Еврейлерге 4 - Јаҥы Кереес

Кудайдыҥ калыгына «Субботтыҥ амыры»

¹ Анайдарда, амыр алатаны керегинде Кудайдыҥ берген сӧзи кӱчин јылыйткалак. Оныҥ учун слердеҥ кем-кем андый арганы божотпозын деп, айап јӱригер.

² Биске де, ол улуска чылап, Сӱӱнчилӱ Јар јарлалган ине. Је олорго уккан сӧс туза экелбеген, нениҥ учун дезе оны јаратпай, ого бӱтпегендер.

³ Бис дезе, Кудайга бӱткен улус, амырды алып јадыбыс. Кудайдыҥ айтканыла: «Мен анайда чугулданып, олор Меге келип, амыр албас деп чертенгем». Телекейди јайаган ӧйдӧҥ ала эдип јӱргенин тӱгезип те койгон болзо, Ол анайда айткан.

⁴ Агару Бичиктиҥ бир јеринде јетинчи кӱн керегинде мынайда айдылган: «Кудай эдип јӱргенин ончозын тӱгезеле, јетинчи кӱнде амыраган».

⁵ Мында ок олор Мениҥ амырымды албас деп айдылган.

⁶ Анайдарда, амыр алар кезик улус бар. Је башкыда кемдерге Сӱӱнчилӱ Јар јарлалган, олор бакпаганнаҥ улам амырымды албаган.

⁷ Оныҥ учун Кудай ойто катап Бӱгӱн деп кӱнди темдектеп јат. Ол бу кӱн керегинде кӧп ӧйлӧрдиҥ бажында Давид ажыра ӧрӧ айдылганы чылап: «Бӱгӱн Оныҥ ӱнин уксагар, јӱректеригерди катуландырбагар» – деген.

⁸ Олорго Иисус Навин амыр берген болзо, мыныҥ кийнинде ӧскӧ кӱн керегинде айдылбас эди.

⁹ Анайдарда, Кудайдыҥ калыгын «Субботтыҥ амыры» сакып јат.

¹⁰ Амырды алган кижи, Кудай Бойыныҥ эдип јӱргенинеҥ амырап турганы чылап, бойындыйынаҥ амырап јат ине.

¹¹ Андый болгондо, амырды аларга, ончо кӱчибисти салактар. Кудайга бакпас улустаҥ тем алып, кем де ӧлӱп калбазын.

¹² Кудайдыҥ сӧзи јӱрӱп, бойыныҥ ижин эдет ине, ол кандый да эки мистӱ кылыштаҥ курч: ӧзӧк-буурга кирип, јуланы ла тынды, ӱйе-сӧӧктӧрди ле јиликти бӧлип, јӱректиҥ кӱӱнин ле умзаныжын јаргылайт.

¹³ Кудайга кӧрӱнбес не де јок, Оныҥ кӧзи алдында ончозы јылаҥаш ла ачык. Оныҥ алдына каруу берерис.

Иисус – теҥерини ӧткӧн Улу абыс

¹⁴ Анайдарда, бисте теҥерини ӧткӧн Улу абыс бар. Ол Иисус, Кудайдыҥ Уулы. Оныҥ учун Ого чындыгысты јӱрӱмисле керелеп, Оноҥ бек тудунактар.

¹⁵ Бистиҥ Улу абызыс чине јогысты оҥдоор аргалу. Ол бис ле чилеп ончозында ченелген, је кинчек этпеген.

¹⁶ Анайдарда, јӱректерис ачык-јарык болуп, Кудайдыҥ јакшылыгыныҥ Ширеезине јууктайлы. Анда бис ӧйлӱ-ӧйинде болуш ла быйан аларыс, јакшылык табарыс.