Еврейлерге 1 - Јаҥы Кереес

Кудайдыҥ Уулы ангелдердеҥ бийик

¹ Кудай ӧткӧн чактарда јарлыкчылар ажыра адаларыска улам сайын, јӱзӱн-јӱӱрлеп айдып туратан.

² Калганчы ӧйлӧрдӧ Уулы ажыра биске айдар болды. Ол Уулын ончозын энчиленер эдип тургускан, Ол ажыра орчылаҥды да јайаган.

³ Уулы Адазыныҥ магыла јаркындалып, Оныҥ сӱр-кебери болуп јат. Ол Бойыныҥ кӱчтӱ сӧзи ажыра бастыра немеге бар болуп јӱрерге берип јат. Кинчектерди арутайла, теҥериде Улу Кудайдыҥ оҥ јанына отурып алган.

⁴ Оныҥ алган ады-јолы ангелдердийинеҥ канча кире бийик, анча киреге Ол ангелдердеҥ бийик боло берген.

⁵ Кудай ангелдердиҥ кемизине качан-бир: «Сен – Мениҥ Уулым, Мен бӱгӱн Сени ак-јарыкка чыгардым» – деп айткан ба? База: «Мен Оныҥ Адазы болорым, Ол Мениҥ Уулым болор» – деп?

⁶ База, Тун Уулын орчылаҥга экелип турарда, айткан: «Ого Кудайдыҥ ончо ангелдери бажырзын».

⁷ Ангелдер керегинде дезе айткан: «Ангелдериҥди салкындар эдедиҥ, јалчыларыҥды от јалбыштары эдедиҥ».

⁸ Уулы керегинде дезе: «Сениҥ ширееҥ, Кудай, элен-чактарга тургай. Сениҥ каандыгыҥныҥ кӱчи – чынныҥ кӱчи болгой.

⁹ Сен чынды сӱӱдиҥ, јарамасты јаман кӧрдиҥ. Оныҥ учун Кудай, Сениҥ Кудайыҥ Сени майлап, Сеге сӱӱнчини кожо јӱргендериҥе кӧрӧ кӧп берген».

¹⁰ База айдылган: «Сен, Кайракан, озо баштап јерди тӧзӧгӧҥ, Сениҥ колдорыҥ теҥерини јайаган.

¹¹ Олор јоголып калар, Сен – артып каларыҥ; ончозы кийим чилеп ӱлтӱреп калар.

¹² Олорды кийимди чилеп тӱрериҥ, олор кубулар. Је Сен ол ло бойыҥ, Сениҥ кӱндериҥ тӱгенбес».

¹³ Кудай ангелдердиҥ кемизине качан-бир: «Ӧштӱлериҥди будыҥныҥ алдына салып бербегенчем, оҥ јаныма отур» – деген бе?

¹⁴ Ангелдер ончозы Кудайга бажырып јӱрген тындар эмес беди? Олор аргадашты алатан улуска болушсын деп ийилген эмес беди?