Колоссыдагыларга серкпеге самаразы 2 - Јаҥы Кереес

¹ Слер учун, Лаодикиядагы карындаштар учун, чырайымды кӧрбӧгӧн ончо карындаштар учун канайда тыҥ тартыжып јӱргенимди билигер деп турум.

² Олордыҥ јӱректери коот алзын, сӱӱште бириккилезин, Кудайдыҥ ла Аданыҥ, Христостыҥ јажыдын билип, толо бӱдӱмјилӱ болзын деп, мыны эдип турум.

³ Христостыҥ Бойында дезе ойгорлыктыҥ ла билимниҥ ончо эрјинези јажырылган.

⁴ Кем де слерди чынга бодолду сӧстӧрлӧ мекелебезин деп, мыны айдып турганым бу.

⁵ Слерле кожо эмес те болзом, је санаамла слерле кожо јӱрӱп јадым, слердиҥ аайлу-башту јӱргенигерди ле Христоско бек бӱткенигерди кӧрӱп, сӱӱнип јадым.

Христос ажыра толо јӱрӱм

⁶ Оныҥ учун Христос Иисус Кайраканды канайып алынганыгар, анайып Оныҥ Бойында јӱригер.

⁷ Слерди ӱреткениле, Оныҥ Бойында тазылданып, јӱрӱмигерди тӧзӧгӧр, бӱдеринде тыҥыдыныгар, јӱректеригер алкыш-быйанла толзын.

⁸ Ајарынып јӱригер, ойгор айдыныштарла, куру тӧгӱнле слерди кем де баштап апарбазын. Олор кижиниҥ ӱредӱзине, телекейди башкарган јасактарга тӧзӧлгӧн, је Христоско эмес,

⁹ нениҥ учун дезе Оныҥ Бойында Кудайдыйы ончозы толо јӱрӱп јат,

¹⁰ слер де Оныҥ Бойында толо кемине јеттигер. Ол ончо башталганыҥ ла јаҥныҥ бажы.

¹¹ Слер Оныҥ Бойында томдолдыгар. Слерди кижиниҥ колы томдободы, је слердеҥ кинчектӱ эт-канныҥ бойы алылган. Андый томдошты Христос эткен.

¹² Креске тӱжӱп, Оныла кожо бойыгарды кӧмдигер. Креске тӱжӱп, Оны тиргискен Кудайдыҥ кӱчине бӱткенигер ажыра Оныла кожо тирилдигер.

¹³ Слерди де, кинчектердеҥ улам, эди-каныгар томдолбогонноҥ улам ӧлӱп калган бойыгарды, Кудай Оныла кожо тындандырып, ончо кинчектеригерди таштаган.

¹⁴ Ол Јасактыҥ некелтелерине тӧзӧлип бичилген тӧлӱлеристи кырып, оны јолыбыстаҥ кедери алып, керӱ агашка кадап койгон.

¹⁵ Башталгалардыҥ ла ӧрӧги јаҥдардыҥ кӱчин айрып, олорды уйатка салып, јеҥгенин байрамдаган.

¹⁶ Анайдарда, нени јип, нени ичип турганыгар, байрам кӱндерди, ай јаҥырганын ла суббот кӱндерди темдектеп турганыгар ба, јок по, слерди кижи јаргылабазын.

¹⁷ Бу јӱк келетен немелердиҥ кӧлӧткӧзи эмей, эмди бары – Христостыйы.

¹⁸ Јобожыдынары, ангелдерге бажырып јӱрери керегинде тӧгӱн сӧстӧрлӧ слерди кем де мекелебезин. Андый улус кӧрбӧгӧни керегинде айдып, кижиниҥ санаазыла калас мактанып јадылар.

¹⁹ Олор Башла колбуны јылыйтып койгондор. Баштаҥ ӱйелердиҥ ле учуктардыҥ шылтузында ончо эт-кан јеткилделип, бирге биригип, Кудайдыҥ кӱӱниле ӧзӧт.

Христосло кожо ӧлӧри ле јӱрери

²⁰ Христосло кожо ӧлӱп, бу телекейди башкарып турган јасактардаҥ јайымдалган болзогор, эмдиге телекейде јӱргенигер чилеп, олорго не башкартып турганыгар:

²¹ «Мыны этпе», «оны јибе», «ого тийбе» – деп?

²² Бу ончозы – кижиниҥ јакылталары ла ӱредӱзи. Олор удурум,

²³ башбилинип Кудайды тоорында, јобожыдынарында, эт-канды јободорында кандый да ойгор деп кӧрӱнет, је олордо туза јок, олор јӱк кижиниҥ кӱӱнин бӱдӱрерине экелет.