Еврейлерге 9 - Јаҥы Кереес

Јердеги ле теҥеридеги агару јер

¹ Анайдарда, баштапкы кереес Кудайга бажырар ээжилерлӱ ле јерде тудулган агару јерлӱ болгон.

² Чадыр тудулган, оныҥ баштапкы кыбында јарыткыш, стол ло агарулалган калаш болгон. Бу јерди агару дейтен.

³ Экинчи кӧжӧгӧниҥ ары јанында агарудаҥ агару дейтен кып болгон.

⁴ Анда фимиам ӧртӧйтӧн алтын тагыл ла кереестиҥ ковчеги турган. Ковчег ончо јандай алтындалган. Оныҥ ичинде манналу алтын айак, Ааронныҥ бӱрленип чечектеген тайагы, анайда ок кереес бичилген јалбак таштар болгон.

⁵ Ковчегтиҥ ӱстинде мактулу херувимдер болгон. Олор кинчектер ташталып турган јердиҥ ӱстине канаттарын јайгандар. Је эмди бу керегинде толо айдары керек јок.

⁶ Агару јер бат анайда јазалган. Баштапкы кыпка абыстар јаантайын кирип, Кудайга бажырып јадылар.

⁷ Экинчи кыпка дезе јылына бир катап јӱк ле улу абыс кирет. Ол тайылган тындуныҥ канын экелип, оны бойы учун ла калык билбей јадып эткен кинчектер учун тайар учурлу.

⁸ Мынызыла Агару Тынныҥ кӧргӱзип турганы бу: эм тура баштапкы чадыр бар тужында агарудаҥ агару јер јаар јол ачык эмес.

⁹ Баштапкы чадыр эмдиги ӧйгӧ сӱр-кебер болуп јат. Анда эдилип турган берӱлер де, тайылгалар да Кудайга бажырып турган кижини толо кемдӱ эдип, оныҥ ӧзӧк-буурын бурулу болгон сезимнеҥ арутап болбос.

¹⁰ Олор ичип-јиириле, јӱзӱн-јӱӱр арутанар чӱм-јаҥдарла, кижиниҥ эди-каны јанынаҥ ээжилерле колбулу. Бу ээжилер јӱк кубулта болор ӧйгӧ јетире тузаланылат.

¹¹ Је Христос, келер ӧйдӧги јакшыныҥ Улу абызы болуп, эҥ јаан ла толо кемдӱ агару чадыр ажыра келген. Бу чадыр кижиниҥ колыла тудулбаган, ол бу телекейдиҥ јайааны эмес.

¹² Ол агарудаҥ агару јерге эчкилердиҥ ле бозулардыҥ канын эмес, Бойыныҥ канын тайып кирген. Ого бир катап ла ӱргӱлјиге кирип, ончобыска мӧҥкӱлик јайым алган.

¹³ Эди-каны ару болзын деп, эчкилердиҥ, букалардыҥ канын ла кунајынныҥ кубалын ӱрӱстеп, быјарзыган улусты агарулап јадылар.

¹⁴ Је Христостыҥ каны мынаҥ кӧпти эдет. Ол Агару Тын ажыра Бойын Кудайга јек јок тайылга эдип берген. Оныҥ каны санаабысты ӧлӱмге экелеечи керектердеҥ арутаар. Анайып тирӱ ле чындык Кудайга бажырып јӱрер аргалу болорыс.

¹⁵ Оныҥ учун Христос јаҥы кереесте Ортокчы болуп јат. Ол Бойыныҥ ӧлӱми ажыра баштапкы кереес тужында јазык эткен улуска јайым берген. Кычырылган улус Кудайдыҥ берер болгон мӧҥкӱ энчизин алар аргалу болзын деп, Оныҥ анайда эткени ол.

¹⁶ Кереес бар тушта оны бичиген кижиниҥ ӧлӱми керелелер учурлу.

¹⁷ Кижи ӧлгӧн кийнинде кереес учурлу болуп јат ине. Је ол тирӱ тужында кереесте учур јок.

¹⁸ Оныҥ учун баштапкы да кереес канла јӧптӧлгӧн.

¹⁹ Јасакта салылган јакылталарды ончо калыкка айдып береле, Моисей бозулардыҥ ла эчкилердиҥ канын, анайда ок суу, кызыл тӱк ле иссоп деп ӧзӱм алып, тӱрбектиҥ бойын ла ончо калыкты ӱрӱстеп,

²⁰ айткан: «Бат, кереестиҥ каны. Бу кереести слерге Кудай берген».

²¹ Анайып ок канла чадырды ла Кудайга бажырар тужында тудунар-кабынар ончо немелерди ӱрӱстеген.

²² Чындап та, Јасак аайынча бастыра неме канла аруталар, кан тӧгӱлбегенче, кинчек ташталбас.

Христостыҥ тайылгазы бир катап ла ӱргӱлјиге

²³ Анайдарда, теҥеридезине тӱҥейлеп эдилген немелер андый тайылгаларла аруталар учурлу болгон. Је теҥеридеги немелердиҥ бойына мынаҥ артык тайылгалар керек.

²⁴ Христос чын немеге тӱҥейлеп кижиниҥ колыла туткан агару јерге кирбеген ине. Је Ол биске болуп эмди Кудайдыҥ алдына турарга, теҥериниҥ бойына кирген.

²⁵ Агару јерге јылдыҥ сайын ӧскӧ канла кирип турган улу абыс чылап, Ол Бойын кӧп катап тайбай теҥериге кирген.

²⁶ Оноҥ башка телекей јайалганынаҥ ала Ого кӧп катап кыйналарга келижер эди. Је Ол чактардыҥ учында Бойын тайып, кинчекти јоголтойын деп, бир ле катап јажына келген.

²⁷ Кажы ла кижи бир катап ӧлӱп, оноҥ јаргыныҥ алдына туруп јат.

²⁸ Анайып Христос то кӧп улустыҥ кинчектерин јоголторго, бир катап тайылган. Ол экинчи катап кинчектер таштаарга келбес, Оны сакып јӱрген улусты аргадаарга келер.