Ачылта 5 - Јаҥы Кереес

Тӱрбек ле Кураан

¹ Оноҥ ширееде Отурганныҥ оҥ колында тӱрбекти кӧрӱп ийгем. Бу тӱрбекте јети таҥма базылган, ичинде ле тыштында бичилген.

² Мен кӱчтӱ ангелди кӧрӱп ийгем, ол тыҥ ӱнденип јарлап турган: – Тӱрбекти ачып, оныҥ таҥмазын алып ийерге кем јарамык?

³ Је теҥериде де, јерде де, јердиҥ алдында да кем де тӱрбекти ачып, ого карап кӧрӱп болбогон.

⁴ Тӱрбекти ачып, ого карап кӧрӧргӧ јарамык кижи табылбаган учун, мен кӧп ыйлагам.

⁵ Башчылардыҥ бирӱзи меге айткан: – Ыйлаба. Бат, Иуда угынаҥ Давидтиҥ тазылы, Арслан, јеҥди. Ол бу тӱрбекти ачып, оныҥ јети таҥмазын алып ийер аргалу.

⁶ Мен ширее ле тӧрт тындуныҥ ортозында, башчылардыҥ ортозында Кураан турганын кӧрӱп ийгем. Ол сойылгандый болгон, јети мӱӱстӱ ле јети кӧстӱ – Кудайдыҥ ончо јерге ийилген јети тыны.

⁷ Ол келип, ширееде Отурганныҥ оҥ колынаҥ тӱрбекти алган.

⁸ Тӱрбекти аларда, тӧрт тынду ла јирме тӧрт башчы Кураанныҥ алдына кӧҥкӧрӧ тӱшкен. Кажызы ла јадаганду, фимиамла толтырылган алтын айакту болгон, бу – агарулардыҥ мӱргӱлери.

⁹ Олор јаҥы сарын сарнап, айдып јадылар: «Сен тӱрбекти колго аларга ла оныҥ таҥмазын алып ийерге јарамык, нениҥ учун дезе, Сен сойылып, Бойыҥныҥ каныҥла кандый ла ӱйедеҥ, тилдеҥ, калыктаҥ ла уктаҥ улусты Кудайга садып алгаҥ.

¹⁰ Сен бисти Кудайыска каандар ла абыстар эткеҥ. Бис јерде башкарарыс».

¹¹ Мен ширеени, тындуларды ла башчыларды эбире кӧп ангелдерди кӧрӱп, ӱндерин угуп ийгем. Тоозы тӱмендердиҥ тӱмени, муҥдардыҥ муҥы болгон.

¹² Олор тыҥ ӱнденип, айдыжып тургандар: «Сойылган Кураан јаҥды, байлыкты, ойгорды, кӱчти, кӱндӱӱни, макты ла алкышты аларга јарамык!»

¹³ Теҥериде ле јерде, јердиҥ алдында ла талайда јӱрген кандый ла јайалган, олордо бар не ле неме мынайда айдыжып турганын угуп ийгем: «Ширееде Отурганга ла Кураанга ӱргӱлји чакка алкыш, кӱндӱӱ, мак ла кӱч!»

¹⁴ Тӧрт тынду: «Аминь!» – дегендер, јирме тӧрт башчы кӧҥкӧрӧ тӱжӱп, элен-чакка Јӱреечиге бажыргандар.