Еврейлерге 10 - Јаҥы Кереес

¹ Јасак – келер ӧйдӧ болотон јакшыныҥ јӱк ле кӧлӧткӧзи, чын керектердиҥ сӱр-кебери эмес. Ол јылдыҥ сайын бир тӱҥей тайылгалар эдерин некейт. Је бу ажыра Кудайга бажырарга келип турган улусты толо кемдӱ эдип болбойт.

² Оноҥ башка, Кудайга бажырып турган улус тайылгалар этпей барар эди, нениҥ учун дезе, олор бир катап аруталала, кинчектер учун бурузын сеспес эди.

³ Карын, бу тайылгалар јылдыҥ сайын кинчектер керегинде эске алындырып јадылар.

⁴ Букалардыҥ ла эчкилердиҥ каны кинчектерди јоголтор аргазы јок.

⁵ Оныҥ учун Христос телекейге келип, «Сен тайылгаларды ла берӱлерди кӱӱнзебедиҥ, је Сен Мени эт-канду болзын деп кӱӱнзегеҥ.

⁶ Ӧртӧп тайатан тайылгаларды да, кинчек учун тайылгаларды да јаратпайдыҥ –

⁷ дейле, „Бат Мен! Э-э, Кудай, тӱрбекте Мен керегинде бичилгениле, табыҥды бӱдӱрейин деп келдим!“» – деген.

⁸ Ол озо баштап: «Сен Јасакла эдилип турган берӱлерди де, ӧртӧп тайатан тайылгаларды да, кинчектер учун тайылгаларды да кӱӱнзебедиҥ» – дейле,

⁹ оноҥ: «Бат, табыҥды бӱдӱрейин деп келдим, Кудайым» – деген. Мынызыла Ол экинчизин тургузарга, баштапкызын токтодып јат.

¹⁰ Оныҥ табы неде дезе, Иисус Христостыҥ эди-каны бир катап ла ӱргӱлјиге тайылганы ажыра агарулалдыс.

¹¹ Кажы ла абыс кӱнӱҥ сайын туруп, Кудайга бажырып, кинчектерди качан да јоголтып болбос бир тӱҥей тайылгаларды кӧп катап тайат.

¹² Христос дезе, кинчектер учун бир тайылга эдип, Кудайдыҥ оҥ јанына ӱргӱлјиге отурып алган.

¹³ Ол ӧйдӧҥ ала Оныҥ ӧштӱлери будыныҥ алдына салылганча сакып јат.

¹⁴ Бир тайылга ажыра Ол агарулалып турган улусты ӱргӱлјиге толо кемдӱ эткен.

¹⁵ Ол керегинде биске Агару Тын керелейт. Айдылган јок беди:

¹⁶ «Мен олорго кереес беретен кӱндер келер – деп, Кайракан айдат, – Мен јасактарымды јӱректерине салып, санааларына бичиирим.

¹⁷ Кинчектерин ле јарамастарын база эске албазым».

¹⁸ Кайда кинчектер ташталган, анда тайылга эдилбес.

Бӱдӱп ле иженип јӱргенистеҥ кыйбазынаҥ тудунактар

¹⁹ Анайдарда, карындаштар, тидим болуп, Иисустыҥ каныныҥ болужыла агарудаҥ агару јерге кирер аргабыс бар.

²⁰ Ол биске кӧжӧгӧ ажыра – Бойыныҥ эди-каны ажыра јӱрӱмниҥ јаҥы јолын ойто ачкан.

²¹ Бисте Кудайдыҥ туразында башкарарга тургузылган Улу абыс бар.

²² Айдарда, ачык-јарык јӱректӱ болуп, толо бӱдӱп, јӱректеристи кинчектӱ санаадаҥ арутап, эди-каныбысты ару суула јунуп, Кудайга келектер.

²³ Неге бӱдӱп ле иженип јӱргенистеҥ кыйбазынаҥ тудунактар, нениҥ учун дезе сӧзин берген Кудай – чындык.

²⁴ Сӱӱрге ле јакшы керектер эдерге кӧкӱдижип, бой-бойыбыска ајарыҥкай бололы.

²⁵ Јуундарыстаҥ туура артпайлыктар, кезик улуста андый темигӱ бар. Оныҥ ордына Кайраканныҥ кӱни јууктап келеткенин кӧрӱп, бой-бойыбысты мынаҥ артык сергидектер.

²⁶ Чындыкты билип, ӧнӧтийин кинчек эдип турган болзобыс, биске кинчектерис учун тайылга јок ине.

²⁷ Ол тушта коркышту јаргыны ла калапту отты сакыыры артат. Бу от Кудайга удурлажып турган улусты јуда салар.

²⁸ Моисейдиҥ Јасагын јектеген кижини эки эмезе ӱч керечи бар болзо, килебей ӧлтӱрип туратан.

²⁹ Андый болгондо, Кудайдыҥ Уулын тепсеп, кереестиҥ каныла агарулалган бойы, оны агару эмес деп бодоп, јакшылыктыҥ Тынын јамандап турган кижи канча кире кату кезедӱ алар?

³⁰ Мынайда айтканды билерис: «Мен ӧч аларым, Мен јандыра берерим – деп, Кайракан айдат». База: «Кайракан Бойыныҥ калыгын јаргылаар».

³¹ Тирӱ Кудайдыҥ колына кирери коркышту!

³² Башкыдагы кӱндеригерди эске алыгар. Ол тушта Кудайдыҥ јарыгыла јарыдылган бойыгар кыйналып, јаан тартыжуны чыдажып ӧттигер.

³³ Кезикте слерди ончо улус кӧзинче јамандап, кыйнагандар, кезикте слердий ок айалгада јӱрген улусла коштой болгоныгар.

³⁴ Слер кижендӱлерле кожо кыйналдыгар, јӧӧжӧгӧрди тоноордо – сӱӱндигер, нениҥ учун дезе слерде теҥериде мынаҥ артык мӧҥкӱлик јӧӧжӧ барын билер болгоныгар.

³⁵ Анайдарда, тидим болуп артыгар, ол учун слерге улу кайрал болор.

³⁶ Кудайдыҥ табын бӱдӱрип, Оныҥ берер болгонын аларга слерге чыдамкай болор керек.

³⁷ База ла эмеш, келер учурлу Кудай једип келер, саадабас.

³⁸ Мениҥ акту кижим дезе бӱдӱп, јӱрер. Је јана болгоны Мениҥ кӱӱниме јарабас.

³⁹ Бис дезе јана болуп, ӧлӱмге барып јаткан улустаҥ эмезис. Је бис јӱрӱмисти чеберлеп аларга бӱдӱп јадыбыс.