Еврейлерге 7 - Јаҥы Кереес

Мелхиседек абыс

¹ Мелхиседек Салимниҥ кааны ла Ӧрӧ турган Кудайдыҥ абызы болгон. Авраам каандарды јеҥеле, јанып келедерде, ол ого туштап, алкыжын берген.

² Авраам ого ончо јӧӧжӧзинеҥ онынчы ӱлӱӱни бӧлӱп берген. Баштапкыда, Мелхиседек деп ат чынныҥ кааны дегени. Анайда ок ол Салимниҥ – амырдыҥ кааны.

³ Ондо ада-эне де, угы-тӧзи де јок, оныҥ јӱрӱминиҥ бажы да, учы да јок. Ол Кудайдыҥ Уулына тӱҥейлежип, абыс болуп ӱргӱлјиге јӱрет.

⁴ Кӧрзӧгӧр дӧ, ол кандый улу болгон! Улу Авраам адабыс бойы ого тапканынаҥ онынчы ӱлӱӱни берген.

⁵ Левийдиҥ угынаҥ абыстар боло берген эр улус калыктаҥ онынчы ӱлӱӱни алзын деп, Јасакта айдылган. Чокымдап айтса, олор база Авраамныҥ калдыктары да болзо, тӱней ле бойлорыныҥ карындаштарынаҥ онынчы ӱлӱӱни алып јадылар.

⁶ Мелхиседек олордыҥ угынаҥ эмес болгон, је Авраамнаҥ онынчы ӱлӱӱни алып, оны, Кудайдыҥ сӧзи берилген кижини, алкаган.

⁷ Јааны кичӱзине алкыжын берип турганында алаҥзу јок.

⁸ Бу учуралда онынчы ӱлӱӱни ӧлӱмдӱ улус алып јадылар. Ол тушта оны тирӱ деген керелӱ кижи алган.

⁹ Анайып онынчы ӱлӱӱни алатан Левий Авраам ажыра онынчы ӱлӱӱни берген деп айдарга јараар,

¹⁰ нениҥ учун дезе, Мелхиседек Авраамга туштаарда, Левий адазыныҥ ӧзӧгинде јӱрген.

Иисус – Мелхиседектий јамылу Абыс

¹¹ Анайдарда, калыкка Левийдиҥ калдыктарынаҥ тудулган абыстардыҥ абыстап јӱргениле колбулу Јасак берилген. Олордыҥ абыстап јӱргени ажыра толо кемдӱ болор арга бар болзо, Аарондый эмес, Мелхиседектий ок јамылу ӧскӧ Абыс табылары не керектӱ болгон?

¹² Абыстап јӱреринде кубулта болгондо, Јасак та кубулар учурлу ине.

¹³ Эмди айдып турган Абызыс ӧскӧ уктаҥ болгон. Бу уктаҥ дезе кем де тагылдыҥ јанында абыстап јӱрбеген.

¹⁴ Кайраканыс Иуданыҥ угынаҥ деп, јарлу ине. Моисей бу уктыҥ абыстары керегинде нени де айтпаган.

¹⁵ Мелхиседектий јамылу ӧскӧ Абыс табылып турганда, кубулта там иле кӧрӱнет.

¹⁶ Ол улуска тургузылган Јасакла эмес, ӱргӱлји јӱрӱмниҥ кӱчиле Абыс боло берген.

¹⁷ Кере бар: «Сен Мелхиседектий ок јамылу ӱргӱлјиге Абыс».

¹⁸ Анайып озогы јакылта кӱч јок ло туза јок болгонынаҥ улам токтодылат,

¹⁹ нениҥ учун дезе Јасак нени де толо кемдӱ этпеген. Је биске эҥ артык ижемји берилген, оныҥ шылтузында Кудайга јууктап јадыбыс.

²⁰ Бу да чертле эдилген. Байагы улус черт јокко абыстар боло берген,

²¹ Иисус – чертле, нениҥ учун дезе Ол керегинде айдылган: «Кайракан чертенген, Ол санаазын ӧскӧртпӧс. Сен Мелхиседектий ок јамылу ӱргӱлјиге Абыс».

²² Бу черттиҥ шылтузында Иисус эҥ артык кереес бӱдерин јеткилдеп берген.

²³ Ого ӱзеери андый абыстар кӧп болгон, нениҥ учун дезе ӧлӱм олорго абыстап јӱрерге бербей турган.

²⁴ Иисус дезе ӱргӱлјиге јӱрӱп, ӱргӱлјиге абыстап јат.

²⁵ Оныҥ учун Ол ажыра Кудайга келип турган улусты јаантайын аргадаар аргалу. Олор учун сураарга, Ол јаантайын јӱрӱп јат.

²⁶ Бисте шак андый Улу абыс болор учурлу. Ол агару, јек јок, ару, кинчектӱлердеҥ бӧлилген, теҥеридеҥ бийик кӧдӱрилген.

²⁷ Ого ол улу абыстар чылап, озо баштап бойыныҥ кинчектери учун, оноҥ калыктыҥ кинчектери учун кӱнӱҥ сайын тайылга эдери керек јок. Ол Бойын Бойы тайып, мыны бир катап ла ӱргӱлјиге эткен.

²⁸ Јасак бойында чине јок улусты улу абыска тудуп јат. Јасактыҥ кийнинде Кудай дезе черт айдып, Бойыныҥ толо кемдӱ Уулын Улу абыска јажына туткан.