Еврейлерге 5 - Јаҥы Кереес

¹ Кажы ла улу абыс улустаҥ талдалат. Ол улус учун Кудайга јалчы болуп, кинчектер учун берӱлер ле тайылгалар эдер учурлу.

² Билбей јадып јастырып, азып јӱрген улуска јымжак болор аргалу, нениҥ учун дезе ол бойы да чине јок кижи.

³ Мынаҥ улам калык та учун, бойы да учун тайылга эдер учурлу.

⁴ Улу абыстыҥ кӱндӱлӱ јамызын бойына бойы кем де алып болбос, оны јаҥыс Ааронды чылап Кудай кычырып алган кижи алар.

⁵ Анайып Христос то Улу абыс болор макты Бойына Бойы албаган. Је бу макты Ого Кудай берип, айткан: «Сен – Мениҥ Уулым, Мен бӱгӱн Сени ак-јарыкка чыгардым».

⁶ Ол Агару Бичиктиҥ база бир јеринде айткан: «Сен – Мелхиседектий јамылу ӱргӱлјиге абыс».

⁷ Иисус јерде јӱрген тужында ӧлӱмнеҥ аргадаар аргалу Кудайга тыҥ ӱнденип, кӧстӧри јашталып, јайнап мӱргиген. Оноҥ айап, Оны тооп јӱргени учун Кудай Оны уккан.

⁸ Ол Уулы да болзо, кыйналыштар ажыра уккур болорго ӱренип алган.

⁹ Толо кемине једеле, Ого уккур ончо улуска јажын-чакка аргадаштыҥ тӧзӧӧчизи боло берген.

¹⁰ Анайып, Кудай Оны Мелхиседектий јамылу Улу абыс деп јарлаган.

Кудайга бӱдеринде јалку болбогор

¹¹ Бу керегинде кӧп айдар эдибис, је мыны слерге јартаарга кӱч, нениҥ учун дезе угарга боду боло бергенигер.

¹² Бу киреде слер ӱредӱчилер болуп калар учурлу, је слерди Кудайдыҥ сӧзиниҥ баштапкы тӧзӧлгӧлӧрине база катап ӱредер керек. Слерге сӱт керек, кату курсак эмес.

¹³ Сӱтле азыранып јӱрген кандый ла кижиде чынныҥ сӧзин оҥдоор ченемел јок. Ол јаш бала ине.

¹⁴ Кату курсак дезе толо кемдӱ улуска учурлалган. Олор ченемелдӱ болуп, јакшыны јаманнаҥ ылгаштырар аргалу.