Ачылта 7 - Јаҥы Кереес

Кудайдыҥ ширеези алдында турган калыктар

¹ Мыныҥ кийнинде јердиҥ тӧрт булуҥында турган тӧрт ангелди кӧрӱп ийгем. Салкын јерге де, талайга да, кандый да агашка сокпозын деп, олор јердиҥ тӧрт салкынын тудунып алгандар.

² Оноҥ кӱнчыгыштаҥ кӧдӱрилип јаткан ӧскӧ ангелди кӧрӱп ийгем. Ол тирӱ Кудайдыҥ таҥмазын тудунып алган. Јерге ле талайга каршу јетирер јаҥ берилген тӧрт ангелге тыҥ ӱнденип кыйгырып, айткан:

³ – Кудайыстыҥ кулдарыныҥ маҥдайларына таҥма баспаганчабыс, јерге де, талайга да, агаштарга да каршу јетирбегер.

⁴ Таҥмалалган улустыҥ тоозын угуп ийгем: Израиль уулдарыныҥ ончо ӱйелеринеҥ 144 муҥ кижи таҥмалалган.

⁵ Иуда ӱйезинеҥ 12 муҥ кижи таҥмалалган. Рувим ӱйезинеҥ 12 муҥ кижи таҥмалалган. Гад ӱйезинеҥ 12 муҥ кижи таҥмалалган.

⁶ Асир ӱйезинеҥ 12 муҥ кижи таҥмалалган. Неффалим ӱйезинеҥ 12 муҥ кижи таҥмалалган. Манассия ӱйезинеҥ 12 муҥ кижи таҥмалалган.

⁷ Симеон ӱйезинеҥ 12 муҥ кижи таҥмалалган. Левий ӱйезинеҥ 12 муҥ кижи таҥмалалган. Иссахар ӱйезинеҥ 12 муҥ кижи таҥмалалган.

⁸ Завулон ӱйезинеҥ 12 муҥ кижи таҥмалалган. Иосиф ӱйезинеҥ 12 муҥ кижи таҥмалалган. Вениамин ӱйезинеҥ 12 муҥ кижи таҥмалалган.

⁹ Мыныҥ кийнинде кем де тоолоп болбогон кара-бајырт улусты кӧрӱп ийгем. Анда ончо уктардаҥ, ӱйелердеҥ, калыктардаҥ ла тилдердеҥ улус болгон. Олор ширеениҥ алдында ла Кураанныҥ алдында тургандар. Ак кийимдӱ болгондор, колдорында пальма агаштыҥ сабактарын тудунып алгандар.

¹⁰ – Улусты ширееде отурган Кудайыс ла Кураан аргадайт! – деп, олор тыҥ ӱнденип кыйгырыжып тургандар.

¹¹ Ончо ангелдер ширеени, башчыларды ла тӧрт тындуны эбире тургандар. Олор ширеениҥ алдына кӧҥкӧрӧ јыгылып, Кудайга бажырып,

¹² айткандар: – Аминь! Кудайыска ӱргӱлји чакка алкыш, мак, ойгор, быйан, кӱндӱӱ, јаҥ ла кӱч! Аминь.

¹³ Сӧс айдып баштайла, башчылардыҥ бирӱзи менеҥ сураган: – Ак кийим кийген бу не улус, олор кайдаҥ келген?

¹⁴ – Сен билериҥ, бийим – дегем. Ол меге айткан: – Улу ачу-коронноҥ келген улус бу. Олор кийимин јунуп, Кураанныҥ каныла ак эткендер.

¹⁵ Оныҥ учун Кудайдыҥ ширеези алдында туруп, Оныҥ байзыҥында Ого тӱни-тӱжи бажырып јадылар. Ширееде Отурганы олордыҥ чадыры боло берер.

¹⁶ Олор база торолобос, суузабас, олорды кӱн, кандый да изӱ ӧртӧбӧс,

¹⁷ нениҥ учун дезе олорды ширеениҥ орто тужындагы Кураан кабырар, тирӱ сууныҥ агындарына апарар, Кудай олордыҥ кӧзинеҥ кандый ла јашты арчыыр.