиҥ неге де турбас эди-каныбысты кубултып, Бойыныҥ мактулу эди-канына кеберлеш эдер. Ол мыны Бойына ончозын бактырып турган кӱчле эдер.