Еврейлерге 13 - Јаҥы Кереес

Карындаштар чылап јӱригер

¹ Бой-бойыгарга карындаштарга чылап карузыгар.

² Кӱндӱзек болорын ундыбагар. Кӱндӱзек болгоныла кезик улус бойлоры билбей, ангелдерди айлына кийдирген эди.

³ Бойыгар да олорло кожо кынјылу чылап, кынјылу улусты эзеп јӱригер. Слер бойыгар да јерде јӱрӱп јадыгар.

⁴ Айылду болгон улус бой-бойын тооп јӱрзин, олордыҥ тӧжӧгине кир јукпазын. Балыр јӱрӱмдӱ ле чайдам улусты Кудай јаргылаар.

⁵ Акчага ӱстӱкпегер, не барыгарла болорзыныгар. Кудай бойы айткан јок беди: «Сени артырбазым, сени таштабазым».

⁶ Оныҥ учун тидим айдадыс: «Кайракан – мениҥ болушчым, коркыыр немем јок. Кижи меге нени эдер?»

⁷ Слерге Кудайдыҥ сӧзин јарлаган башчыларды сананып јӱригер. Олор јӱрӱмин канайда тӱгескенин кӧрӱп, бӱдеринде олордоҥ тем алыгар.

⁸ Иисус Христос – кече, бӱгӱн ле ӱргӱлјиге ол ло бойы.

⁹ Слерди јӱзӱн-јӱӱр ле ӧскӧ ӱредӱлер јолдоҥ астыктырбазын. Јӱректеригерди курсакла эмес, јакшылыкла тыҥыдыгар, онызы јакшы. Курсакка болуп јӱрген улус туза албас.

¹⁰ Бисте тагыл бар, чадырда абыстап јӱргендер оноҥ курсак алып јиир јаҥы јок.

¹¹ Кинчек учун тайылган тындулардыҥ канын агару јерге улу абыс кийдирет, је эдин одуныҥ ары јанында ӧртӧйдилер.

¹² Оныҥ учун Иисус та Бойыныҥ каныла калыкты агарулаарга, каланыҥ каалгазыныҥ ары јанында кыйнадып койгон.

¹³ Анайдарда, Оныҥ базынчыгын бойыска алынып, одуныҥ ары јанына Ого чыгактар.

¹⁴ Мында бисте јаантайын болор кала јок ине, бис келер ӧйдиҥ калазын бедирейдис.

¹⁵ Анайдарда, Иисус ажыра Кудайга јаантайын макташтыҥ тайылгазын эдип турактар – Оныҥ ады-јолын јарлап турган оосторыстыҥ сыйын.

¹⁶ Анайда ок јакшыны эдерге ле ӧскӧ улусла ӱлежерге ундыбагар. Андый тайылгалар Кудайга јарап јат.

¹⁷ Башчыларга уккур болуп, багыгар. Олор слердиҥ јӱрӱмигерди сананып, кӧс јумбайдылар, нениҥ учун дезе Кудайга каруу берер учурлу. Олор ӱшкӱрбей, сӱӱнип иштезин. Оноҥ башка слерге кандый да туза болбос.

¹⁸ Бис учун мӱргигер. Санаабыс ару деп, бӱдӱп јадыс, нениҥ учун дезе ончозында чын эдип јӱрерге кӱӱнзейдис.

¹⁹ Анчада ла сурап турум: Кудай мени слерге ойто ылтам ийзин деп мӱргигер.

²⁰ Мӧҥкӱлик кереестиҥ каны ажыра койлордыҥ улу Кӱдӱчизи боло берген Иисус Христос Кайраканысты тиргискен амырдыҥ Кудайы

²¹ слерди Бойыныҥ табын бӱдӱрзин деп, кандый ла јакшы керекте јепсеп, Иисус Христос ажыра Бойына јараарын слердиҥ бойыгарда јайазын. Ого элен-чактарга мак! Аминь.

²² Слерди сурап турум, карындаштар, бу кӧкӱдӱ сӧстӧрди бойыгарга алыныгар. Мен слерге кыскарта бичидим.

²³ Тимофей карындажыс јайымдалганын билигер. Ол удабас келзе, слерди оныла кожо кӧрӧрим.

²⁴ Ончо башчыларыгарга ла ончо агаруларга эзен айдыгар. Италиядаҥ карындаштар слерге эзен айдып турулар.

²⁵ Кудайдыҥ јакшылыгы ончогорло кожо болзын. Аминь.